Arctic Fresh Inc.
Arctic Fresh ᐃᓄᓐᓄᑦ ᑲᒻᐸᓂᖁᑎᒋᔭᐅᔪᖅ, ᐊᖓᔪᖅᑳᖃᕐᕕᓖᑦ ᐃᒡᓗᓕᒻᒥ, ᓄᓇᕗᑦ. ᓂᕆᔭᒃᓴᓕᕆᔨᐅᖃᑦᑕᖅᓯᒪᔪᑦ ᓂᐅᕕᖅᐸᑦᑐᓄᑦ ᓄᓇᕗᒻᒥ ᕿᑭᖅᑖᓘᑉ ᓄᓇᖓᓂ 2016-ᒥᓂᒃ.
Arctic Fresh ᐱᓕᖕᒪᒃᓴᐅᑎᒃᓴᖅ ᑐᕌᖓᔪᖅ ᐊᐅᓚᑦᓯᒍᓐᓇᖅᓯᕙᓪᓕᐊᓂᕐᒥᒃ ᑮᓇᐅᔭᓕᕆᓂᕐᒨᖓᔪᓂᒃ, ᐊᑐᕆᐊᓕᓐᓄᑦ, ᐱᔪᒐᖅᓴᐅᑎᓄᑦ, ᐃᖅᑲᓇᐃᔭᖅᑐᓕᕆᓂᕐᒧᑦ, ᑲᑎᖃᑦᑕᓂᕐᒧᑦ ᓂᐅᕐᕈᑎᖃᖃᑦᑕᓂᕐᒧᓪᓗ. ᑐᕌᒐᓕᒃ ᓴᖅᑮᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᓄᓇᓕᓐᓂ ᐊᐅᓚᑕᐅᒍᓐᓇᖅᑐᓂᒃ ᐊᒻᒪᓗ ᐅᓇᑕᐅᑎᒋᔭᐅᓗᓂ ᖄᖃᑦᑕᓂᕐᒥᒃ ᓂᕆᔭᑦᓴᖃᑦᓯᐊᖏᓐᓂᕐᒧᑦ ᐊᒻᒪᓗ ᐃᑲᔫᑎᓕᒃ ᓄᓇᓖᑦ ᐃᓄᖏᑦ ᓇᖕᒥᓂᖅ−ᒪᑭᒪᒍᓐᓇᖅᓯᖁᓪᓗᒋᑦ. ᐃᓱᐊᓂ ᑐᕌᒐᖓ ᐃᓚᒋᔭᐅᔪᑦ ᐊᔪᕈᓐᓃᖅᓯᒪᖁᓪᓗᒋᑦ ᐃᖅᑲᓇᐃᔮᖅᑖᕈᓐᓇᖅᓯᓗᑎᒃ ᓄᓇᕗᑦ ᒐᕙᒪᖓᓂ, ᓄᓇᓖᑦ ᒐᕙᒪᖓᓂ, ᓄᓇᓖᑦ ᓂᐅᕕᕐᕕᖏᓐᓂ, ᐊᕕᑦᑐᖅᓯᒪᓂᕐᓂ ᐱᓕᕆᐊᓂᒃ ᐅᕝᕙᓘᓐᓃᑦ ᐱᔪᒪᒍᑎᒃ, ᒪᑐᐃᖅᓯᓗᑎᒃ, ᓇᖕᒥᓂᖁᑎᑖᕐᓗᑎᒃ, ᐊᐅᓚᑦᓯᓗᑎᒃ ᓂᕿᑖᕐᕕᒻᒥᒃ ᓂᐅᕕᕐᕕᕋᓛᒥᒃ ᓄᓇᒥᓐᓂ.
ᑖᓐᓇ ᐱᓕᕆᐊᖅ ᑐᒃᓯᕋᐅᑕᐅᔪᖅ ᑎᑭᐅᑎᒍᑎᒃᓴᒧᑦ ᐱᔪᒥᒋᔭᐅᔪᒧᑦ ᐅᖃᐅᓯᐅᖃᑦᑕᖅᓯᒪᔪᒧᑦ ᒪᑭᑉᐸᓪᓕᐊᒍᑎᒃᓴᒥᒃ ᓇᖕᒥᓂᖁᑎᖃᕐᓂᕐᒥᒃ ᐊᔪᙱᓐᓂᕆᔭᐅᒋᐊᓕᓐᓂᒃ ᐃᓄᓐᓄᑦ ᓄᓇᕗᒻᒥ, ᐱᕈᖅᐸᓪᓕᐊᓗᑎᒃ ᓄᓇᓕᑦᑎᒍᑦ ᐊᐅᓚᑦᓯᒍᓐᓇᕐᓗᑎᒃ, ᓴᖅᑮᓗᑎᒃ ᑲᒪᖃᑦᑕᓂᒃᑯᑦ ᓇᖕᒥᓂᖁᑎᖃᕐᓂᕐᒥᒃ ᐱᓕᖕᒪᒃᓴᐅᑎᒃᓴᒥᒃ ᐃᑲᔫᑎᒃᓴᒥᒃ ᓄᓇᓕᓐᓂ ᐱᕙᓪᓕᐊᑎᑦᓯᓂᕐᒥᒃ ᒥᑭᔫᑎᓂᒃ ᓇᖕᒥᓂᖁᑎᖃᕈᓐᓇᓂᕐᒧᑦ.
ᑐᒃᓯᕋᐅᑎᖓ Arctic Fresh ᓄᓇᓕᓐᓂ ᑭᒡᒐᖅᑐᐃᓂᕐᒧᑦ ᐱᓕᖕᒪᒃᓴᐅᑎᒃᓴᒧᑦ ᐃᓕᓐᓂᐊᑎᑦᓯᒍᓐᓇᖁᓪᓗᒋᑦ ᐊᒻᒪᓗ ᓱᓇᒃᑯᑖᖃᖅᑎᑦᓯᓗᑎᒃ 25-ᓂᒃ ᓄᓇᕗᒻᒥᐅᓂᒃ ᕿᑭᖅᑖᓘᑉ ᓄᓇᖓᓂ, ᓄᑖᒥᒃ ᐊᑐᕆᐊᓕᖕᒥᓪᓗ ᐊᔪᙱᓐᓂᖃᕆᐊᖃᕐᓂᕐᒧᑦ ᑎᒍᓯᓂᕐᒥᒃ ᓄᑖᓂᒃ ᐱᓕᕆᐊᒃᓴᓂᒃ ᓇᖕᒥᓂᖁᑎᖃᕐᓂᒃᑯᑦ ᐊᒻᒪᓗ ᒐᕙᒪᒃᑯᑦ ᐱᓕᕆᕝᕕᖏᑎᒍᑦ.
ᐃᓚᒋᔭᐅᔪᑦ ᐱᔪᓐᓇᖅᓯᕙᓪᓕᐊᓂᐊᖅᑐᑦ ᐊᔾᔨᐅᖏᑦᑐᓚᑦᑖᒥᒃ ᓄᓇᑦᑎᒍᑦ ᐋᖅᑭᑦᓯᒪᔪᒥᒃ ᓴᖅᑭᖅᑕᐅᓯᒪᔪᒥᒃ ᐃᓄᐃᑦ ᓇᖕᒥᓂᖁᑎᖓᓂᒃ ᓵᙵᑦᓯᔭᕆᐊᖃᖃᑦᑕᖅᓯᒪᔪᒥᒃ ᐅᓄᖅᑐᓂᒃ ᐊᑦᓱᕈᕐᓇᖅᑐᓂᒃ ᐊᒻᒪᓗ ᖃᐅᔨᖃᑦᑕᖅᓯᒪᔪᒥᒃ ᐊᓂᒍᐃᕕᒋᔪᓐᓇᖅᑕᒥᓂᒃ.
ᖃᐅᔨᓂᐊᖅᑐᑦ ᐊᑐᓪᓚᑦᑖᕐᓗᑎᒃ ᐊᕙᑖᓂ, ᐃᓚᖏᓐᓂ ᐅᖃᐅᓯᐅᔪᓂᒃ ᐊᔪᙱᓐᓂᐅᒋᐊᓕᓐᓂᓪᓗ ᐃᓕᓐᓂᐊᖅᑎᑕᐅᒍᑕᐅᓂᐊᖅᑐᓂᒃ:
ᑮᓇᐅᔭᓕᕆᔾᔪᑎᓕᕆᔪᓐᓇᕐᓂᖅ, ᑮᓇᐅᔭᖁᑎᒋᔭᐅᔪᑦ ᓇᖕᒥᓂᖅ, ᓇᖕᒥᓂᖅ ᐱᕙᓪᓕᐊᓂᖅ ᖃᓄᐃᙱᓯᐊᕐᓂᕐᓗ, ᐃᓅᓯᕐᒥ ᓇᖕᒥᓂᖁᑎᖃᕐᓂᖅ ᐊᒻᒪᓗ ᐃᓄᐃᑦ ᓇᖕᒥᓂᖁᑎᖓ, ᐃᓚᓕᐅᔾᔨᓯᒪᒍᓐᓇᕐᓂᖅ ᐃᓄᐃᑦ ᖃᐅᔨᒪᓂᖏᓐᓂᒃ ᓇᖕᒥᓂᖁᑎᖃᕐᓗᓂ, ᓇᖕᒥᓂᖁᑎᖃᕐᓂᕐᒧᑦ ᐊᑐᕋᑦᓴᑦ ᐋᖅᑭᑦᓯᒪᓂᐅᔪᑦ, ᐱᖕᒪᕆᐅᓂᖓ ᐃᓱᒻᒥᖅᓯᒪᑦᓯᐊᕆᐊᖃᕐᓂᖅ ᐊᒻᒪᓗ ᐋᖅᑭᑦᓱᐃᒍᓐᓇᑦᓯᐊᕆᐊᖃᕐᓂᖅ ᓈᖕᒪᖏᑦᑐᓂᒃ, ᐊᐅᓚᑦᓯᔨᐅᓂᖅ, ᐊᐅᓚᑦᓯᔨᓂ ᐱᓕᕆᖃᑕᐅᓂᖅ, ᓱᓇᒃᑯᑖᓕᕆᓂᖅ, ᑮᓇᐅᔭᓕᕆᔾᔪᑎᓕᕆᓂᖅ, ᐱᔪᒐᖅᓴᐅᑏᑦ, ᓂᐅᕕᖅᐸᑦᑐᑦ ᐱᔨᑦᓯᕈᑎᖏᑦ, ᒪᓕᒐᕐᓂᐊᕐᓂᖅ, ᐃᖅᑲᓇᐃᔭᖅᑐᓕᕆᓂᖅ. ᐱᓕᖕᒪᒃᓴᐅᑎᒃᓴᑦ ᐃᓕᓴᐃᒍᑎᑐᐃᓐᓇᐅᔾᔮᖏᑦᑐᑦ ᐱᓕᖕᒪᒃᓴᐅᑎᑐᐃᓐᓇᐅᖏᓪᓗᑎᓪᓗ ᑭᓯᐊᓂᓕ, ᐊᑐᓂᑦ ᐃᓚᒋᔭᐅᔪᑦ ᐱᕕᒃᓴᖃᖅᑎᑕᐅᓂᐊᖅᑐᑦ ᑕᐅᑐᓐᓂᕐᒥᒃ ᐊᒻᒪᓗ ᒪᑭᑉᐸᓪᓕᐊᓂᕐᒥᒃ ᑖᒃᑯᑎᒎᓇ ᐊᔪᕈᓐᓃᖅᓴᐅᑎᑎᒍᑦ ᐃᖅᑲᓇᐃᔮᒧᑦ ᐃᓅᓯᓂ ᐊᑐᓪᓚᑖᕐᓗᒍ.
ᒥᐅᕆᓕ ᕆᓯᓄᔅ
VP ᓇᖕᒥᓂᖁᑎᖃᕐᓂᕐᒧᑦ ᐱᕙᓪᓕᐊᑎᑦᓯᓂᖅ
Arctic Fresh Inc.
merlyn@arcticfresh.ca
867-934-3851