ᐅᑭᐅᖅᑕᖅᑐᒥ ᓄᑕᖅᑲᑦ ᒪᒃᑯᑦᑐᓪᓗ ᑐᑦᑕᕐᕕᖓ
ᓇᓕᒧᒌᑦ ᓯᕗᓕᕐᓂᕐᒧᑦ ᐃᓱᒪᒃᑯᑦ ᖃᓄᐃᓐᖏᓯᐊᕐᓂᖅ − ᖁᐊᕐᓵᓇᖅᑐᒃᑰᓂᕐᒥᒃ ᐅᔾᔨᓱᕐᓂᖅ
ᑲᑎᓐᖓᓂᖅ
ᓇᓗᓇᐃᔭᐅᑎᖓ
ᓇᓕᒧᒌᑦ ᓯᕗᓕᕐᓂᕐᒧᑦ ᐃᓱᒪᒃᑯᑦ ᖃᓄᐃᓐᖏᓯᐊᕐᓂᕐᒧᑦ ᐱᖓᓱᓄᑦ ᐅᓪᓗᓄᑦ ᓇᓗᓇᐃᒃᑯᑕᖅᑖᕈᑎᒃᓴᖅ ᐃᓕᓐᓂᐊᑎᑦᓯᒍᑕᐅᔪᖅ ᒪᒃᑯᑦᑐᓂᒃ ᐅᑭᐅᓕᓐᓂᒃ 15-21. ᐱᔾᔪᑎᓪᓗᐊᑕᐅᓂᐊᖅᑐᖅ ᑲᑎᓐᖓᓂᖅ ᐃᑲᔪᖅᑕᐅᖁᓪᓗᒋᑦ ᐃᓄᐃᑦ ᒪᒃᑯᑦᑐᑦ ᐊᓂᒍᐃᒍᓐᓇᕐᓯᖁᓪᓗᒋᑦ ᓴᒃᑯᐃᓗᑎᒃ ᐋᓐᓂᑎᖅᑕᐅᓯᒪᓂᕐᒥᒃ. ᑲᑎᓐᖓᓂᖅ ᐃᓕᓐᓂᐊᑎᑦᓯᓂᐅᓐᖏᑦᑐᖅ ᒪᒃᑯᑦᑐᓂᒃ ᓇᓕᒧᒌᑦ ᐃᓅᓯᓕᕆᔭᐅᖁᓪᓗᒋᑦ, ᑐᕌᖓᔪᖅ ᖃᓄᖅ ᓇᓕᒧᒌᑦ ᐊᓂᐊᑦᓯᒍᓐᓇᕐᒪᖔᑕ ᐊᑦᑕᓇᓐᖏᑦᑐᒃᑯᑦ, ᖃᓄᖅ ᐃᑲᔪᖅᑕᐅᕕᒃᓴᖏᓐᓄᑦ ᑲᓱᖅᑎᑦᓯᒍᓐᓇᕐᒪᖔᑕ ᓇᓕᒧᒌᑦ ᐊᓯᖏᓐᓄᑦ ᐃᑲᔪᖅᑕᐅᔾᔪᑎᒃᓴᓄᑦ ᐱᔨᑦᓯᕈᑎᓄᓪᓗ, ᐊᒻᒪᓗ ᖃᓄᖅ ᓇᖕᒥᓂᖅ ᐸᖅᑭᒍᓐᓇᓂᕐᒥᒃ ᑕᑉᕘᓈᕐᓗᓂ. ᐃᑲᔫᑎᒃᓴᒥᒃ ᑐᑭᓯᑦᓯᐊᕈᑎᒃᓴᖓᓄᑦ ᐊᑐᕐᓯᒪᔭᖏᓐᓂᒃ ᐊᒻᒪᓗ ᑎᒍᓯᓗᑎᒃ ᓂᕆᐅᖕᓂᕐᒥᒃ ᓱᖏᐅᑎᓯᒪᒍᓐᓇᓂᕐᒥᓪᓗ, ᐃᓚᒋᔭᐅᔪᑦ ᐃᓕᓐᓂᐊᕈᑎᖃᕐᓂᐊᕐᒥᔪᑦ ᐃᓗᓕᖏᓐᓂᒃ ᐊᑐᖅᑕᐅᖃᑦᑕᕐᓯᒪᔪᑦ ᖁᐊᖅᓵᓇᖅᑐᒃᑰᖅᑐᓄᑦ ᑎᑭᐅᑎᒍᑕᐅᓯᒪᔪᑦ ᖁᑦᓯᑐᒻᒪᕆᐅᓂᖓᓄᑦ ᓇᓗᓇᐃᖅᑕᐅᓯᒪᔪᑦ ᐋᓐᓂᖅᑎᕆᓂᕐᒧᑦ ᐃᓄᐃᑦ ᓄᓇᓕᖏᓐᓂ ᐅᓪᓗᒥ. ᐋᖅᑭᒋᐊᕈᑕᐅᔪᖅ ᑖᑦᓱᒧᖓ ᐃᓕᓐᓂᐊᕈᑕᐅᔪᒧᑦ ᐅᓄᖅᓯᑲᓐᓂᖁᓪᓗᒋᑦ ᐃᓄᐃᑦ ᐊᒻᒪᓗ ᓄᓇᕗᒻᒥ ᓇᓗᓇᐃᕐᓯᒪᔪᓂᒃ ᐃᓗᓕᖏᓐᓂᒃ, ᐊᒻᒪᓗ ᐃᓚᓕᐅᔾᔭᐅᒋᐊᒃᑲᓂᕐᓗᑎᒃ ᐅᖃᐅᓰᑦ ᑖᒃᑯᓇᓐᖓᑦ ᑐᕌᕐᕕᒋᔭᐅᔪᓄᑦ. ᑖᓐᓇ ᐋᖅᑭᒋᐊᕈᑎ ᐊᐅᓚᓂᖓ ᐊᒻᒪᓗ ᐊᐅᓚᑕᐅᓂᖓ ᐆᑦᑐᕋᐅᑎ ᓴᖅᑮᓂᐊᖅᑐᖅ ᓇᖕᒥᓂᖅ ᐊᔪᓐᖏᓐᓂᓕᓐᓂᒃ ᐱᓕᒻᒪᓴᕐᓯᒪᔪᓂᒃ ᐃᑲᔪᖅᑕᐅᔪᓂᓪᓗ ᐊᐅᓚᑦᓯᔨᓂᒃ ᐊᒻᒪᓗ ᓴᖅᑮᓗᑎᒃ ᐃᓕᓐᓂᐊᕈᑎᒃᓴᒥᒃ ᐊᒻᒪᓗ ᓄᓇᓕᓐᓄᑦ ᑐᕌᒐᔪᒥᒃ ᐃᑲᔫᑎᒃᓴᓂᒃ ᒪᒃᑯᑦᑐᓄᑦ ᓄᓇᕗᒻᒥ.
ᐃᓘᓐᓈᓂᒃ ᑕᑯᒋᐊᕐᓂᖅ
ᐅᑭᐅᖅᑕᖅᑐᒥ ᓄᑕᖅᑲᑦ ᒪᒃᑯᑦᑐᓪᓗ ᑐᑦᑕᕐᕕᖓ (ACYF) ᐃᖃᓗᓐᓃᑦᑐᖅ, ᓄᓇᕗᑦ, ᑮᓇᐅᔭᓕᐅᕋᓱᐊᖅᑎᐅᖏᑦᑐᖅ ᑲᑐᔾᔨᖃᑎᒌ ᓴᖅᑭᖅᑕᒥᓂᖅ 2004-ᒥ ᑲᒪᒋᔭᖃᖃᑦᑕᖅᑐᖅ ᐱᓕᕆᐊᓂᒃ ᐊᒃᑐᐃᓯᒪᔪᓂᒃ ᓄᑕᖅᑲᓂᒃ ᒪᒃᑯᑦᑐᓂᓪᓗ ᐅᑭᐅᖅᑕᖅᑐᓕᒫᒥ. 2015-ᒥ, ᐅᒥᖕᒪᒃ ᓄᑕᖅᑲᑦ ᒪᒃᑯᑦᑐᓪᓗ ᐃᑲᔪᖅᑕᐅᔾᔪᑎᒃᓴᖏᓐᓄᑦ ᐆᑦᑐᕋᐅᑦ ᖃᐅᔨᓴᕈᑎ, ACYF UCYSC ᐱᓕᕆᖃᑎᒌᑦᑐᑦ ᓄᓇᓕᓐᓂᒃ ᑐᓴᕆᐊᕐᕕᖃᖃᑦᑕᓚᐅᖅᑐᑦ ᐃᖃᓗᓐᓂ, ᑲᖏᕐᖠᓂᖅ ᐊᒻᒪᓗ ᐃᖃᓗᑦᑑᑦᑎᐊᒥ, ᐊᒻᒪᓗ ᐅᖃᕐᕕᐅᖃᑦᑕᓚᐅᖅᑐᑦ ᐅᖓᑖᓃᑦᑐᓄᑦ 75 ᖃᕆᓴᐅᔭᒃᑯᑦ ᖃᐅᔨᓇᓱᐊᕈᑎᑎᒍᑦ ᓄᓇᕗᒻᒥᐅᓂᒃ, ᐊᒻᒪᓗ ᑲᑎᒪᖃᑎᖃᖃᑦᑕᕐᓱᓂ ᑲᓲᒪᓪᓗᒋᒃ ᒪᒃᑯᑦᑐᑦ, ᐃᓕᓴᐃᔩᑦ, ᐃᓅᓯᓕᕆᔩᑦ ᐊᒻᒪᓗ ᓄᓇᓕᓐᓂ ᐱᓕᕆᔨᓪᓗᐊᑕᕐᓂᒃ ᑐᐊᕕᕐᓇᖅᑐᓂᒃ ᑲᒪᒋᔭᖃᖃᑦᑕᖅᑐᓂᒃ ᐋᓐᓂᑎᖅᑕᐅᓂᕋᐃᔪᖃᕋᐃᒻᒪᑦ ᓄᑕᕋᕐᒥᒃ ᒪᒃᑯᑦᑐᒥᓪᓗ ᐱᕋᔭᑕᐅᔪᓂᒃ. ᓇᓕᒧᒌᑦ ᓯᕗᓕᕐᓂᕐᒧᑦ ᐃᓱᒪᒃᑯᑦ ᖃᓄᐃᓐᖏᓯᐊᕐᓂᕐᒧᑦ ᐱᓕᕆᐊᖑᔪᖅ ᑐᕋᐃᓐᓇᖅᑐᒥᒃ ᐱᓕᕆᒋᐊᕈᑕᐅᕙᑦᑐᖅ ᑐᐊᕕᕐᓇᖅᑐᒥᒃ ᓄᓇᓕᓐᓂ ᐊᐅᓚᔾᔭᐃᒋᐊᖅᑐᖃᖁᓪᓗᒍ ᐃᑲᔪᖅᑕᐅᔾᔪᑎᒃᓴᖓᓂᒃ ᓄᑕᕋᖅ ᒪᒃᑯᑦᑐᕐᓗ ᐋᓐᓂᑎᖅᑕᐅᓂᖏᓐᓂᒃ, ᐱᓗᐊᖅᑐᒥ ᐊᓯᖏᑦ ᒪᒃᑯᑦᑐᑦ ᓲᕐᓗ ᐅᕕᒃᑲᐃᑦ ᐅᐸᑦᑕᐅᒐᐃᒻᒪᑕ ᓇᓕᒧᖏᓐᓄᑦ ᑐᓴᖅᑎᑕᐅᓪᓗᑎᒃ ᓴᖅᑭᖅᑕᖏᓐᓂᒃ ᐋᓐᓂᑎᖅᑕᐅᓂᕐᒥᒃ ᖃᐅᔨᒪᒐᔭᕐᓂᖏᓐᓂᓪᓗ ᖃᐅᔨᒪᔨᑕᐅᕐᓂᒥᒃ ᐊᒻᒪᓗ ᐃᑉᐱᓐᓂᐊᔪᒧᑦ ᐃᑲᔪᖁᔭᐅᓪᓗᑎᒃ. ᓇᓕᒧᒌᑦ ᓯᕗᓕᕐᓂᕐᒧᑦ ᐃᓱᒪᒃᑯᑦ ᖃᓄᐃᓐᖏᓯᐊᕐᓂᕐᒧᑦ ᐱᓕᕆᐊᒃᓴᖅ ᓴᖅᑭᖅᑕᐅᓚᐅᖅᑐᖅ UCYSC−ᑯᑦ ᓄᓇᓕᖕᓂᒃ ᑐᓴᕆᐊᕐᕕᖃᓚᐅᖅᑎᓪᓗᒋᑦ ᐊᒻᒪᓗ ᖃᐅᔨᓴᕐᓂᕐᒧᑦ ᐅᖃᐅᓯᐅᓚᐅᖅᑐᑦ ᑲᒪᒋᔭᐅᓚᐅᖅᑎᓪᓗᒋᑦ. ᐅᓂᒃᑳᖑᓚᐅᖅᑐᖅ ᐅᕕᒃᑲᑦ ᒪᒃᑯᑦᑐᑦ ᐃᓱᒪᒋᔭᐅᔪᑦ “ᖃᓄᐃᓐᖏᓐᓂᖏᓐᓂᒃ” ᐊᒻᒪᓗ ᓇᓕᒧᖏᓐᓂᒃ ᖃᐅᔨᒪᔮᖑᔪᑦ ᐋᓐᓂᖅᑕᐅᓯᒪᓂᒃᑯᑦ ᖃᓄᐃᑦᑐᒃᑰᕐᓯᒪᓂᖏᓐᓂᒃ ᐅᐸᑦᑕᐅᖃᑦᑕᓲᑦ ᒪᒃᑯᑦᑑᖃᑎᖏᓐᓄᑦ ᐊᖅᑯᑕᐅᒍᒪᓪᓗᑎᒃ ᐊᓂᐊᑦᓯᕕᒋᔭᐅᓗᑎᒃ. ᐅᓄᖅᑐᓂ, ᒪᒃᑯᑦᑐᑦ ᐅᑉᐱᕈᓱᒻᒪᑕ ᒪᒃᑯᑦᑑᖃᑎᒥᖕᓂᒃ ᐊᑦᑕᓇᓐᖏᒋᐊᖏᑦ ᐅᖃᕐᕕᒋᒋᐊᖏᑦ ᐅᓂᒃᑳᑦᓴᒥᓂᒃ (ᐊᑐᖅᑕᐅᓯᒪᔪᓂᒃ ᐱᓗᐊᖅᑐᒥ ᐊᓂᐊᑦᓯᕕᐅᖃᑦᑕᕈᒪᓲᑦ, ᑭᓯᐊᓂ ᐃᓛᓐᓂᒃᑯᑦ ᑕᑉᕙᓴᐃᓐᓇᖅ ᖃᓄᐃᑦᑐᑰᖅᑐᓂᒃ) ᐊᒻᒪᓗ ᐅᖃᐅᔾᔭᐅᒍᒪᓲᑦ ᖃᓄᐃᓕᐅᕆᐊᖃᕐᒪᖔᕐᒥᒃ “ᖃᓄᐃᓕᐅᕐᓂᐊᓕᖅᑯᖓᓕ” ᐊᒻᒪᓗ ᓇᒧᓐᖓᕈᓐᓇᕐᒪᖔᕐᒥᒃ ᐊᓐᓂᐊᑦᓯᕕᒋᔪᓐᓇᖅᑕᒥᓂᒃ ᐃᑲᔪᖅᑐᒃᓴᓂᒃ ᐅᑉᕙᓘᓐᓃᑦ ᐃᓱᒪᒃᑯᑦ ᖃᓄᐃᓐᖏᓯᐊᕐᓂᕐᒧᑦ ᐱᔨᑦᓯᖅᑎᓂᒃ. ᑕᒪᓐᓇ ᐅᖁᒪᐃᓪᓕᐅᕈᑎᒻᒪᕆᐅᓯᓲᖅ ᒪᒃᑯᑦᑐᒧᑦ ᐊᓂᐊᑦᓯᕕᒋᔭᐅᔪᒧᑦ; ᖃᐅᔨᒪᓐᖏᑐᐃᓐᓇᕆᐊᖃᕐᒪᑕ ᑭᒡᒍᑎᓂᒃ ᑖᒃᑯᓄᖓ ᐊᒻᒪᓗ ᓇᒧᓐᖓᕆᐊᖃᕐᒪᖔᖅ ᐱᔨᑦᓯᖅᑎᓄᑦ, ᐊᒻᒪᓗ ᐃᑲᔪᕋᓱᐊᕆᐊᖃᓯᓲᑦ ᓇᓕᒧᒥᓂᒃ ᐱᑕᖃᖅᑎᓐᓇᒍ ᐃᑲᔪᖅᑕᐅᔾᔪᑎᒃᓴᓂᒃ ᐃᑲᔪᕈᓐᓇᖅᑐᓂᓪᓗ. ᑕᒪᓐᓇ ᑲᒡᒍᓗᐃᒍᓐᓇᖅᑐᖅ, ᖁᐊᖅᓵᓇᖅᑐᒃᑰᑲᓐᓂᕈᑎᒋᓕᕐᓗᒍ ᐊᒻᒪᓗ ᓇᓕᒧᖓ ᐊᓂᐊᑦᓯᕕᐅᔪᖅ ᓇᓗᓕᕐᓗᓂ ᐃᑲᔪᕈᒪᒐᓗᐊᕐᓗᓂ.
ᖃᐅᔨᒋᐊᕐᕕᒃᓴᖅ:
ᓯᐅᕋ ᑲᓛᒃ
ᐃᕐᖐᓐᓈᕈᑖ: sclarke@acyf.ca