ᐱᓂᐊᕐᓂᕋᐅᑎᖓ
ᒪᑭᒋᐊᖅᑕ ᐱᓂᐊᕐᓂᕋᐅᑎᖓ ᐸᕐᓇᓯᒪᑦᓯᐊᕈᑎᒃᓴᓂᒃ ᓄᓇᕗᑦ ᐃᓄᐃᑦ ᐃᖅᑲᓇᐃᔮᒃᓴᖏᓐᓄᑦ.
ᑲᔪᓯᑎᑦᓯᒍᑎᒃᓴᖅ ᑖᑦᓱᒥᖓ, ᒪᑭᒋᐊᖅᑕ ᐃᑲᔪᕐᓂᐊᖅᑐᖅ ᑲᑐᔾᔨᓂᒃᑯᑦ ᐃᓚᓕᐅᔾᔨᓯᒪᓂᕐᒥᒃ, ᑮᓇᐅᔭᑦ, ᐊᒻᒪᓗ ᐊᑐᕆᐊᓖᑦ ᐃᑲᔫᑎᒃᓴᑦ ᐱᕙᓪᓕᐊᑎᑕᐅᓂᖓᓄᑦ ᐊᐅᓚᑕᐅᓂᖓᓄᓪᓗ ᐃᓄᓐᓅᖓᔪᓂᒃ ᐃᓕᓴᐃᒍᑎᒃᓴᓂᒃ ᐃᖅᑲᓇᐃᔮᒃᓴᓂᓪᓗ. ᒪᑭᒋᐊᖅᑕ ᐱᓇᓱᐊᒐᖓ ᐋᖅᑭᑦᓯᒪᓂᐊᖅᑐᖅ ᑲᔪᓯᑎᑦᓯᒍᑎᒃᓴᐅᓗᓂ ᒪᕐᕈᓪᓗᐊᑖᓐᓂᒃ:
- ᐃᓄᐃᑦ ᓄᓇᕗᒻᒥ ᑎᒍᓯᓂᐊᕐᒪᑕ ᐊᔪᓐᖏᓂᕐᒥᒃ, ᖃᐅᔨᒪᓂᕐᒥᒃ, ᓇᓗᖅᑯᑎᓐᖏᓂᕐᒥᒃ, ᐊᒻᒪᓗ ᐱᔾᔪᑎᒃᓴᓂᒃ ᐃᓚᒋᔭᐅᓂᐊᖅᑐᓂᒃ ᓯᕗᒧᐊᒍᑕᐅᓂᐊᖅᑐᒥᓪᓗ ᐃᓕᓐᓂᐊᓂᕐᒧᑦ ᐃᖅᑲᓇᐃᔮᒧᓪᓗ ᓇᓕᖅᑯᑦᓯᓯᒪᔪᒧᑦ ᐊᑐᓂᑦ ᑭᒃᑯᑐᐃᓐᓇᐃᑦ ᐊᑐᕆᐊᓕᖏᓐᓄᑦ ᑐᕌᒐᖏᓐᓄᓪᓗ, ᒐᕙᒪᒃᑯᑦ ᐊᒻᒪᓗ ᓇᖕᒥᓂᖃᖅᑐᑦ ᐱᓕᕆᒡᕕᖏᑦ; ᐊᒻᒪᓗ
- ᐱᔨᑦᓯᖅᑏᑦ ᐃᖅᑲᓇᐃᔭᕐᕖᓪᓗ ᐱᕙᓪᓕᐊᓂᖃᑦᓯᐊᓂᖅᑐᑦ ᐊᑯᓂ ᐊᑐᕋᑦᓴᓂᒃ ᐊᔪᓐᖏᓐᓂᕆᔭᒥᒍᑦ ᐱᔨᑦᓯᕈᑎᓂᒃ ᐱᔪᒪᔭᐅᔪᓂᓪᓗ ᐃᖅᑲᓇᐃᔮᒧᓪᓗ ᐱᓕᕆᐊᒃᓴᓂ ᐊᑐᕆᐊᓕᖏᓐᓂᒃ ᐃᓄᐃᑦ ᓄᓇᕗᒻᒥ.
ᒪᑭᒋᐊᖅᑕ ᐊᑐᕐᓂᐊᖅᑐᖅ ᐊᑐᕋᑦᓴᓕᐊᕆᓯᒪᔭᒥᓂᒃ ᐃᑲᔫᑏᑦ ᐱᕚᓪᓕᕈᑎᒃᓴᓪᓗ, ᑭᓯᐊᓂ ᑖᒃᑯᓂᖓᑦᓴᐃᓐᓇᖅ ᑲᒪᒋᔭᖃᓐᖏᓪᓗᑎᒃ ᐅᕝᕙᓘᓐᓃᑦ ᐃᓇᖐᓐᖏᓪᓗᑦᑎᒃ, ᐱᓕᖕᒪᒃᓴᐅᑎᓂᒃ ᐊᒻᒪᓗ ᐊᓯᖏᓐᓂᒃ ᐆᑦᑐᕋᕈᑎᒃᓴᓂᒃ ᐱᓂᐊᕐᓂᕋᐅᑎᖏᓐᓃᑦᑐᓂᒃ ᑲᓇᑕ ᒐᕙᒪᖓᑕ ᐊᒻᒪᓗ ᓄᓇᕗᑦ ᒐᕙᒪᖓᑕ.
ᑲᒪᒋᔭᐅᓯᒪᓂᖓ
ᒪᑭᒋᐊᖅᑕ ᐃᓄᐃᑦ ᐱᓕᖕᒪᒃᓴᐃᓂᕐᒧᑦ ᑯᐊᐳᕇᓴᓐ (“ᒪᑭᒋᐊᖅᑕ”) ᐱᓕᕆᐊᒃᓴᓖᑦ ᐊᑐᕐᓂᕐᒥᒃ $175 ᒥᓕᔭᓂᒃ ᑮᓇᐅᔭᓂᒃ ᐱᕚᓪᓕᕈᑎᒃᓴᓂᒃ ᐸᕐᓇᓯᒪᓂᕐᒥᒃ ᐃᖅᑲᓇᐃᔮᑦᓴᖏᓐᓄᑦ ᓄᓇᕗᒻᒥ ᐃᓄᐃᑦ.
ᒪᑭᒋᐊᖅᑕ ᓴᖅᑭᖅᑕᐅᓚᐅᖅᑐᖅ ᐃᖅᑲᖅᑐᐃᕕᒃᑰᖏᑦᑐᖅ ᑮᓇᐅᔭᑕᐅᓂᕐᒧᑦ ᐊᖏᖃᑎᒌᒍᑎᒃᑯᑦ ᐊᑎᓕᐅᖅᑕᐅᓪᓗᓂ ᒪᐃ 2015 ᑖᒃᑯᓇᓐᖓᑦ ᓄᓇᕗᑦ ᑐᓐᖓᕕᒃ ᑎᒥᖓᓂᒃ, ᓄᓇᕗᑦ ᒐᕙᒪᖓ, ᐊᒻᒪᓗ ᑲᓇᑕ ᒐᕙᒪᖓᓂᒃ. ᒪᑭᒋᐊᖅᑕ ᓴᖅᑭᖅᑕᐅᓚᐅᖅᑐᖅ ᑮᓇᐅᔭᖅᑑᑎᒃᓴᖅᑖᑎᑦᓯᔪᒃᓴᒫᖑᓪᓗᓂ ᐊᒻᒪᓗ ᐊᓯᖏᓐᓂᒃ ᐃᑲᔫᑎᒃᓴᓂᒃ ᐱᓕᖕᒪᒃᓴᐅᑎᓄᑦ ᐊᒻᒪᓗ ᐱᓇᓱᐊᕋᑦᓴᓄᑦ ᐃᓄᓐᓄᑦ ᐊᔪᕈᓐᓃᕐᓴᐅᑕᐅᓂᐊᖅᑐᓄᑦ ᐊᔪᓐᖏᔾᔪᑎᖃᕆᐊᓕᖕᓄᓪᓗ ᐃᖅᑲᓇᐃᔮᒃᓴᓄᑦ.
ᒪᑭᒋᐊᖅᑕ ᑐᑭᒧᐊᒍᑎᒃᓴᓄᑦ ᐸᕐᓇᐅᑏᑦ ᖁᑦᓯᑐᒻᒪᕆᒻᒦᑦᑐᖅ ᑐᑭᒧᐊᒍᑎᒃᓴᖅ ᐊᐅᓚᑦᓯᒍᑎᒃᓴᖅ ᒪᑭᒋᐊᖅᑕ ᐊᑭᓕᕐᓱᐃᒍᑎᒃᓴᖓᓂᒃ ᐊᐅᓚᑕᖏᓐᓂᓪᓗ. ᑖᓐᓇ ᐆᒪᔪᖅ ᑎᑎᕋᕐᓯᒪᔪᖅ ᕿᒥᕐᕈᓇᑦᑕᐅᔫᒥᖃᑦᑕᓂᐊᖅᑐᖅ ᓄᑖᓐᖑᕆᐊᖅᑕᐅᖃᑦᑕᕐᓗᓂᓗ, ᐱᒋᐊᕐᓗᓂ ᓯᕗᓪᓕᕐᐹᖅ ᐃᓘᓐᓈᓂᒃ ᕿᒥᕐᕈᓂᐅᓂᐊᖅᑐᖅ 2019-20.
ᐱᔾᔪᑖ
ᑖᓐᓇ ᐱᔾᔪᑖ ᐸᕐᓇᑕᐅᓯᒪᑦᓯᐊᕈᑎᒃᓴᖓ ᓄᓇᕗᒻᒥ ᐃᓄᐃᑦ ᐃᖅᑲᓇᐃᔮᒧᑦ ᐃᑲᔪᕐᓯᒪᒍᑎᒃᓴᒥᒃ ᖃᓄᐃᓐᖏᑦᓯᐊᕈᑎᒃᓴᖏᓐᓄᑦ ᐃᓄᐃᑦ. ᐸᕐᓇᑕᐅᓯᒪᑦᓯᐊᕐᓗᓂ ᐃᖅᑲᓇᐃᔮᖅ ᐃᑲᔫᑎᖃᕐᓂᐊᖅᑐᖅ ᐅᑯᓄᖓ:
- ᑲᔪᓯᑎᑦᓯᓂᖅ ᑐᕌᒐᓕᐊᖑᓯᒪᔪᒧᑦ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᐃᓘᓐᓈᒍᑦ, ᐃᓚᒋᔭᐅᓗᓂ ᑲᔪᓯᑎᑦᓯᓂᖅ ᐱᓇᓱᐊᕋᑦᓴᓂᒃ ᐃᓛᒃᑯᑦ 23 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ,
- ᓴᕐᖓᑎᑦᓯᓂᖅ ᑕᑎᒃᓴᐅᓂᕐᒥᒃ, ᒪᑭᒪᓂᕐᒥᒃ, ᐊᒻᒪᓗ ᓇᖕᒥᓂᖅ− ᒪᑭᒪᒍᓐᓇᕐᓂᖏᓐᓂᒃ ᑭᒃᑯᑐᐃᓐᓇᐃᑦ, ᐃᓚᒋᑦ, ᓄᓇᓖᓪᓗ,
- ᐱᕚᓪᓕᕈᑎᒃᓴᖅ ᓇᖕᒥᓂᖅ−ᒪᑭᒪᒍᓐᓇᓂᕐᒥᒃ ᐃᓄᐃᑦ ᐃᓚᐅᑎᑕᐅᒋᐊᒃᑲᓐᓂᕈᑎᒃᓴᖏᓐᓄᑦ ᓯᕗᓕᕐᓂᖏᓐᓄᓪᓗ ᐱᓕᕆᒡᕕᓪᓗᐊᑕᐅᔪᓂ, ᐊᒻᒪᓗ
- ᐱᕙᓪᓕᐊᑎᑦᓯᓂᖅ ᓄᓇᕗᑦ ᒪᑭᒪᔾᔪᑎᖓᓄᑦ, ᐊᒡᖢᐃᑲᓐᓂᕈᑎᒃᓴᖏᓐᓂᒃ ᑭᖑᕚᕆᔭᐅᓂᐊᖅᑐᑦ.
ᒪᑭᒋᐊᖅᑕ ᑕᑯᓐᓇᒐᖓ ᐆᒻᒪᕆᑦᑐᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᖃᕐᓂᖅ ᐃᑲᔫᑎᓕᖕᒥᒃ ᓴᕐᖓᑎᑦᓯᑲᓐᓂᕈᑎᒃᓴᒥᒃ ᐃᓄᐃᑦ ᖃᓄᐃᓐᖏᓯᐊᑲᓐᓂᕈᑎᒃᓴᖏᓐᓂᒃ ᐊᒻᒪᓗ ᓇᖕᒥᓂᖅ−ᒪᑭᒪᒍᓐᓇᓂᕐᒥᒃ, ᑕᑯᓐᓇᒐᐅᓯᒪᔪᒥᒃ ᐱᓐᖑᖅᑕᐅᓂᖓᓂ ᓄᓇᕗᑦ.
