ᐃᓄᐃᑦ ᑎᒥᐅᔪᑦ ᑲᑐᔾᔨᖃᑎᒌᑉᐳᑦ ᓴᓇᔨᐅᓂᕐᒥᒃ ᐃᓕᓐᓂᐊᑎᑦᑎᖁᔨᓪᓗᑎᒃ ᐃᖅᑲᓇᐃᔭᖁᔨᓪᓗᑎᓪᓗ ᖁᑦᑎᑦᑐᒥᐅᓂᑦ
ᒫᑦᓯ 14, 2022 – ᐃᖃᓗᐃᑦ, ᓄᓇᕗᑦ – ᑮᓇᐅᔭᑎᒍᑦ ᐃᑲᔪᖅᑕᐅᓪᓗᑎᒃ ᑲᑭᕙᒃ ᑲᑐᔾᔨᖃᑎᒌᒃᑯᓐᓂᑦ ᐊᒻᒪᓗ ᒪᑭᒋᐊᖅᑕ ᐃᓄᐃᑦ ᐃᓕᓴᕈᑎᔅᓴᖏᓐᓄᑦ ᑯᐊᐳᕇᓴᒃᑯᓐᓂᑦ, ᓄᓇᕗᒥ ᐃᓪᓗᓕᐅᖅᑏᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ ᓴᓇᔨᐅᓂᕐᒥᒃ ᐃᓕᓐᓂᐊᑎᑦᑎᓛᖅᑐᑦ ᐊᒻᒪᓗ ᐃᖅᑲᓇᐃᔭᖅᑎᑦᑎᓛᖅᑐᑦ 60ᓂᑦ ᐃᓄᓐᓂᑦ ᐃᓕᓐᓂᐊᓛᖅᑐᓂᑦ ᐅᑯᓇᓂ ᓄᓇᓕᓐᓂᑦ ᑲᖏᖅᑐᒑᐱᒃ, ᒥᑦᑎᒪᑕᓕᒃ, ᐃᒃᐱᐊᕐᔪᒃ, ᖃᐅᓱᐃᑦᑐᖅ ᐊᒻᒪ ᐊᐅᓱᐃᑦᑐᖅ. ᓄᓇᕗᒥ ᐃᓪᓗᓕᐅᖅᑏᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ ᐃᑲᔪᖅᑕᐅᓛᖅᑐᑦ ᑲᑐᔾᔨᖃᑎᖏᓐᓄᑦ, ᐅᑯᐊ ᐃᓚᒋᔭᐅᓪᓗᑎᒃ ᕿᑭᖅᑖᓗᒃ ᓇᖕᒥᓂᖁᑎᓕᓐᓄᑦ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᒃᑯᑦ ᐊᒻᒪᓗ ᕿᑭᖅᑕᓂ ᓴᓇᕕᓕᕆᓂᕐᒧᑦ ᑎᒥᖁᑖ.
ᐃᖅᑲᓇᐃᔭᖅᑎᑦᑎᓛᕐᖓᑕ ᓴᓇᑎᓪᓗᒋᑦ ᓄᓇᓕᓐᓂᑦ ᐊᐅᓚᔾᔪᑎᔅᓴᓂᑦ ᐱᓕᕆᐊᖑᓛᖅᑐᓂᑦ ᑮᓇᐅᔭᖃᖅᑎᑕᐅᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ (QIA) ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒧᑦ ᐊᒻᒪᓗ ᑐᕙᐃᔪᐃᑦᑐᖅ ᐊᐅᓚᔾᔪᑎᔅᓴᓄᑦ ᐊᖏᖃᑎᒌᒍᑎᑎᒍᑦ. ᐃᓕᓐᓂᐊᑎᑦᑎᓛᖅᑐᑦ ᖁᓕᓂᑦ (10) ᐱᓇᓱᐊᕈᓯᕐᓂᑦ ᑕᒪᒃᑮᓐᓂᒃ ᐃᓕᓴᕕᒻᒥ ᐃᓕᓐᓂᐊᑎᑦᑎᖃᑦᑕᕐᓗᑎᒃ ᐊᒻᒪᓗ ᓴᓇᔪᓂᑦ ᓴᓇᖃᐅᑕᐅᓗᑎᒃ ᐃᓕᓐᓂᐊᖃᑦᑕᕐᓗᑎᒃ ᑕᐃᒫᒃ ᐋᖅᑭᓯᒪᖃᑦᑕᓛᕐᒥᔪᑦ ᐃᖅᑲᓇᐃᔮᖅᑖᐸᓪᓕᐊᖁᓪᓗᒋᑦ.
“ᖁᑦᑎᑦᑐᒥ ᓴᓇᔨᐅᓂᕐᒧᑦ ᐃᓕᓐᓂᐊᕋᔅᓴᖅ ᐆᑦᑑᑎᑦᑎᐊᕚᓘᒻᒪᑦ ᐊᔾᔨᒌᙱᑐᒡᒍᑏᑦ ᑎᒥᐅᔪᑦ ᑲᑐᔾᔨᓪᓗᑎᒃ ᐃᓄᓐᓂᑦ ᐃᓕᓐᓂᐊᖅᑎᑕᐅᖁᔨᒻᒪᑕ. ᐃᑲᔪᕐᓰᒋᐊᒃᑲᓐᓂᖃᑦᑕᕈᑦᑕ ᓄᓇᓕᑦᑎᓐᓂᒃ ᐃᓕᓐᓂᐊᖃᑦᑕᕐᓂᖏᓐᓂᒃ ᓴᓇᑐᓕᓴᖃᑦᑕᕐᓂᖏᓐᓂᓪᓗ, ᓯᕗᓂᔅᓴᖃᑦᑎᐊᓂᕐᓴᐅᓂᐊᕋᑦᑕ,” ᐅᖃᖅᑐᖅ ᐅᓛᔪᒃ ᐊᑭᓱᒃ, ᐊᖏᔪᖅᑳᖅ ᕿᑭᖅᑕᓂᒃᑯᓐᓂᑦ.
ᑲᑭᕙᒃ ᑲᑐᔾᔨᖃᑎᒌᑦ ᐱᕈᕐᐸᓪᓕᐊᑎᑦᑎᔾᔪᑎᖃᕐᓂᐊᖅᑐᑦ ᐅᖓᑖᓃᕌᕐᔪᑦᑐᓂᑦ $3.1 ᒥᓕᐊᓐ ᐱᖓᓱᑦ ᐊᕐᕌᒍᑦ ᐅᖓᑖᓄᑦ ᐱᒋᐊᕐᓗᑎᒃ ᑮᓇᐅᔭᓄᑦ ᐊᐅᓚᕕᖓᓐᓂ ᐊᕐᕌᒍᒥ 2022-23. ᑖᒃᑯᐊ ᑮᓇᐅᔭᑦ ᐊᑐᐃᓐᓇᕈᖅᑎᑕᐅᔪᑦ ᑲᑭᕙᒃᑯᑦ ᐊᖏᖃᑎᒌᒍᑎᖏᑎᒍᑦ ᐃᖅᑲᓇᐃᔮᔅᓴᓄᑦ ᐃᓅᓯᓕᕆᓂᕐᒧᓪᓗ ᐱᕙᓪᓕᐊᔪᓕᕆᔨᓄᑦ ᑲᓇᑕᒥ ᐱᔨᑦᑎᕋᐅᑎᖃᕐᓂᕐᒧᑦ ᓄᓇᖃᖅᑐᑐᖃᕐᓄᑦ ᐱᓕᒻᒪᔅᓴᐃᓂᕐᒧᑦ ᐃᖅᑲᓇᐃᔮᔅᓴᓄᓪᓗ ᐃᓕᓐᓂᐊᑎᑦᑎᓂᕐᒧᑦ ᐸᕐᓇᐅᑎᓄᑦ.
“ᖁᕕᐊᓱᓪᓚᕆᑦᑐᒍᑦ ᐃᑲᔪᕆᐊᔅᓴᖅ ᑖᔅᓱᒥᖓ ᖁᕕᐊᓇᖅᑐᐊᓗᒻᒥᑦ ᐱᓇᓱᐊᕋᔅᓴᐅᓂᐊᖅᑐᒥᒃ ᓴᓇᔨᐅᓂᕐᒥᒃ ᐃᓕᓐᓂᐊᑎᑦᑎᓂᕐᒧᑦ ᐃᖅᑲᓇᐃᔮᔅᓴᓄᓪᓗ ᖁᑦᑎᑦᑐᒥᐅᓂᑦ ᓄᓇᓕᓐᓂᑦ. ᑖᓐᓇ ᐱᓇᓱᐊᕋᔅᓴᑦᑎᐊᕚᓘᒻᒧᑦ ᐊᑯᓂ ᐱᕚᓪᓕᕈᑕᐅᓯᒪᔪᓐᓇᓂᐊᖅᑐᓂ ᐃᓕᓐᓂᐊᖅᑐᓄᑦ ᓄᓇᓕᓐᓄᓪᓗ,” ᐅᖃᖅᑐᖅ ᔨᐅᕋᒥ ᑑᕐᒑᓗᒃ, ᐃᔅᓯᕙᐅᑕᖓᑦ ᑲᑭᕙᒃ ᑲᑐᔾᔨᖃᑎᒌᑦ ᑲᑎᒪᔨᖏᑕ.
ᐃᓚᒋᔭᐅᓪᓗᓂ, ᒪᑭᒋᐊᖅᑕ ᐃᓄᐃᑦ ᐃᓕᓴᕈᑎᔅᓴᖏᓐᓄᑦ ᑯᐊᐳᕇᓴᒃᑯᑦ ᐃᑲᔫᑎᖃᕐᓂᐊᖅᑐᑦ $1.68 ᒥᓕᐊᓐᓂᑦ.
“ᖁᕕᐊᓱᓪᓚᕆᑦᑐᒍᑦ ᐃᑲᔪᕆᐊᔅᓴᖅ ᖁᑦᑎᑦᑐᒥᐅᓂᑦ ᓴᓇᔨᐅᓂᕐᒧᑦ ᐃᓕᓐᓂᐊᕈᑎᔅᓴᒥᑦ, ᑖᓐᓇ ᓯᕗᒧᐊᑦᑎᑦᑎᒍᑕᐅᒻᒪᑦ ᒪᕐᕉᓐᓂᒃ ᒪᑭᒋᐊᖅᑕᒃᑯᑦ ᐸᕐᓈᕆᓯᒪᔭᖏᓐᓂᒃ ᓯᕗᓪᓕᐅᔾᔭᐅᓯᒪᔪᓂᑦ: ᑐᙵᕕᒋᓂᐊᖅᑕᖓᓂᒃ ᐱᓕᒻᒪᔅᓴᐃᓂᕐᒧᑦ ᐱᓇᓱᐊᕋᔅᓴᓂᑦ ᐃᓐᓇᕐᓄᑦ, ᐊᒻᒪᓗ ᓯᕗᒧᐊᑦᑎᑦᑎᒍᑕᐅᒻᒪᑦ ᐃᓕᓐᓂᐊᕋᔅᓴᓂᑦ ᐊᒻᒪᓗ ᓯᓚᑦᑐᓴᕐᕕᒻᒥ ᐃᓕᓐᓂᐊᕋᔅᓴᓂᑦ ᐃᖅᑲᓇᐃᔮᕐᓅᖓᔪᓂᑦ. ᑭᖑᕐᖑᑎᔭᔅᓴᐃᑦ ᐱᒋᐊᖅᑎᑕᐅᓂᐊᖅᑐᑦ ᑕᕝᕙᓂ ᐱᓕᕆᐊᔅᓴᕐᒥ ᑖᓐᓇᖅ ᓄᓇᓕᓐᓂᑦ
ᐊᐅᓚᔾᔪᑎᔅᓴᑖᖅᑲᐅᒃ ᓴᓇᔭᐅᓗᓂ ᐃᓄᓐᓄᑦ ᐃᓕᓐᓂᐊᓯᓐᓈᑦ ᓯᕗᒧᑦ ᑲᔪᓯᑎᑦᑎᕙᓪᓕᐊᓯᓐᓈᑦ ᐃᖅᑲᓇᐃᔮᕆᓂᐊᖅᑕᖏᓐᓂᒃ,” ᐅᖃᖅᑐᖅ ᐊᓗᑭ ᑰᑦᑎᖅ, ᐃᔅᓯᕙᐅᑕᖓᑦ ᒪᑭᒋᐊᖅᑕ ᐃᓄᐃᑦ ᐃᓕᓐᓂᐊᕈᑎᔅᓴᖏᓐᓄᑦ ᑯᐊᐳᕇᓴᒃᑯᓐᓂᑦ.
“ᓄᓇᕗᒥ ᐃᓪᓗᓕᐅᖅᑏᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖓᑦ ᖁᕕᐊᓱᓪᓚᕆᑦᑐᑦ ᑲᑐᔾᔨᖃᑎᖃᕆᐊᔅᓴᖅ ᑖᔅᓱᒥᖓ ᖁᕕᐊᓇᓪᓚᕆᑦᑐᒥᒃ ᐱᓇᓱᐊᕋᔅᓴᒥᑦ. ᐃᓕᓐᓂᐊᑎᑦᑎᓂᖅ ᓄᓇᓕᓐᓂᑦ ᓯᕗᓪᓕᕐᐹᖑᓪᓗᓂ ᐊᑐᖅᑕᐅᓂᐅᓴᒻᒪᑦ ᐋᖅᑮᓂᐊᖅᑎᓪᓗᒋᑦ ᐊᑯᓃᖅᑐᒨᖓᔪᒥᒃ, ᐊᑑᑎᓕᒻᒥ ᐊᒻᒪᓗ ᐃᖅᑲᓇᐃᔮᔅᓴᖃᕈᑕᐅᖏᓐᓇᓂᐊᖅᑐᒥᒃ ᓄᓇᓕᓐᓂᑦ. ᐱᒻᒪᕆᐅᒻᒪᑦ ᑕᒪᓐᓇ ᐅᕙᑦᑎᓐᓄᑦ ᐊᖏᕐᓯᒪᔭᕆᐊᖃᕐᓂᖅ ᐱᕙᓪᓕᐊᑎᑦᑎᓂᕐᒥᒃ ᑭᒃᑯᑐᐃᓐᓇᕐᓂᑦ, ᐃᓪᓗᕐᔪᐊᓂᑑᙱᑦᑐᖅ,” ᐅᖃᖅᑐᖅ ᑭᓕᐅᕋᓐᔅ ᓯᓈᑦ, ᐊᖏᔪᖅᑳᖅ ᐊᐅᓚᑦᑎᔨᒻᒪᕆᐅᓪᓗᓂᓗ ᓄᓇᕗᒥ ᐃᓪᓗᓕᐅᖅᑏᑦ ᐱᕈᕐᐸᓪᓕᐊᑎᑦᑎᓂᕐᒧᑦ ᑲᑐᔾᔨᖃᑎᒌᑦ ᑎᒥᖓᓐᓂ.
ᑐᑭᓯᐅᒪᔾᔪᑎᔅᓴᑲᓐᓃᑦ ᑕᓪᓗᕈᑎᐅᑉ ᐃᒪᖓᓄᑦ ᑐᕙᐃᔪᐃᑦᑐᖅ ᐊᖏᖃᑎᒌᒍᑏᑦ ᒥᔅᓵᓄᑦ ᐅᖃᓕᒫᕋᔅᓴᐃᑦ ᐊᕐᕌᒍᓕᒫᕐᓯᐅᑎᓂᑦ ᐅᓂᒃᑳᖏᓐᓂᑦ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᐅᒪᔾᔪᑎᔅᓴᖃᕐᕕᖓᓐᓂ ᐅᕙᓂ https://www.qia.ca/documents/
| ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕐᕕᔅᓴᐃᑦ ᓕᓕ Hᐊᐃᒪᓐ
NCC ᐱᕙᓪᓕᐊᑎᑦᑎᔩᑦ lhayman@nccig.ca (867)979-8908 |
ᑭᐊᕋᓐ ᕙᓚᕋᑎ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ kflaherty@qia.ca (867) 975-3238 |
| ᒋᓕᓐ ᑲᓯᓐᔅ
ᑲᑭᕙᒃ ᑲᔾᑐᔨᖃᑎᒌᑦ gcousins@kakivak.ca (867) 979-8951 |
ᕌᓐᑎ ᖃᒪᓂᖅ
ᒪᑭᒋᐊᖅᑕ ᐃᓄᐃᑦ ᐃᓕᓴᕈᑎᔅᓴᖏᓐᓄᑦ ᑯᐊᐳᕇᓵᓐ Rqamaniq@tunngavik.com (867) 975-4923 |