ᐱᕙᓪᓕᐊᔪᑦ

ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑕ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕᖓᑦ ᐹᓪ ᖁᐊᓴ ᐅᓪᓗᒥ ᑐᓴᖅᑎᑦᑎᕘᑦ ᑖᒃᑯᐊ ᒪᑭᒋᐊᖅᑕ ᐃᓄᐃᑦ ᐃᓕᓴᐃᓂᕐᒥᒃ ᑯᐊᐳᕇᓴᒃᑯᖏᑕ ᑲᑎᒪᔨᖏᑦ ᐊᖏᕈᑎᖃᓐᓂᖏᓐᓂᒃ $3 ᒥᓕᐊᖑᓗᐊᖅᑐᓂᒃ ᑮᓇᐅᔭᖃᖅᑎᑦᑎᒍᑎᐅᓪᓗᓂ 12-ᓂᒃ ᐊᔾᔨᒌᙱᑦᑐᓂᒃ ᐃᓕᓴᐃᒍᑎᐅᓂᐊᕐᑐᓂᒃ. ᐊᑑᑎᒋᔭᖏᓪᓕ ᐃᓕᓴᐃᓂᕐᒥᒃ ᑯᐊᐳᕇᓴᖑᔫᑉ ᐱᕚᓪᓕᑲᓐᓂᖁᓪᓗᒍ ᐱᔭᕇᔭᐅᓂᖅ ᓄᓇᕗᑦ ᐃᓄᖏᓐᓂᒃ ᐃᖅᑲᓇᐃᔮᖃᓕᕐᓂᕐᒥᒃ, ᒐᕙᒪᒃᑯᓐᓂ ᐅᕝᕙᓗ ᐃᒻᒥᒃᑯᑦ ᐱᓕᕆᕕᐅᔪᓂ. ᓄᓇᕗᑦ ᑐᙵᕕᒃ ᑎᒥᖓ ᓴᖅᑮᓚᐅᕐᓯᒪᒻᒪᑕ ᒪᑭᒋᐊᖅᑕᑯᓐᓂᒃ ᔮᓐᓄᐊᕆ 2016-ᖑᑎᓪᓗᒍ ᑮᓇᐅᔭᖃᖅᑐᑎᒃ ᐋᖅᑭᖃᑎᒌᓐᓂᕐᒧᑦ ᐊᖏᕈᑎᑎᒍᑦ ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᖅᑐᐃᕕᒃᑰᑎᑦᑎᒍᑎᖓᓂᒃ ᒐᕙᒪᑐᖃᒃᑯᓐᓂᒃ ᑲᒪᒋᔭᕆᐊᓕᖕᒥᓂᒃ ᓄᓇᕗᖕᒥ ᐊᖏᕈᑎᑎᒍᑦ ᑲᒪᒋᐊᕐᓯᒪᙱᓐᓂᖏᓐᓄᑦ. ᑕᐃᒪᙵᓂᑦ ᑎᒥᙳᖅᑎᑕᐅᔪᑎᓪᓗᒍ ᐊᕐᕌᓂ ᔮᓐᓄᐊᕆᒥ, ᒪᑭᒋᐊᖅᑕᒃᑯᑦ ᑲᑎᒪᔩᑖᔪᒻᒪᑕ, ᓴᖅᑮᓪᓗᑎᓪᓗ ᐱᓕᕆᔾᔪᑎᒃᓴᒥᓐᓂᒃ ᐸᕐᓇᒍᑎᓂ ᐊᒻᒪ ᐅᐸᓗᖓᐃᔭᐅᑎᓂᒃ ᐸᕐᓇᒍᑎᓂᒃ, ᐊᒻᒪᓗ ᐊᖏᕈᑎᖃᓚᐅᕐᐳᑦ ᑮᓇᐅᔭᓂᒃ ᑐᒃᓯᕋᕈᑎᓂᒃ ᐊᒥᓱᑲᓪᓚᓐᓂᒃ ᐃᓄᖕᓄᑦ ᖃᐅᔨᒪᓂᕐᑖᕈᑕᐅᓂᐊᕐᓗᑎᒃ ᐃᖅᑲᓇᐃᔭᕐᑎᐅᓂᕐᒧᑦ ᖃᐅᔨᒪᔭᕆᐊᖃᖅᑕᖏᓐᓂᒃ. “ᑮᓇᐅᔭᖃᖅᑎᑕᐅᓪᓗᑎᒃ ᑖᒃᑯᐊ ᐱᒻᒪᕆᐅᔪᑦ ᐱᓕᕆᐊᕆᔭᐅᔪᑦ, ᒪᑭᒋᐊᖅᑕ ᓯᕗᒧᒃᐸᓪᓕᐊᓂᖃᕆᐊᖅᓯᒪᕗᑦ ᐃᑲᔪᓐᓂᖃᓐᓂᐊᖅᑐᓂᒃ ᓄᓇᕗᖕᒥ ᐃᓄᖕᓄᑦ ᖃᐅᔨᒪᔭᕆᐊᖃᖅᑕᖏᓐᓂᒃ ᕿᓂᕐᑎᓪᓗᒋᑦ ᐃᖅᑲᓇᐃᔮᒃᓴᒥᒃ ᐊᒻᒪᓗ ᐃᖅᑲᓇᐃᔭᐃᓐᓇᓕᕈᑎᒋᔪᓐᓇᕐᑕᖏᓐᓂᒃ ᓄᓇᕗᖕᒥ ᑮᓇᐅᔭᓕᐅᕐᕕᐅᔪᓂ ᐊᔾᔨᒌᙱᑦᑐᓂ. ᑕᒪᓐᓇ ᖃᓄᐃᖏᓂᕐᓴᓂᒃ ᐃᓛᔮᕇᓄᑦ/ᕿᑐᙵᕇᓄᑦ, ᓄᓇᓕᖕᓂ ᐊᒻᒪᓗ ᐃᓄᖕᓄᑦ. ᑕᒪᓐᓇ ᑕᑯᓐᓇᖑᐊᓚᐅᕐᓯᒪᒐᑦᑎᒍ ᐊᐃᕙᔾᔪᑎᒋᓕᕋᑦᑎᒍᑦ ᑎᑎᕋᖅᓯᒪᔪᖅ ᐃᓛᒃᑯᑦ 23 ᓄᓇᕗᖕᒥ ᐊᖏᕈᑎᓂ ,” ᐅᖃᖅᑐᖅ ᐊᖓᔪᖅᑳᖓᑦ ᓄᓇᕗᑦ ᑐᙵᕕᒃ ᑎᒥᖓᑕ ᑰᑦᑎᖅ. “ᒪᑭᒋᐊᖅᑕ ᐱᓂᐊᕐᓂᖃᕈᑎᖃᖅᓯᒪᒻᒪᑕ ᑲᔪᓯᓂᖃᑦᑎᐊᕈᓐᓇᕐᑐᓂᒃ ᐃᓕᓴᐃᒍᑎᓂᒃ ᐊᒻᒪᓗ ᖃᐅᔨᒪᓂᖅᑖᓂᕐᒥᒃ ᓄᓇᕗᖕᒥᐅᑦ…