ᑕᓯᐅᖅᑎᒌᑦ ᓴᓴᐃᔭᑎ
ᐆᒻᒪᑎ ᑑᓚ/ᐊᓈᓇᓄᑦ ᐃᑲᔫᑎᒃᓴᑦ ᖃᕆᓴᐅᔭᒃᑯᑦ ᐊᔪᕈᓐᓃᖅᓴᐅᑎᒃᓴᓄᑦ ᐱᓕᖕᒪᒃᓴᐅᑎᒃᓴᓄᓪᓗ
ᑕᓯᐅᖅᑎᒌᑦ ᓴᓴᐃᔭᑎ ᑲᑐᔾᔨᖃᑎᖃᖅᑐᑎᒃ ᐆᒻᒪᑎ ᐊᓈᓇᓄᑦ ᐃᑲᔪᖅᑎᒃᓴᓄᑦ ᒪᓂᒪᑎᑦᓯᔪᖅ ᖃᕆᓴᐅᔭᒃᑯᑦ, ᑲᑎᙵᖏᓪᓗᑎᒃ ᐱᓕᖕᒪᒃᓴᐅᑎᒃᓴᓂᒃ ᐃᓄᓐᓄᑦ ᐃᖅᑲᓇᐃᔭᖅᑐᓄᑦ ᐅᕝᕙᓘᓐᓃᑦ ᐊᔪᕈᓐᓃᖅᓴᕈᒪᔪᓄᑦ ᐱᓕᕆᐊᒃᓴᒧᑦ ᐱᐊᕋᑦᓴᖃᕐᓂᕐᒧᑦ.
ᐆᒻᒪᑎ ᐃᓕᓐᓂᐊᕈᑎᒃᓴᖅ ᑐᕌᖓᔪᖅ ᒪᓂᒪᑎᑦᓯᓂᕐᒥᒃ ᑲᔪᓰᓐᓇᖅᑐᒥᒃ, ᐃᖢᐊᖅᓴᐃᔾᔪᑎᒃᑰᖏᑦᑐᖅ, ᐃᓕᖅᑯᓯᕐᒨᖓᔪᓂᒃ ᐸᖅᑭᑦᓯᓂᕐᒥᒃ ᐃᖅᑲᓇᐃᔮᖃᕐᓗᓂ ᐅᓄᖅᑐᑎᒍᑦ ᐃᓂᖅᑎᕆᔾᔪᓯᕐᓂᒃ ᐱᐊᕋᑦᓴᖃᕐᓂᕐᒧᑦ ᐱᓕᕆᖃᑎᒌᑦᑐᓂᒃ. ᑖᓐᓇ ᐱᓕᕆᐊᖑᔪᖅ ᐃᑳᕈᑕᐅᓂᐊᖅᑐᖅ ᐊᐳᖅᑕᕐᕕᐅᕙᑦᑐᓄᑦ ᒫᓐᓇ ᐊᐅᓚᑦᓯᒍᑕᐅᕙᑦᑐᓂ. ᐃᓚᒋᑦ ᐊᓂᖃᑦᑕᖅᑐᑦ ᑕᕝᕙᙵᑦ ᐃᓕᓐᓂᐊᕈᑎᒥᒃ ᐃᑲᔪᖅᓯᓯᒪᔭᐅᓂᖅᓴᐅᓪᓗᑎᒃ, ᖁᕕᐊᓱᓐᓂᖅᓴᐅᓕᖅᑐᑎᒃ ᐊᒻᒪᓗ ᖃᓄᐃᙱᑦᓯᐊᓂᖅᓴᐅᓪᓗᑎᒃ. ᐃᓕᓐᓂᐊᕈᑕᐅᔪᖅ ᐊᐅᓚᑕᐅᓂᐊᖅᑐᖅ ᑲᑐᔾᔨᖃᑎᒌᒍᑕᐅᓗᓂ ᓄᓇᓕᑦᑎᒍᑦ ᐃᑲᔫᑎᒃᓴᓂᒃ ᐃᓗᓕᖃᕐᓗᓂ ᐃᓕᖅᑯᓯᕐᒨᖓᓂᖅᓴᑦ ᐃᑲᔫᑏᑦ ᐊᑐᖅᑕᐅᔪᑦ.
ᑎᙵᓃᑦ ᐃᓕᓐᓂᐊᖃᑎᒌᓐᓂᕐᒧᑦ ᓯᕗᓕᖅᑕᐅᓂᐊᖅᑐᑦ ᐱᖅᑯᓯᒃᑯᑦ ᐃᓄᐃᑦ ᐃᕐᓂᓱᑦᓰᒍᓯᖏᓐᓂᒃ ᖃᐅᔨᒪᓂᕐᓂᒃ ᐸᐸᑦᓯᔪᓂᒃ ᐊᒻᒪᓗ ᐊᐅᓚᑦᓯᖃᑕᐅᓗᑎᒃ ᓇᓗᓇᐃᒃᑯᑕᖅᑖᖅᓯᒪᔪᑦ ᐃᕐᓂᓱᑦᓰᓂᕐᒧᑦ ᐊᒻᒪᓗ ᐃᕐᓂᓯᒪᓕᖅᑎᓪᓗᒋᑦ ᐊᑦᓱᕉᓐᓂᖓᒍᑕᐅᓲᓂᒃ.
ᐊᔪᙱᓐᓂᐅᒋᐊᓕᓐᓂ ᐃᓕᓴᐃᒍᑕᐅᓂᐊᖅᑐᓄᑦ ᐊᑐᖅᑕᐅᒍᓐᓇᖅᑐᑦ ᒪᓐᓇ ᐊᔪᙱᑐᕐᔪᐊᓂ ᐱᓕᕆᐊᓖᑦ ᐅᕝᕙᓘᓐᓃᑦ ᒪᓂᒪᑎᑕᐅᓗᑎᒃ ᐱᕕᒃᓴᖃᖅᑎᑕᐅᓂᕐᒧᑦ, ᐊᔪᙱᓐᓂᕆᔭᐅᒋᐊᓕᓐᓂᒃ ᓇᓗᖅᑯᑎᙱᓪᓗᑎᒃ ᑭᓇᑐᐃᓐᓇᕐᒧᑦ ᐃᖅᑲᓇᐃᔮᑦᓴᖅᑖᕈᒪᔪᒧᑦ ᓄᑖᒥᒃ ᐱᐊᕋᑦᓴᖃᕐᓂᕐᒨᖓᔪᒥᒃ.
ᑖᒃᑯᐊ ᐊᔪᙱᓐᓂᕆᔭᐅᒋᐊᓖᑦ ᐊᑑᑎᖃᕐᓂᐊᖅᑐᑦ ᐃᓄᓐᓄᑦ CPNP−ᒥ ᐃᖅᑲᓇᐃᔭᖅᑎᓄᑦ, ᒐᕙᒪᒃᑯᓐᓂ ᐃᖢᐊᖅᓴᐃᔨᓄᑦ, ᐋᓐᓂᐊᓯᐅᖅᑎᓄᑦ, ᐋᓐᓂᐊᕕᒻᒥ ᐃᖅᑲᓇᐃᔭᖅᑎᓄᑦ, ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕕᓐᓂ ᐃᖅᑲᓇᐃᔭᖅᑎᓄᑦ, ᐸᐃᕆᕕᓐᓂ, ᐃᓕᓐᓂᐊᕆᐅᖅᓴᔪᑦ ᐃᓕᓐᓂᐊᕐᕕᖏᓐᓂ, ᓇᓂᑐᐃᓐᓇᖅ ᒪᓂᒪᑎᑕᐅᔪᓂ ᐱᔨᑦᓯᕈᑎᓂᒃ ᓯᖓᐃᔪᓄᑦ ᐱᐊᕋᖅᑖᕋᑖᒥᓂᕐᓄᓪᓗ ᐃᓚᒌᓄᑦ. ᑖᓐᓇ ᐃᑲᔫᑎᒃᓴᖅ ᐃᓕᓴᐃᒍᑕᐅᓂᐊᖅᑐᖅ ᒪᑭᒪᒋᐊᕐᓂᕐᒥᒃ ᐊᒻᒪᓗ ᐃᑳᕈᓯᐅᕐᓂᕐᒥᒃ ᐊᐳᖅᑕᕈᑕᐅᕙᑦᑐᓂᒃ ᐅᓪᓗᒥᓯᐅᑎᑎᒍᑦ ᐊᒻᒪᓗ ᐱᖅᑯᓯᒃᑯᑦ ᐊᑐᖅᑕᐅᖃᑦᑕᓲᓂᒃ ᐸᖅᑭᑦᓯᓂᕐᒥᓪᓗ.
ᐃᓕᓴᐃᒍᑕᐅᖃᓯᐅᑎᓂᐊᖅᑐᑦ ᑐᑭᒧᐊᒍᑎᒃᓴᑦ ᐃᓚᒋᓄᑦ ᑕᒪᐃᓐᓂ ᕿᑐᕐᖓᑦᓴᖃᕐᓂᕐᒨᖓᔪᓂ ᐃᓚᒋᔭᐅᓗᑎᒃ ᕿᑐᕐᖏᓱᑐᐃᑦᑐᑦ, ᑎᒍᐊᕐᓂᖅ, ᐃᑲᔪᖅᑕᐅᒍᓐᓇᐃᓪᓕᓂᖅ, ᐅᐃᕆᓯᒪᓇᖅᑐᑦ, ᕿᑐᕐᖓᖅᑖᕋᑖᕐᓂᐅᑉ ᑭᖑᓂᐊᓂ ᐊᑦᓱᕉᓐᓂᖓᓇᖅᑐᑰᕐᓂᖅ, ᐃᓅᕋᑖᓂᒃ ᐸᖅᑭᑦᓯᓂᖅ, ᐊᒫᒪᑦᑎᑦᓯᓂᖅ, ᐋᓐᓂᐊᕐᕕᒻᒥ ᒪᓕᒋᐊᓖᑦ, ᐱᖅᑯᓯᒃᑯᑦ ᐃᓄᐃᑦ ᐃᕐᓂᓱᑦᓰᒍᓯᖏᓐᓂᒃ ᖃᐅᔨᒪᓃᑦ, ᐃᕐᓂᓱᓪᓗᓂ ᑎᒥᐅᑉ ᐋᖅᑭᑦᓯᒪᒋᐊᖃᕐᓂᖏᑦ, ᑐᓴᐅᒪᑎᑦᓯᓂᖅ ᐸᖅᑭᑦᓯᓂᕐᒥᒃ ᐊᒻᒪᓗ ᓇᖕᒥᓂᖅ−ᒪᑭᒋᐊᖅᓯᒪᓂᕐᒥᒃ, ᐱᐊᕋᓛᓂ ᐸᖅᑭᑦᓯᓂᖅ, ᖃᓄᐃᙱᓯᐊᕐᓂᖅ, ᖃᓄᐃᑦᑐᒃᑯᑦ ᖃᓄᐃᓕᖓᓕᕈᑕᐅᕙᑦᑐᑦ. ᐃᓕᓴᐃᓂᐊᖅᑐᒍᑦ ᐆᒻᒪᑎ ᐱᑦᓯᐊᕆᐊᖃᕐᓂᕐᒧᑦ ᐊᐅᓚᓂᕆᔭᐅᒋᐊᓖᑦ ᐊᒻᒪᓗ ᑐᕌᒐᖅ ᐱᖅᑯᓯᒃᑯᑦ ᐊᒻᒪᓗ ᖃᓄᖅ ᑲᔪᓯᑎᑕᐅᒍᓐᓇᕐᒪᖔᖅ ᒪᓕᓪᓗᒍᓗ.
ᐊᔾᔨᒌᙱᑦᑐᓂᒃ ᖃᐅᔨᒪᓂᐅᔪᑦ ᑎᑭᐅᑎᓯᒪᓂᐊᖅᑐᑦ ᐱᐊᕋᑦᓴᖅᑖᖃᑦᑕᕈᓐᓇᖅᓯᓂᕐᒥᒃ ᓯᕗᓪᓕᖅᐹᖏᓐᓄᑦ ᐊᕐᕌᒍᓄᑦ. ᑐᓴᖅᑎᑦᓯᒍᑏᑦ ᓱᖅᑯᐃᒪᔭᐅᔾᔪᑎᖃᕐᓂᐊᖅᑐᑦ ᐊᒻᒪᓗ ᑎᒍᓯᓂᕐᒥᒃ ᐃᓚᓕᐅᔾᔨᓯᒪᓂᕐᒥᓪᓗ ᐱᖕᒪᕆᐅᔪᓂᒃ ᖃᐅᔨᒪᓂᐅᔪᓂᒃ ᖃᐅᔨᒪᔨᑕᑦ ᑲᑎᒪᔨᕋᓛᖏᓐᓂᒃ ᐃᓐᓇᕐᓂᒃ ᐊᒻᒪᓗ ᓄᓇᕗᒻᒥ ᐱᓕᕆᐊᓕᓐᓂᒃ.
ᐃᓕᓴᐃᔾᔪᑏᑦ ᑖᒃᑯᓂᖓ ᐊᔪᙱᓐᓂᕆᔭᐅᒋᐊᓕᓐᓂᒃ ᖃᕆᓴᐅᔭᒃᑯᑦ ᐃᓄᓐᓄᑦ ᒪᓂᒪᑎᑦᓯᒍᑕᐅᓂᐊᖅᑐᑦ ᐱᕕᒃᓴᖃᖅᑎᑦᓯᒍᑕᐅᓗᑎᒃ ᐱᓕᖕᒪᒃᓴᐃᓂᕐᒧᑦ ᓄᓇᕗᒻᒥᐅᓂᒃ ᓄᓇᓕᓕᒫᓂ. ᑖᓐᓇ ᓴᖅᑭᕈᑕᐅᓂᐊᖅᑐᖅ ᐱᔾᔪᑎᒃᓴᓂᒃ ᐃᓚᒋᔭᐅᔪᑦ ᑲᓲᒪᖃᑎᒌᒍᑎᒃᓴᖏᓐᓂᒃ ᐃᖕᒥᓐᓄᑦ ᓄᓇᕗᓕᒫᒥ.
ᑐᑭᓯᒋᐊᒃᑲᓐᓂᕐᕕᒃᓴᖅ, ᐃᕐᖐᓐᓈᕈᑎᒃᑯᑦ ᑎᑎᕋᕐᕕᒋᓗᒍ ᑲᐃᑎ ᑕᓯᐅᖅᑎᒌᓂ,