Tasiuqtigiit Katimayit
Uummati Nutaqiuqtukhaq Munaqtauniganik/Nutaqiuqtukhanik Ikayuqti Havaktuq Qaritauyami Ayugitaagani Pivalianikut Ayuiqhaniqmiklu
Tasiuqtigiit Katimayit havaqatiqaqlutitk Uummati-kut Nutaqiuqtukhanik Ikayuqti havaaq atuqtakhanik pihimaliqtut qaritauyakut, qungiaqlutik ayuiqhajutimik atuqtakhainik Inuit havaktut talvani ilauyumayuluniit ayugituni ilaunigini nutaqiuqtukhanik havauhiqmi.
Uummati-kut Havaagani ayuiqhaniq turaaqviqaqtuq atuqtitiyaagani, havautiqagitumi, ilitquhiqmi atuqniqaqtumik munaqhijutimik havaqatiqariagani ukualu amihuni ilaujutiqaqtunik nutaqiuqtitiyuni ikayuqtiriinik. Una ilauniq piqarutauniaqtuq ilakuinaunigani taja atuqtumi. Qatangutiriit aniguqhihimayut uumiga havaamik ikayuqtauvaaliqhutik aaniaginiqhauvlutiklu. Ayuiqhaniq pipkagauniaqtuq avanmulu atuqtitauniaqtuq nunagiyauyumit ihuaqutiqaqluni ilitquhiqmi atuqniqatialiriagani ihuaqutinik atuqtauniginik. Ayuiqhaviit hivuliqhuqtauniaqtut Igilraat Inuit Nutaqiuruhiinik Qauyimayauyunik Ilipqamayimit aulapkaiqatauyuqlu piqaqtumik Ilitaqhijunmik Nunaqiuqtitiniqmi Nutaqiuqtukhaqlu Munatiaqniganik.
Ayuruirutit ilihaqtitauniaqtut atulaaqtut taja ayugitumit inikhami haviluguluniit atuqtakhaq, ayuruirutit hapiruirulu kinaliqaa uukturiagani nutaamik havaamik higaiyat nutaqiuhaalu munaqtauniginik.
Ukua ayuruirutit atuqniqaqniaqtut Inuinakni CPNP-mi havaktuni, inuit aaniagitaagani havaktuni, munaqhini, aaniaqvikmi havaktuni, aaniaqviliat agilrariyaani havaktuni, nutaqiqivikni, ilihaqaqvikni, humiluliqaa ikayuqtuiyunik higaiyanik nutaqiuhaaniklu qatangutiriinik. Una ikayuut ayuqiqtuutauniaqtuq atuqhimaginaqniaqtuq ilaliutijutauyuqlu ilaguinaqniganik ublumi igilraalu pigiarutainik munaqhijuhiiniklu.
Uqauhiuyut ayuqiqtuutauniaqtut qanuq tikuaqtuutiyaagani qatangutiriit tamaini higaiyaujutini ukualu nutarakhanilaaliriagani, tiguaqniqmik, ahiuniganik ikayuqtuiyuq, ipirailaiqniq, nutaqiuqtaaqnigani ingumaniq, nutaraanuaq munaqniganik, iviagiqmit maamaktitiniq, aaniaqvikmi pigiarutit, igilraat Inuit nutaqiuqniqmi qauyimayainik, nutaqiuliqtut qanurinikhait, qauyimayanik munaqhijut nanminiklu hiqnaaqniqmik, nutarahaanuaq munaqniganik, inuuhiqatiaqniq, ajikutaqagitulu qanuriliniginik. Ayuqiqtuiniaqtugut Uummati-mi inuutiarutauyuq qanurinigalu pigiarutip qanuqlu atuliriagani maligiaganilu.
Aalatqiit qauyimayauyut ilagiaqniaqtut nutarakhanuanikmit nutaraulihaaqniganut. Hivuniqhijutit nalunaitunit piniaqtut atautimuktiniginiklu ilaqaqlutiklu atuqniqaqtunik qauyimayauyunik ihumakhaqhiuqtinit kamitiuyumit iniqniqnik Nunavumilu havaqatiriinit.
Ilihautiyaagani ukua ayuruirutit qaritauyakut Inuinaqnut pipkainiaqtuq atuqtakhamik agiklivaaliriagani ayuiqhaniq Nunavumiunut tamaini nunagiyauyuni. Una hatqirutauniaqtuq atuqtakhanik ilauyunit ilaliutiyaagani avanmut humiliqaa Ukiuqtaqtumi.
Hivuniqhivaalirumaguvit, qaritauyakut titiqijavat Katie uvani Tasiuqtigiini,
tasiuqtigiit@qiniq.com -mi.