ᐃᑲᔪᖅᑎᐅᒍᓐᓇᖅᑐᑦ

ᒪᑭᒋᐊᖅᑕ ᓂᕆᐅᒋᔭᖓ ᐊᑐᕐᓂᐊᕐᓂᖅ ᐊᖏᓂᕐᐹᓂᒃ ᑮᓇᐅᔭᓂᒃ ᖁᑉᕙᕆᐊᖅᑎᑦᓯᓂᖅ ᐃᓕᓐᓂᐊᕈᑎᓄᑦ ᐃᖅᑲᓇᐃᔮᓄᓪᓗ ᐱᓕᕆᐊᓂᒃ ᐱᓗᐊᖅᑐᒥ ᐃᑲᔪᕈᑎᓂᒃ ᒫᓐᓇ ᐃᖅᑲᓇᐃᔭᕐᐸᑦᑐᓂᒃ ᐅᑭᐅᖏᑎᒍᑦ ᐃᓄᖏᓐᓂ.

ᐱᔾᔪᑎᖏᑦ ᑖᒃᑯᐊ ᐊᖏᔫᑏᑦ ᐊᑐᕋᑦᓴᓕᐊᖑᔪᑦ ᑐᕋᐃᓐᓇᖅᑐᒥᒃ ᐱᔨᑦᓯᕈᑎᓄᑦ ᐃᑯᓪᓚᕈᑎᒃᓴᐅᓪᓗᑎᒃ ᐊᒃᑐᐃᓂᐅᖃᑦᑕᕐᓯᒪᔪᓂᒃ ᓈᖕᒪᖏᑦᑐᓂᒃ ᐃᓕᓐᓂᐊᑎᑦᓯᒍᑎᓂᒃ ᐊᒻᒪᓗ ᐊᓯᖏᓐᓂᒃ ᐃᑲᔫᑎᓂᒃ ᐊᑐᐃᓐᓇᐅᑎᑕᐅᓯᒪᔪᓂᒃ ᐃᓄᓐᓄᑦ. ᓂᕆᐅᒋᔭᐅᔪᖅ ᐃᑯᓪᓚᑎᑦᓯᒋᐊᕈᑏᑦ ᐊᑐᖅᑕᐅᒋᐊᑐᒍᓐᓃᕐᔫᒥᒐᔭᕐᓂᖏᓐᓂᒃ, ᑖᒃᑯᐊ ᐱᖕᒪᕆᐅᔪᑦ ᐃᑲᔪᖅᑏᑦ ᐱᕙᓪᓕᖃᑦᑕᓂᐊᕐᓂᖏᓐᓂᒃ ᐊᐅᓚᑦᓯᒍᑕᐅᔪᑦ−ᑮᓇᐅᔭᓕᑕᐅᓯᒪᓂᒃᑯᑦ ᐃᓕᓐᓂᐊᕈᑏᑦ ᑭᖑᕚᖑᓂᐊᖅᑐᓄᑦ ᐊᑐᕋᑦᓴᑦ.

ᓲᕐᓗ ᐊᔾᔨᐅᑎᓪᓗᒍ, ᒪᑭᒋᐊᖅᑕ ᐊᑐᕋᑦᓴᒻᒪᕆᓕᐅᕐᓂᐊᕐᓂᖓᓂᒃ ᑐᓐᖓᕕᒋᔭᐅᔪᒥᒃ ᐊᔪᕈᓐᓃᕐᓴᕈᑎᒃᓴᖏᓐᓄᑦ ᐃᓐᓇᐃᑦ ᒫᓐᓇ ᐊᑉᕗᑎᓯᒪᔪᑦ ᐃᖅᑲᓇᐃᔭᕐᓂᕐᒧᑦ, ᑭᓯᐊᓂ ᓂᕆᐅᒋᔭᐅᔪᑦ ᐱᑕᖃᕆᐊᖃᕐᓂᖓ “ᐋᖅᑭᒋᐊᕈᑎᒃᓴᒥᒃ” ᐱᓕᕆᐊᒃᓴᓂᒃ ᑲᑕᒍᑕᐅᓂᐊᖅᑐᖅ ᐃᓕᓐᓂᐊᓵᓕᔪᑦ ᐊᒻᒪᓗ K-12 ᐋᖅᑭᑦᓯᒪᔪᑦ ᓴᕐᖓᑎᑕᐅᒋᐊᕐᐸᑕ ᑭᖑᕚᖑᔪᓄᑦ ᒫᓐᓇ. ᐃᓚᖏᑦ ᐊᑐᕋᑦᓴᓕᐊᖑᔪᑦ ᐊᑭᓕᖅᑕᐅᓂᐊᖅᑐᑦ ᐊᑕᖏᕐᓗᒍ ᐱᓕᕆᐊᖑᔪᖅ, ᐊᓯᖏᓪᓕ ᐊᐅᓚᑕᐅᓂᐊᖅᑐᑦ ᓇᓕᒧᖏᓐᓂᒃ ᐊᑐᕋᑦᓴᓕᐊᖑᓯᒪᔪᑦ ᐊᐅᓚᑦᓯᓚᑦᑖᖅᑐᓂᒃ, ᓲᕐᓗ ᒐᕙᒪᓂᒃ.

ᒪᑭᒋᐊᖅᑕ ᕿᓂᕐᓂᐊᖅᑐᖅ ᐊᑐᕋᑦᓴᐅᓇᔭᖅᑐᓂᒃ ᐊᐅᓚᑦᓯᒍᓐᓇᕐᕕᖏᓐᓂᒃ ᑲᑐᔾᔨᖃᑎᒌᑦ, ᐃᓚᒋᔭᐅᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᑦ, ᒐᕙᒪᒃᑯᓃᓐᖔᖏᑦᑐᑦ ᑎᒥᐅᔪᑦ ᐊᒻᒪᓗ ᓇᖕᒥᓂᖁᑎᓖᑦ, ᐊᒻᒪᓗ, ᒪᓕᓪᓗᒋᑦ ᐃᓛᒃᑯᑦ 23, ᓄᓇᕗᑦ ᐊᒻᒪᓗ ᑲᓇᑕ ᒐᕙᒪᖏᑦ ᐊᐅᓚᑦᓯᓗᑎᒃ ᐃᓄᓐᓅᖓᔪᓂᒃ ᐃᓕᓐᓂᐊᕈᑎᓂᒃ ᐃᖅᑲᓇᐃᔮᓄᓪᓗ ᐱᓕᕆᐊᒃᓴᓂᒃ ᐊᒻᒪᓗ ᐊᒃᑐᐊᔪᓂᒃ ᐃᑲᔫᑎᓂᒃ. ᐱᔾᔪᑖ ᑕᐃᒪᐃᑦᑐᒥᒃ ᐊᑐᕋᑦᓴᓕᐅᕐᓂᕐᒧᑦ ᐃᑲᔫᑎᒃᓴᓂᒃ ᓴᖅᑭᐸᓪᓕᐊᔪᓂᒃ ᐊᒻᒪᓗ ᑎᒍᓯᔾᔪᑎᒃᓴᓂᒃ ᐊᑐᐃᓐᓇᓂᐊᖅᑐᓂᒃ ᐱᕚᓪᓕᕈᑎᒃᓴᓂᒃ ᐱᓕᕆᐊᓄᑦ, ᐱᔨᑦᓯᕈᑎᓄᑦ, ᐊᑐᐊᒐᕐᓄᑦ, ᐊᒻᒪᓗ ᐊᐅᓚᑕᖏᓐᓄᑦ ᑖᒃᑯᐊ ᑲᑐᔾᔨᖃᑎᒌᑦ ᐃᑲᔪᖅᑕᐅᑲᓐᓂᕈᑎᒃᓴᖏᓐᓄᑦ ᐃᓄᐃᑦ ᐱᔪᒪᔭᖏᑦ ᑭᖑᕚᕇᕋᓴᓐᓄᑦ, ᓴᖅᑭᐅᒪᒍᓐᓃᖅᑐᑐᖃᐅᑎᓪᓗᒍ ᒪᑭᒋᐊᖅᑕ.

ᓲᕐᓗ ᐊᔾᔨᐅᑎᓪᓗᒍ, ᑕᐃᒪᐃᑦᑐᒥ ᐊᑐᕋᑦᓴᓕᐊᖑᔪᒦᖃᑕᐅᒍᓐᓇᖅᑐᖅ ᐱᒋᐊᕈᑏᑦ ᐊᑭᓐᓄᑦ ᓄᑖᓄᑦ ᐱᓕᕆᐊᓄᑦ ᐅᕝᕙᓘᓐᓃᑦ ᐱᔨᑦᓯᕈᑎᓄᑦ, ᓲᕐᓗ ᖃᐅᔨᓇᓱᐊᕐᓂᕐᒧᑦ, ᐱᕙᓪᓕᐊᑎᑦᓯᓂᕐᒧᑦ, ᐊᐅᓚᑦᓯᓂᕐᒧᑦ, ᖃᐅᔨᓇᓱᐊᕐᓂᒧᓪᓗ ᐆᑦᑐᕋᐅᑎᒃᓴᓂᒃ ᐱᓕᕆᐊᓂᒃ, ᐱᓕᖕᒪᒃᓴᖅᑕᐅᓂᖏᑦ ᐱᓕᖕᒪᒃᓴᐃᔪᒃᓴᑦ, ᐅᕝᕙᓘᓐᓃᑦ ᐃᓕᓐᓂᐊᕈᑎᒃᓴᓕᐅᕐᓂᖅ. ᑕᐃᒪᐃᑦᑐᒥᒃ ᐊᑐᕋᑦᓴᓕᐅᕐᓂᖅ, ᒪᑭᒋᐊᖅᑕ ᐊᑭᓖᔭᕆᐊᑐᒐᔭᓐᖏᑦᑐᖅ ᐊᐅᓚᑕᐅᓂᖏᓐᓄᑦ ᐱᓕᕆᐊᑦᓴᑦ ᐱᔨᑦᓯᕈᑏᓪᓗ ᑐᕋᐃᓐᓇᐃᖅᑐᒥᒃ, ᑭᓯᐊᓂᓕ ᐊᑐᕈᓐᓇᖅᑐᖅ ᑕᒪᒃᑯᓂᖓ ᐊᑐᕋᑦᓴᓂᒃ ᑎᒍᓯᕙᓪᓕᐊᓂᕐᒥᒃ ᓄᑖᓂᒃ ᓴᖅᑭᐸᓪᓕᐊᔪᓂᒃ ᐊᒻᒪᓗ ᐱᕚᓪᓕᕈᑎᒃᓴᓂᒃ.

ᒪᑭᒋᐊᖅᑕ ᐊᐅᓚᑦᓯᓂᐊᖅᑐᖅ ᐊᒻᒪᓗ ᓇᓗᓇᐃᕐᓗᒍ ᖃᐅᔨᓴᕐᓂᖅ ᖃᐅᔨᓇᓱᐊᕐᓂᕐᓗ ᐱᓕᕆᐊᒃᓴᓂᒃ, ᐱᔨᑦᓯᕈᑎᓂᒃ, ᐊᒻᒪᓗ ᐊᐅᓚᓂᐅᔪᓂᒃ ᐊᒃᑐᐊᔪᓂᒃ ᐃᓕᓐᓂᐊᓂᕐᒧᑦ ᐃᖅᑲᓇᐃᔮᓄᓪᓗ ᓄᓇᕗᒻᒥ, ᐃᓚᒋᔭᐅᓗᑎᒃ ᐊᒃᑐᐃᓂᖃᕐᓂᖏᑦ ᐊᕙᖕᒧᓕᖓᓂᕐᓴᓂᒃ ᐃᓅᖃᑎᒌᓐᓂᕐᒧᑦ ᒪᑭᒪᔾᔪᑎᓪᓗᐊᑕᕐᓂᒃ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ. ᒪᑭᒋᐊᖅᑕ ᓇᓗᓇᐃᕐᓯᓂᐊᖅᑐᖅ ᒫᓐᓇ ᐊᒻᒪᓗ ᓴᖅᑭᐸᓪᓕᐊᔪᓂᒃ ᐊᐳᖅᑕᕈᑎᓂᒃ, ᓴᓐᖏᓂᕐᓂᒃ, ᐊᒻᒪᓗ ᐱᔾᔪᑎᒃᓴᓂᒃ ᐊᒃᑐᐊᔪᓂᒃ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᑕᑯᓐᓇᖅᑕᖓᒍᑦ ᑖᒃᑯᓇᓐᖔᖅᑐᓂᒃ ᐊᑐᕆᐊᓕᖕᓂᒃ ᐊᒻᒪᓗ ᐱᔪᒪᔭᖏᓐᓂᒃ ᐃᓄᐃᑦ.

ᒪᑭᒋᐊᖅᑕ ᐊᑐᕐᓂᐊᖅᑐᖅ ᖃᐅᔨᓴᕐᓂᕐᒥᒃ ᑐᓴᖅᑎᑦᓯᒍᑎᒋᓗᒍ ᓇᖕᒥᓂᖅ ᑮᓇᐅᔭᓕᐅᕈᑎᒥᓂᒃ ᐊᒻᒪᓗ ᐊᑯᓂᐅᔪᒧᑦ− ᐋᖅᑭᑦᓯᒪᔪᒥᒃ ᐸᕐᓇᓂᕐᒥᒃ. ᐊᑐᕐᓂᐊᕐᒥᔪᖅ ᖃᐅᔨᓴᕐᓗᓂ ᐅᑯᓂᖓ:

• ᐱᕚᓪᓕᕈᑎᒃᓴᓂᒃ ᖃᐅᔨᔭᐅᕙᓪᓕᐊᒍᑎᒃᓴᖏᓐᓂᒃ ᒐᕙᒪᓄᑦ ᐊᒻᒪᓗ ᐊᓯᖏᓐᓄᑦ ᐱᔨᑦᓯᖅᑎᐅᕙᑦᑐᓄᑦ ᐊᒻᒪᓗ ᐃᖅᑲᓇᐃᔭᕐᕕᖕᓄᑦ ᐊᑐᕆᐊᓕᖏᓐᓂᒃ ᐱᔪᒪᔭᖏᓐᓂᓗ ᐃᓄᐃᑦ;
• ᐅᔾᔨᕈᓱᑦᓯᐊᑲᓐᓂᕈᑎᒃᓴᓂᒃ ᒪᑭᒋᐊᖅᑕ ᐱᓇᓱᐊᖃᑎᖏᓪᓗ ᖃᐅᔨᒪᔭᐅᔾᔪᑕᐅᔪᓂᒃ ᐊᒻᒪᓗ ᐱᓕᕆᐊᒃᓴᓂᒃ ᐊᑐᕈᓐᓇᕐᕕᓂᒫᖏᑎᒍᑦ ᐊᑐᐃᓐᓇᒐᓛᑦ ᐊᑐᖅᑕᐅᒍᓐᓇᖁᓪᓗᒋᑦ ᐊᒻᒪᓗ ᓴᓂᖅᑯᒋᐊᖃᑦᑕᕐᓗᒋᑦ ᐊᐳᖅᑕᕐᕕᐅᕙᑦᑐᑦ ᐅᕝᕙᓘᓐᓃᑦ ᑖᒃᑯᓂᖓᑦᓴᐃᓐᓇᖅ ᑲᒪᒋᔭᖃᖁᓇᒋᑦ; ᐊᒻᒪᓗ,
• ᐃᑲᔪᖅᑕᐅᔾᔪᑏᑦ ᐱᕙᓪᓕᐊᓂᖓᓄᑦ ᐊᒻᒪᓗ/ᐅᕝᕙᓘᓐᓃᑦ ᓱᖏᐅᑎᕙᓪᓕᐊᓂᖅ ᓴᓇᕐᕈᑎᓄᑦ, ᐃᓱᕐᕆᐅᑎᓄᑦ, ᐊᒻᒪᓗ ᐃᓗᓕᖏᓐᓂᒃ ᐊᑦᑐᐊᔪᓂᒃ ᐃᓕᓐᓂᐊᓂᕐᒧᑦ ᐃᖅᑲᓇᐃᔮᒧᓪᓗ ᐱᓕᕆᐊᒃᓴᓂᒃ ᐃᓄᓐᓄᑦ.