ᒪᓕᒍᒥᓇᖅᑐᑦ ᓄᓇᕗᒻᒥ
ᒪᓕᒍᒥᓇᖅᑐᑦ ᓄᓇᕗᒻᒥ ᐃᓕᓐᓂᐊᑎᑦᓯᒍᑕᐅᔪᖅ ᒪᒃᑯᑦᑐᓂᒃ ᓄᓇᕗᓕᒫᒥ ᐃᓅᖃᑎᒌᓄᑦ ᓇᖕᒥᓂᖁᑎᖃᕐᓂᕐᒥᒃ, ᐱᖅᑯᓯᑐᖃᒃᑯᑦ ᓇᖕᒥᓂᖁᑎᖃᕐᓂᕐᒥᒃ ᐊᒻᒪᓗ ᐋᖅᑭᑦᓱᐃᔨᐅᓗᑎᒃ ᐊᑲᐅᓐᖏᓪᓕᐅᕈᑎᓂᒃ. ᐱᓂᐊᕐᓂᕋᐅᑎᕗᑦ ᑐᕌᒐᑦᑎᓐᓄᑦ ᑲᑐᔾᔨᖃᑎᒌᖑᓪᓗᑕ ᓴᕐᖓᑎᑦᓯᒋᐊᒃᑲᓐᓂᕈᑎᒃᓴᖏᓐᓂᒃ ᒪᒃᑯᑦᑐᑦ ᐊᑦᓱᕈᕐᓇᑐᒃᑰᓂᕐᒥᓂ ᐊᔪᐃᓐᓇᕆᐊᒃᑲᓐᓂᕈᓐᓇᖁᓪᓗᒋᑦ ᐱᔭᕆᐊᑐᔪᒃᑰᓕᕋᐃᒍᑎᒃ ᐃᓅᓯᕐᒥᓂ ᐅᖓᓯᑦᑐᒥᐅᑕᐅᓗᑎᒃ ᓄᓇᒥᓐᓂ ᓴᖅᑮᓂᒃᑯᑦ ᐃᓕᖅᑯᓯᕐᒨᖓᔪᓂᒃ ᐋᖅᑭᑦᓯᒪᐅᑎᒃᓴᓂᒃ ᐊᖅᑯᑎᖃᕐᓗᑎᒃ ᓇᖕᒥᓂᖁᑎᖃᕐᓂᒃᑯᑦ.
ᒪᓕᒍᒥᓇᖅᑐᑦ ᓄᓇᕗᒻᒥ ᐊᐅᓚᑦᓯᓂᐊᖅᑐᑦ ᐃᓕᓐᓂᐊᑎᑦᓯᒍᑎᒥᓂᒃ ᐊᑐᖅᑕᐅᕙᑦᑐᓂᒃ ᐊᑐᕐᓯᒪᔭᒥᒍᑦ ᐱᒋᐊᕐᓗᑎᒃ ᐊᐅᓚᑦᓯᓗᑎᓪᓗ ᓇᖕᒥᓂᖁᑎᖃᕐᓂᕐᒥᒃ ᐱᓕᒻᒪᒃᓴᐅᑎᑎᒍᑦ. ᐃᓚᒋᔭᐅᔪᑦ ᐃᖏᕐᕋᑎᑕᐅᕙᑦᑐᑦ ᑕᖅᑭᓂᒃ ᐊᕐᕕᓂᓕᓐᓂᒃ ᐅᖑᒪᑦᓯᔾᔪᑎᓄᑦ ᐃᓕᑉᐸᓪᓕᐊᑎᓪᓗᒋᑦ ᐃᓯᕐᓂᖅ ᐊᓂᓂᕐᓗ ᓇᖕᒥᓂᖁᑎᖃᕐᓂᕐᒥᒃ ᐊᒻᒪᓗ ᑐᓐᖓᕕᒋᔭᐅᕙᑦᑐᑦ ᐊᐅᓚᑦᓯᓂᕐᒥᒃ ᓇᖕᒥᓂᖁᑎᖃᕐᓂᕐᒥᒃ ᓄᓇᒥᓐᓂ. ᐃᓕᓐᓂᐊᕈᑎᒃᓴᓕᐊᕆᓯᒪᔭᕗᑦ ᐃᓚᓕᐅᔾᔨᓯᒪᔪᖅ ᐃᓄᐃᑦ ᐃᓕᖅᑯᓯᖓᓂᒃ ᐱᖕᒪᕆᐅᔪᖁᑎᖏᓐᓂᓪᓗ ᐊᒻᒪᓗ ᐋᖅᑭᑦᑕᐅᓯᒪᓪᓗᓂ ᐃᓅᓯᖅ−ᐃᓕᖅᑯᓯᕐᓗ ᐊᒻᒪᓗ ᒪᑭᒪᔾᔪᑎᒃᓴᓂᒃ ᐋᖅᑭᑦᓯᒪᓂᖏᑎᒍᑦ ᐅᖓᓯᑦᑐᒥ ᓄᓇᒋᔭᒥᓂ. ᐃᓚᒋᔭᐅᔪᑦ ᐃᑲᔪᖅᑕᐅᓪᓗᑎᒃ ᐃᓕᓴᐃᔨᓄᑦ, ᓇᖕᒥᓂᖅ ᑲᒪᔨᖃᖅᑐᑎᒃ ᐃᓕᓐᓂᐊᑎᑦᓯᒋᐊᒃᑲᓂᕐᓂᐊᖅᑐᒥᒃ, ᓄᓇᓕᓐᓂ ᑲᑐᔾᔨᖃᑎᒌᓂᒃ, ᐊᒻᒪᓗ ᐃᓕᓐᓂᐊᕈᑎᒃᓴᓂᒃ ᐋᖅᑭᑦᓯᒪᔭᐅᔪᓂᒃ ᐱᓇᓱᐊᖃᑕᐅᓪᓗᑎᒃ ᓯᓚᑖᓃᓐᖔᖅᑐᓂᒃ ᐃᓚᒋᔭᐅᔪᓂᒃ. ᐃᓱᐊᓂ ᐃᓕᓐᓂᐊᖅᑕᖓᑕ, ᐃᓚᒋᔭᐅᔪᑦ ᓇᓕᑐᐃᓐᓇᖓᓂᒃ ᐊᐅᓚᑦᓯᓗᑎᓪᓘᓐᓃᑦ ᐃᓅᖃᑎᒌᓄᑦ ᓇᖕᒥᓂᖁᑎᒋᔭᐅᔪᒥᒃ ᐅᑉᕙᓘᓐᓃᑦ ᓇᖕᒥᓂᖁᑎᖃᕐᓂᕐᒥᒃ ᓴᖅᑭᓚᐅᖅᑕᒥᓂᒃ ᐃᓕᓐᓂᐊᖅᑕᒥᒍᑦ, ᐃᖅᑲᓇᐃᔮᑦᓴᓂᑦᑐᑎᒃ ᐅᑉᕙᓘᓐᓃᑦ ᐃᓕᓐᓂᐊᕆᐊᒃᑲᓂᖅᑐᑎᒃ.
ᐊᑕᖏᖅᑐᒥᒃ ᐃᓐᓇᐃᑦ ᐃᓕᓐᓂᐊᕈᑎᖏᑦ − ᐋᖅᑭᑦᓯᒪᔭᑦᑎᒍᑦ ᐊᑐᓪᓗᐊᑕᖅᑕᕗᑦ ᓴᕐᖓᑎᑦᓯᒋᐊᒃᑲᓐᓂᕈᑎᒃᓴᓂᒃ ᐃᓄᓐᓄᑦ ᓴᖅᑮᓂᕐᒥᒃ ᓄᑖᓂᒃ ᒪᑭᒪᔾᔪᑎᒃᓴᓂᒃ ᐋᖅᑭᑦᓯᒪᒍᑎᒃᓴᓂᒃ ᓄᓇᒥᓐᓂ, ᐊᑕᖏᖅᑐᓂᒃ ᐱᖁᑎᕐᔪᐊᑕᖃᕆᐊᓕᒃ ᐃᑲᔫᑎᒃᓴᒥᒃ ᑲᓱᕈᑎᒃᓴᒥᒃ ᐅᓄᖅᑐᓄᑦ ᐊᐳᖅᑕᕐᕕᐅᕙᑦᑐᓄᑦ ᓵᓐᖓᔭᕆᐊᖃᖃᑦᑕᖅᑕᒥᓐᓄᑦ ᐊᔪᕐᓇᖏᓐᓂᓕᒫᖓᒍᑦ. ᐊᒻᒪᓗ ᐊᔭᐅᖅᑐᐃᓂᖅ ᑐᓐᖓᕕᖃᕆᐊᓕᒃ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪᓗ ᓄᓇᓖᑦ ᐱᖕᒪᕆᐅᔪᖁᑎᖏᓐᓂᒃ.
ᒪᓕᒍᒥᓇᖅᑐᑦ ᓄᓇᕗᒻᒥ ᐊᑕᖐᔪᒥᒃ ᐊᐅᓚᑦᓯᓂᐅᔪᖅ ᓇᖕᒥᓂᖁᑎᖃᕐᓂᕐᒥᒃ ᐱᓕᖕᒪᒃᓴᐅᑎᓂᒃ. ᐱᒋᐊᕐᓂᖓᓂᒃ, ᐃᓕᓐᓂᐊᕈᑎᒃᓴᖅ ᐋᖅᑭᓱᖅᑕᐅᓚᐅᖅᑐᖅ ᐃᓄᐃᑦ ᐃᓕᖅᑯᓯᖓ ᐱᖕᒪᕆᐅᔪᖁᑎᖏᓪᓗ ᐃᓚᓕᐅᔾᔭᐅᖁᓪᓗᒋᑦ ᐊᐅᓚᑦᓯᒍᑎᓪᓗᐊᑕᐅᔪᓄᑦ, ᐃᓕᓴᐃᓂᕐᒥᒃ ᐃᓚᒋᔭᐅᔪᓂᒃ ᖃᓄᖅ ᐅᐱᒍᓱᓐᓂᒃᑯᑦ ᐱᕚᓪᓕᕈᑎᒃᓴᓂᓪᓗ ᐃᓄᐃᑦ ᐃᓕᖅᑯᓯᕐᒥᒍᑦ ᐱᖕᒪᕆᐅᔪᖁᑎᖏᓐᓂᒃ ᐱᓇᓱᐊᒐᕐᒥᒍᑦ ᑮᓇᐅᔭᓕᐅᕋᓱᐊᕈᑎᒃᑯᑦ. ᑕᒪᓐᓇ ᐊᓯᖅᑯᑉᕕᖃᓐᖏᑦᑐᖅ ᐊᑐᖅᑕᐅᒋᐊᖃᕐᓂᖓ ᑲᔪᓯᔪᓐᓇᕈᑎᒃᓴᖅ ᒪᓕᒍᒥᓇᖅᑐᑦ ᓄᓇᕗᒻᒥ ᐱᓕᕆᐊᕆᔭᒥᓄᑦ. ᒪᑭᒋᐊᒃᑲᓐᓂᕈᑎᒃᓴᒥᓄᑦ ᑲᑎᓯᖃᑦᑕᓂᒃᑯᑦ ᓇᖕᒥᓂᖁᑎᓕᓐᓂᒃ, ᐱᖃᓐᓇᕆᔭᒥᓂᒃ ᐃᓚᒥᓂᓪᓗ, ᓄᓇᒥᖕᓄᑦ ᐊᒻᒪᓗ ᓂᐅᕕᑐᐃᓐᓇᕆᐊᓕᓐᓄᑦ.
ᓯᕗᒧᐊᒃᐸᓪᓕᐊᓂᖅ ᐃᓕᓐᓂᐊᕈᑎᒃᓴᖅ ᑲᓲᒪᔪᖅ ᐃᖅᑲᓇᐃᔮᒃᓴᓄᑦ − ᒪᓕᒍᒥᓇᖅᑐᑦ ᓄᓇᕗᒻᒥ ᑐᓐᖓᕕᖓ ᓴᖅᑭᕈᒪᔭᒥᓂᒃ ᐃᓚᒋᔭᐅᔪᑦ ᓇᖕᒥᓂᕐᓱᕐᓗᑎᒃ−ᐃᖅᑲᓇᐃᔮᖃᓕᕐᓗᑎᒃ ᐊᒻᒪᓗ ᓴᖅᑮᓂᕐᒥᒃ ᐃᖅᑲᓇᐃᔮᒃᓴᓂᒃ ᐊᓯᖏᓐᓄᑦ. ᒪᕐᕈᑲᓐᓃᒃ ᓴᖅᑭᖅᑕᐅᔪᒪᔫᒃ ᐃᓚᒋᔭᐅᔪᑦ ᑎᒍᓯᔪᓐᓇᖁᓪᓗᒋᑦ ᐃᓕᓐᓂᐊᑲᓐᓂᕈᑎᒃᓴᓂᒃ ᐅᑉᕙᓘᓐᓃᑦ ᐃᖅᑲᓇᐃᔮᑦᓴᒥᒃ ᓇᑉᕚᕐᓗᑎᒃ.
ᐃᓕᓐᓂᐊᕈᑏᑦ ᐊᒻᒪᓗ ᑲᑐᔾᔨᖃᑎᒌᑎᒍᑦ ᐱᕙᓪᓕᐊᔾᔪᑎᒃᓴᑦ ᐱᕚᓪᓕᕈᑎᒃᓴᓄᑦ ᐊᑐᕐᓂᕐᒥᒃ ᐃᓄᒃᑎᑐᑦ ᐱᓕᕆᕕᖕᓂ− ᒪᓕᒍᒥᓇᖅᑐᑦ ᓄᓇᕗᒻᒥ ᑐᓐᖓᕕᓖᑦ ᐅᑉᐱᕈᓱᓐᓂᕐᒥᒃ ᐱᖕᒪᕆᐅᓂᖓᓂᒃ ᐊᑐᖅᑕᐅᒋᐊᒃᑲᓂᖅᑎᑦᓯᓂᕐᒥᒃ ᐃᓄᒃᑎᑐᑦ ᓇᖕᒥᓂᖁᑎᓕᓐᓂ ᐊᒻᒪᓗ ᐃᖅᑲᓇᐃᔭᕐᕕᓐᓂ. ᐱᒋᐊᕈᑎᖃᓚᐅᖅᑐᑦ ᑲᑐᔾᔨᖃᑎᒌᑦ ᑭᓱᖃᓗᐊᕋᑎᒃ ᐊᑐᕋᑦᓴᓂᒃ, ᐃᓄᒃᑎᑑᓕᖅᑕᐅᑎᑦᓯᒍᓐᓇᕋᑎᒃ. ᑭᓯᐊᓂᓕ, ᑮᓇᐅᔭᓖᓂᖏᑎᒍᑦ ᒪᑭᒋᐊᖅᑕ, ᑮᓇᐅᔭᓂᒃ ᓂᕆᐅᒋᔭᖃᕈᒪᔪᒍᑦ ᐃᓄᒃᑎᑑᓕᖅᑕᐅᒍᑎᒃᓴᖏᓐᓂᒃ ᐃᓕᓐᓂᐊᕈᑎᒃᓴᖁᑎᑦᑎᓐᓄᑦ, ᐋᖅᑭᓱᖅᑕᐅᓗᑎᒃ ᒪᕐᕉᓐᓂᒃ ᐅᖃᐅᓰᓐᓂᒃ ᐊᑐᕐᓗᓂ ᐃᓕᓴᐃᒍᑎᒃᓴᓂᒃ ᐊᐅᓚᔫᓕᐅᒐᕐᓂᒃ ᐊᒻᒪᓗ ᐃᖅᑲᓇᐃᔭᖅᑎᑦᓯᓂᕐᒥᒃ ᐃᓄᒃᑎᑑᕈᓐᓇᑦᓯᐊᖅᑐᒥᒃ − ᐊᐅᓚᑦᓯᔨᖏᓐᓄᑦ ᐱᓕᕆᖃᑎᒌᑦ, ᐊᐅᓚᑦᓯᔩᑦ, ᐃᓕᓴᐃᒋᐊᒃᑲᓂᖅᑏᑦ ᐊᒻᒪᓗ ᐃᓕᓴᐃᔩᑦ.
ᐃᖅᑲᓇᐃᔮᒻᒪᕆᒻᒥᒃ ᐃᓕᓐᓂᐊᖅᑎᑕᐅᒋᐊᒃᑲᓐᓂᕈᑏᑦ − ᐃᖅᑲᓇᐃᔮᒻᒪᕆᒻᒥᒃ ᐃᓕᓐᓂᐊᑎᑦᑕᐅᒋᐊᒃᑲᓐᓂᕈᑏᑦ ᐃᓚᓕᐅᔾᔭᐅᓯᒪᔪᑦ ᒪᓕᒍᒥᓇᖅᑐᑦ ᓄᓇᕗᒻᒥ ᐊᐅᓚᑕᖏᓐᓄᑦ. ᑕᒪᕐᒥᒃ ᒪᓕᒍᒥᓇᖅᑐᑦ ᓄᓇᕗᒻᒥ ᐃᓚᒋᔭᐅᔪᑦ ᐃᓕᓐᓂᐊᖅᑎᑕᐅᒋᐊᒃᑲᓐᓂᓚᐅᖅᑐᑦ ᓄᓇᕗᒻᒥᐅᓂᒃ ᓇᖕᒥᓂᖁᑎᓕᓐᓂᒃ ᐃᓚᒋᔭᐅᔪᖅ ᐃᓄᐃᑦ ᓄᓇᕗᓕᒫᒥ ᐃᓕᓐᓂᐊᑎᑦᓯᒋᐊᒃᑲᓐᓂᕐᓂᕐᒧᑦ ᐊᖅᑯᑎᒋᔭᐅᕙᑦᑐᓂᒃ. ᐃᑲᓇᐃᔮᒃᓴᒧᑦ ᐃᓕᓐᓂᐊᑎᑦᓯᒋᐊᒃᑲᓐᓂᕈᑕᐅᕙᒻᒥᔪᖅ ᐃᓚᒋᔭᐅᔪᓄᑦ ᑲᔪᓯᒋᐊᒃᑲᓐᓂᕈᒪᔪᓄᑦ ᓇᖕᒥᓂᖁᑎᖃᕐᓂᕐᒥᒃ ᑮᓇᐅᔭᓕᐅᕈᑎᒃᓴᒧᑦ. ᐃᑲᔪᖃᑦᑕᖅᑕᕗᑦ ᐃᖅᑲᓇᐃᔮᑦᓴᕐᓯᐅᑎᓪᓗᒋᑦ ᐅᑉᕙᓘᓐᓃᑦ ᐃᓕᓐᓂᐊᕆᐊᒃᑲᓐᓂᕋᓱᐊᖅᑎᓪᓗᒋᑦ.
- ᐃᑲᔫᑎᒃᓴᑦ ᐋᖅᑭᓱᖅᑕᐅᓂᐊᖅᑐᑦ ᐋᖅᑭᒋᐊᖅᑕᐅᓂᐊᖅᑐᓪᓘᓐᓃᑦ:
- ᐃᓕᓐᓂᐊᕈᑎᒃᓴᑦ ᐃᓄᒃᑎᑑᓕᖅᑕᐅᓂᖏᑦ ᐊᒻᒪᓗ ᐱᒋᐊᒃᑲᓂᖅᑕᐅᓂᖏᑦ
ᐃᓄᒃᑎᑑᓕᖅᑕᐅᓗᑎᒃ ᐃᓕᓴᐃᒍᑎᒃᓴᑦ ᐊᑐᐃᓐᓇᐅᔪᑦ. ᑖᓐᓇ ᒪᓕᒍᒥᓇᖅᑐᑦ ᓄᓇᕗᒻᒥ ᐃᓄᒃᑎᑑᓲᓂᒃ ᐊᐅᓚᑦᓯᔨᓂᒃ ᐃᖅᑲᓇᐃᔭᖅᑎᑖᒃᑲᓐᓂᕈᑎᒋᒋᐊᖃᕐᓂᐊᖅᑕᖓ, ᐃᓕᓐᓂᐊᑎᑦᓯᒋᐊᒃᑲᓂᖅᑎᓂᒃ ᐃᓕᓴᐃᔨᓂᓪᓗ. ᒪᓕᒍᒥᓇᖅᑐᑦ ᓄᓇᕗᒻᒥ ᐃᓕᓐᓂᐊᕈᑎᒃᓴᓕᐅᖏᓐᓇᖅᑐᑦ ᐊᒻᒪᓗ ᐱᐅᓯᕙᓪᓕᐊᑐᐃᓐᓇᓂᐊᖅᑐᖅ ᐊᒻᒪᓗ ᐃᓕᓐᓂᐊᕈᑎᒃᓴᖏᓐᓄᑦ ᐃᓚᓕᐅᔾᔭᐅᓗᑎᒃ, ᐊᑐᕋᑦᓴᓕᐊᖑᓯᒪᔪᓄᑦ ᐊᑐᕋᑦᓴᓄᓪᓗ.
- ᓇᖕᒥᓂᖁᑎᖃᕐᓂᕐᒥᒃ ᐃᓕᓐᓂᐊᑎᑦᓯᒋᐊᒃᑲᓂᕐᓂᕐᒧᑦ ᐊᖅᑯᑕᐅᕙᑦᑐᑦ
ᒪᓕᒍᒥᓇᖅᑐᑦ ᓄᓇᕗᒻᒥ ᐋᖅᑭᑦᓱᐃᔪᑦ ᐊᖅᑯᑎᒃᓴᓂᒃ ᓴᖕᒥᓂᖁᑎᓕᓐᓂᒃ ᐃᓕᓴᐃᒋᐊᒃᑲᓂᖅᑎᒃᓴᓂᒃ ᓄᓇᕗᓕᒫᒥ. ᑖᓐᓇ ᐊᖅᑯᑎᒃᓴᖅ ᒪᕐᕉᓐᓂᒃ (2) ᐊᐅᓚᓂᖃᓪᓗᐊᑕᕐᓂᐊᖅᑐᖅ:
- ᐃᓕᓴᐃᒋᐊᒃᑲᓂᖅᑎ, ᐃᑲᔪᖅᑎ ᐊᒻᒪᓗ ᐃᑲᔫᑎᒃᓴᓂᒃ ᐋᖅᑭᑦᓯᒪᐅᑎᒃᓴᖏᓐᓂᒃ ᓇᖕᒥᓂᖁᑎᓖᑦ ᓄᓇᕗᒻᒥ ᓯᕗᓂᑦᑎᓐᓂ;
- ᐋᖅᑭᑦᓯᒪᐅᑎᒃᓴᓂᒃ ᐊᐅᓚᔾᔪᑕᐅᔪᓄᑦ ᓇᖕᒥᓂᖁᑎᓕᓐᓄᑦ ᓄᓇᕗᒻᒥ ᓄᓇᓕᓐᓄᑦ, ᑐᕌᒐᖃᕐᓂᐊᖅᑐᖅ ᐱᕈᕐᐸᓪᓕᐊᓂᕐᒥᒃ ᓱᑲᓐᓂᕐᓴᐅᔪᒥᓪᓗ ᓇᖕᒥᓂᖁᑎᑖᕐᐸᓪᓕᐊᒍᓐᓇᓂᕐᒥᒃ ᐊᒻᒪᓗ ᑲᔪᓯᓂᕐᒥᒃ ᓄᓇᑦᑎᓐᓂ.
ᓴᖅᑮᓂᒃᑯᑦ ᑖᑦᓱᒥᖓ ᖃᕆᓴᐅᔭᒃᑯᑦ, ᐱᕚᓪᓕᕈᑕᐅᓂᐊᖅᑐᖅ ᓇᖕᒥᓂᖁᑎᓖᑦ ᐋᖅᑭᑦᓯᒪᓂᖓᓄᑦ ᐱᖁᑎᕐᔪᐊᓄᓪᓗ ᓄᓇᕗᒻᒥ. ᐃᓚᒋᔭᐅᔪᓄᑦ ᐃᑲᔫᑎᖃᕐᓂᐊᖅᑐᖅ ᐅᑯᑎᒎᓇ:
- ᒥᓇᕋᐅᑎᓂᒃᑯᑦ ᖃᐅᔨᒪᓂᕆᔭᒥᓂᒃ ᐊᑐᕋᑦᓴᓂᓪᓗ;
- ᑲᓱᕐᓯᒪᓂᖅ ᓇᖕᒥᓂᖁᑎᖃᕐᕕᒃᓴᐅᓇᔭᖅᑐᓂᒃ;
- ᑲᓱᕐᓯᒪᓂᖅ ᓴᓇᕕᔾᔪᐊᓄᑦ ᖃᐅᔨᒪᔪᕐᔪᐊᓂᒃ;
- ᐃᑲᔪᕐᓂᖅ ᐋᖅᑭᐅᒪᒍᑎᒃᓴᖓᓂᒃ ᓇᖕᒥᓂᖁᑎᖃᕐᓂᕐᒧᑦ ᐊᑐᐊᒐᕐᓂᒃ ᖃᐅᔨᓴᕈᑕᐅᓯᒪᔪᓂᒃ ᓄᐊᑦᓯᓂᒃᑯᑦ ᐊᒻᒪᓗ ᐋᖅᑭᑦᓯᒪᔪᓂᒃ ᐊᔭᐅᖅᑎᓂᒃ;
- ᑎᒍᓯᕙᓪᓕᐊᓂᖅ ᐃᑲᔫᑎᒃᓴᖏᓐᓂᒃ ᐃᑲᔪᕐᓯᒍᑎᒃᓴᖏᓐᓂᓪᓗ ᓇᖕᒥᓂᖁᑎᓖᑦ ᓄᓇᕗᓕᒫᒥ.
- ᐊᑭᓕᖅᓱᖅᑕᐅᓗᑎᒃ ᐱᕕᒃᓴᖃᖅᑎᑕᐅᓂᖏᑦ EMN ᐃᓕᓐᓂᐊᑎᑦᓯᒋᐊᒃᑲᓂᖅᑏᑦ
ᑕᒪᕐᒥᒃ EMN−ᑯᑦ ᐃᓚᒋᔭᐅᔪᖁᑎᖏᑦ ᐊᑐᕆᐊᖃᖅᑎᑕᐅᓂᐊᖅᑐᑦ ᐃᓕᓴᐃᒋᐊᒃᑲᓂᕐᓂᕐᒥᒃ ᐊᑕᐅᓯᕐᒥᓘᓐᓃᑦ (1) ᐃᓕᓴᕆᐊᓕᖕᒥᒃ ᓯᕗᓪᓕᕐᐹᖓᓂ ᐊᕐᕌᒍᒥ. ᑖᓐᓇ ᐊᑭᓕᕐᓱᖅᑕᐅᓗᓂ ᐱᓕᕆᐊᖅ ᑐᓂᓯᒪᓂᒃᑯᑦ ᐊᖏᕐᓯᒪᑦᓯᐊᖅᑐᒧᑦ ᒪᕐᕉᓐᓂᒃ ᐃᑲᕐᕌᓐᓂᒃ/ᐱᓇᓱᐊᕈᓯᕐᒥᒃ 16-ᓄᑦ ᐱᓇᓱᐊᕈᓯᕐᓄᑦ ᑎᑭᓯᒪᔪᓂᒃ (32 ᐃᑲᕐᕋᑦ). EMN−ᑯᓐᓄᑦ ᐃᓚᒋᔭᐅᔪᑦ ᐱᕕᒃᓴᖃᖅᑎᑕᐅᓂᐊᕐᒥᔪᑦ ᐊᐅᓪᓚᖃᑦᑕᓂᕐᒥᒃ ᒪᓕᒍᒥᓇᖅᑐᑦ ᓄᓇᕗᒻᒥ ᓄᓇᓕᖁᑎᖏᓐᓄᑦ ᐊᐅᓚᑦᓯᒋᐊᖅᑐᕐᓗᑎᒃ ᐃᓕᓐᓂᐊᕈᑎᒃᓴᓂᒃ ᐃᓚᖃᕐᓗᓂ ᐊᓯᖏᓐᓂᒃ ᒪᓕᒍᒥᓇᖅᑐᑦ ᓄᓇᕗᒻᒥ ᐃᓕᓴᐃᔨᒥᒃ.
ᑭᖑᓪᓕᕐᐹᒥ, ᐱᕕᒃᓴᖃᑐᐃᓐᓇᕆᐊᓖᒃ ᑲᑎᑦᓯᓂᕐᒥᒃ ᒪᓕᒍᒥᓇᖅᑐᑦ ᓄᓇᕗᒻᒥ ᒪᑐᐃᖓᑎᑕᐅᔪᒥᒃ−ᐃᑲᔫᑎᒃᓴᒥᒃ ᐃᓕᓐᓂᐊᕈᑎᒃᓴᓕᐅᕐᓂᕐᒥᒃ ᐊᖅᑭᑦᓱᐃᓗᑎᒃ ᐃᓕᓐᓂᐊᓂᕐᒥᒃ ᐊᒻᒪᓗ/ᐅᑉᕙᓘᓐᓃᑦ ᐊᐅᓚᑦᓯᓗᑎᒃ ᑲᑎᓐᖓᓂᕐᔪᐊᓂᒃ ᑲᑐᔾᔨᖃᑎᒌᑦᑐᓄᑦ ᐃᓕᓐᓂᐊᖅᑐᓄᑦ.
- ᓄᓇᕗᒻᒥ ᓇᖕᒥᓂᖁᑎᖃᕐᓂᕐᒥᒃ ᐊᐅᓚᔫᓕᐅᒐᑦ
ᒪᓕᒍᒥᓇᖅᑐᑦ ᓄᓇᕗᒻᒥ ᑲᔪᓯᔪᒪᔪᑦ ᐊᖏᓪᓕᒋᐊᕐᓗᒍ ᒪᕐᕉᓕᕇᖅᑑᓐᓄᑦ ᐊᕐᕌᒎᓐᓄᑦ ᐊᐅᓚᔫᓕᐅᕐᓯᒪᔭᒥᓂᒃ. ᐊᐅᓚᔫᓕᐅᒐᑦ ᐋᖅᑭᓱᖅᑕᐅᓂᐊᖅᑐᑦ ᐱᖓᓱᓂᒃ ᐊᕐᕌᒍᓂᒃ. ᐊᐅᓚᔫᓕᐅᒐᑦ ᒪᑐᐃᖓᓂᐊᖅᑐᑦ ᐊᑐᖅᑕᐅᒍᒪᒍᑎᒃ ᐊᑐᕋᑦᓴᒫᑦ ᐊᒻᒪᓗ ᐊᑐᐃᓐᓇᔪᑦ ᑭᓇᑐᐃᓐᓇᕐᒧᑦ ᑕᑯᓐᓇᖅᑕᐅᒍᒪᒍᑎᒃ. ᐊᐅᓚᔫᓕᐅᒐᑦ ᐅᖃᐅᓰᓐᓂᒃ ᒪᕐᕉᓐᓂᒃ ᐊᑐᕐᓂᐊᖅᑐᑦ, ᐃᓚᓕᐅᔾᔭᐅᓯᒪᓗᑎᒃ ᐃᓄᒃᑎᑑᖅᑐᑦ ᖃᓪᓗᓈᑎᑐᓪᓘᓐᓃᑦ ᑎᑎᕋᕐᓯᒪᔪᑦ ᐊᐅᓚᔫᓕᐅᒐᕐᒥ. ᑐᕌᒐᖓ ᐊᐅᓚᔫᓕᐅᒐᕐᓄᑦ ᐊᔾᔨᒌᓐᖏᑦᑐᓂᒃ ᐅᐊᕈᑕᒌᓂᒃ ᐃᓕᓐᓂᐊᑎᑦᓯᒍᑎᒃᓴᖅᑕᖃᖁᓪᓗᒍ ᐊᐅᓚᔫᓕᐅᒐᕐᓂᒃ ᐊᒻᒪᓗ ᐃᓕᓐᓂᐊᕈᑎᒃᓴᓂᒃ.
- ᓇᖕᒥᓂᖁᑎᓖᑦ ᖃᐅᔨᒪᔨᑕᑦ ᑲᑎᒪᔨᖏᑦ
ᓄᓇᕗᒻᒦᖔᖅᑐᑦ ᖃᐅᔨᒪᔨᑕᑦ ᑲᑎᒪᔨᖏᑦ ᓴᖅᑭᖅᑕᐅᓂᐊᖅᑐᑦ ᑎᓕᔭᐅᓯᒪᓗᑎᒃ ᓴᖅᑭᖃᑕᐅᖁᓗᒋᑦ ᐊᒻᒪᓗ ᐊᔭᐅᖅᑎᐅᓗᑎᒃ ᓄᓇᕗᓄᒻᒥ ᐊᐅᓚᑕᐅᔪᓂᒃ ᐊᖏᓪᓕᕙᓪᓕᐊᒍᑎᒃᓴᓂᓪᓗ. ᑕᒪᓐᓇ ᐃᑲᔫᑎᖃᕐᓂᐊᖅᑐᖅ ᒪᓕᒍᒥᓇᖅᑐᑦ ᓄᓇᕗᒻᒥ ᐊᖅᑭᑦᓱᐃᑎᓪᓗᒋᑦ ᑐᑭᒧᐊᒍᑎᒃᓴᓂᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ, ᐃᑲᔪᕐᓗᓂ ᑐᑭᒧᐊᒍᑎᒃᓴᓂᒃ ᐊᐅᓚᑕᐅᓂᖏᓐᓄᑦ ᐊᒻᒪᓗ ᐋᖅᑭᓱᖅᑕᐅᓂᖓᓂ ᐱᓕᕆᐊᒃᓴᖅ, ᐋᖅᑭᑦᓱᐃᓗᑎᒃ ᓄᑖᓂᒃ ᐱᓇᓱᐊᒐᑦᓴᓂᒃ, ᐃᑲᔫᑎᓂᒃ ᑲᓱᕈᑎᒃᓴᖏᓐᓂᒃ ᐃᑲᔫᑎᒃᓴᓂᓪᓗ ᒪᒃᑯᑦᑐᑦ ᑕᑉᕘᓇᖅᑎᓪᓗᒋᑦ ᐱᓕᕆᐊᒃᑯᑦ.
ᖃᐅᔨᒋᐊᕐᕕᒃᓴᖅ:
ᐋᔾᒪᐅᓪ ᓴᑖ
ᐃᕐᖐᓐᓈᕈᑖ: ajmal@inspirenunavut.com
ᐅᖄᓚᐅᑖ: 613-219-7890