ᑐᓂᓯᖁᔨᓂᖅ ᑐᒃᓯᕋᐅᑎᓂᒃ ᐅᖓᓯᒃᑐᒥᒃ

ᐃᓕᓐᓂᐊᕐᓂᖅ/ᐃᑭᐊᖅᑭᕕᒃᑯᑦ ᐃᓕᑉᐸᓪᓕᐊᓂᖏᑦ ᓄᓇᕗᒥ ᐃᓄᐃᑦ

 

ᒪᑭᒋᐊᖅᑕ ᐃᓄᖕᓂᑦ ᐃᓕᓐᓂᐊᖅᑎᑦᓯᓂᕐᒧᑦ ᑯᐊᐳᕇᓴᓐ (“ᒪᑭᒋᐊᖅᑕ”)

ᑐᒃᓯᕋᖅᑐᑦ ᑐᓂᓯᖁᔨᓪᓗᑎᒃ ᑐᒃᓯᕋᐅᑎᓂᒃ ᓴᖅᑭᐅᒪᑎᑕᐅᓂᒃᓴᖏᓐᓄᑦ ᐅᕝᕙᓘᓐᓃᑦ ᐋᖅᑭᒃᓲᑕᐅᔪᒃᓴᑦ ᐅᖓᓯᒃᑐᒥᒃ ᐃᓕᓐᓂᐊᕐᓂᖅ/ᐃᑭᐊᖅᑭᕕᒃᑯᑦᐃᓕᑉᐸᓪᓕᐊᔾᔪᑎᒃᓴᓄᑦ ᐱᓕᕆᐊᑦ. ᑖᒃᑯᐊ ᐱᔾᔪᑎᖓ ᑖᒃᑯᐊ ᐱᓕᕆᐊᑉ ᐱᑕᖃᖅᑎᑦᓯᖁᓪᓗᒋᑦ ᓄᓇᕗᒥ ᐃᓄᖕᓄᑦ ᐃᓕᓐᓂᐊᕐᓂᕐᒥᑦ, ᐃᓕᓐᓂᐊᑲᐃᓐᓇᕐᓂᕐᒥᑦ ᐊᒻᒪ ᐱᓕᒻᒪᒃᓴᕐᓂᕐᒧᑦ ᐃᖅᑲᓇᐃᔭᓕᕈᓐᓇᕈᑎᒃᓴᓂᒃ ᐊᒻᒪ ᖁᒡᕙᕆᐊᕐᓗᒋᑦ ᑮᓇᐅᔭᓕᐅᕈᓐᓇᕐᓂᖏᑦ ᐊᒻᒪ ᐱᕕᒃᓴᖃᖅᑎᑕᐅᓂᖏᑦ. ᒪᑭᒋᐊᖅᑕ ᑐᓂᓯᓂᐊᖅᑐᑦ ᐊᔪᓐᖏᑎᑕᐅᔪᓄᑦ ᑲᑐᔾᔨᖃᑎᒌᓄᑦ ᑎᑭᒍᓐᓇᕐᓗᒍ $250,000 ᐊᑐᓂ. ᑲᑎᓪᓗᒋᑦ ᑮᓇᐅᔭᖅᑑᑎᒃᓴᑦ ᐊᑕᐅᓯᕐᒧᑦ ᐊᕐᕌᒍᒧᑦ ᐊᑖᒍᑦ ᐃᑲᔫᑎᖃᕐᓂᕐᒧᑦ ᐱᓕᕆᐊᑦ ᐅᓄᕐᓂᖃᖅᑐᑦ $1−ᒥᓕᔭᓐ.

 

ᒪᑭᒋᐊᖅᑕ

 

ᒪᑭᒋᐊᖅᑕ ᑎᒥᓐᖑᖅᑎᑕᐅᓚᐅᖅᑐᑦ ᓴᖅᑭᓚᐅᖅᑎᓪᓗᒍ $175−ᒥᓕᔭᓐ ᓯᓚᑖᒍᑦ ᐃᖅᑲᖅᑐᐃᕖᑦ ᐊᖏᖃᑎᒌᒃᑎᓪᓗᒋᑦ ᓄᓇᕗᑦ ᑐᓐᖓᕕᒃ ᑎᒥᖓᑦ (“NTI”) ᐊᒻᒪ ᑖᒃᑯᐊ ᓄᓇᕗᑦ ᒐᕙᒪᖏᑦ ᐊᒻᒪ ᑲᓇᑕᐅᑉ ᒐᕙᒪᖏᑦ. ᒪᑭᒋᐊᖅᑕ ᑲᒪᒋᔭᖃᖅᑐᑦ ᐊᐅᓚᑕᐅᓂᖏᓐᓂᒃ ᑖᒃᑯᐊ ᐊᖏᖃᑎᒌᒍᑕᐅᓚᐅᖅᑐᑦ ᑮᓇᐅᔭᑦ ᖁᕝᕙᕆᐊᖁᓪᓗᒋᑦ ᐃᓄᐃᑦ ᐸᕐᓇᒃᓯᒪᓂᖏᑦ ᐃᖅᑲᓇᐃᔭᓕᕈᓐᓇᕐᓂᕐᒧᑦ ᐊᒻᒪ ᐊᓯᖏᓐᓄᑦ ᑮᓇᐅᔭᓕᐅᕈᑕᐅᔪᓐᓇᖅᑐᓄᑦ. ᒪᑭᒋᐊᖅᑕ ᓯᕕᑐᔪᔪᑦ ᐸᕐᓇᐅᑎᖏᑦ ᒫᓐᓇᐅᔪᖅ ᑭᖑᕚᕇᑦ ᐃᓄᐃᑦ ᐊᒻᒪ ᐃᓚᓕᐅᑎᑦᓯᐊᖁᓪᓗᒋᑦ ᐃᓅᖃᑎᒌᓄᑦ, ᐃᓕᖅᑯᓯᕐᒥᓄᑦ ᐊᒻᒪ ᑮᓇᐅᔭᓕᐅᕈᑎᖃᕈᓐᓇᑦᓯᐊᕐᓗᑎᒃ ᓄᓇᕗᒥ ᐃᑲᔫᑎᓂᐊᖅᑐᓂᒃ ᓯᕗᓂᒃᓴᒥ ᑭᖒᕚᒃᓴᓄᑦ.

 

ᒪᑭᒋᐊᖅᑕ ᐱᓕᕆᐊᒃᓴᓄᑦ ᐸᕐᓇᐅᑎᖏᑦ (ᑖᒃᑯᐊ “ᐸᕐᓇᐅᑏᑦ”), ᐃᔭᐅᔪᓐᓇᖅᑐᑦ ᐅᕙᓂ here, ᓇᓗᓇᐃᔭᐃᔪᑦ ᓯᑕᒪᓂᒃ ᐱᓕᕆᐊᒃᓴᓂ ᓯᕗᓪᓕᐅᔾᔭᐅᓯᒪᔪᑦ:

 

1. ᓯᕗᓪᓕᐅᔾᔭᐅᔪᖅ 1: ᐃᓕᓴᕋᐃᑎᑦᓯᓂᕐᒧᑦ ᐊᐅᓚᔾᔪᑏᑦ. ᑮᓇᐅᔭᐃᕈᑎᖃᕐᓗᓂ ᐃᓕᓐᓂᐊᓕᓵᖅᑐᓄᑦ ᐃᓕᑉᐸᓪᓕᐊᓂᕐᒧᑦ ᐱᔨᑦᓯᕋᐅᑎᓂᒃ ᐱᓗᐊᖅᑐᒥᒃ ᐱᔨᑦᓯᕋᖅᑐᑦ ᓄᑕᖅᑲᑦ ᐅᖃᐅᓯᖏᑎᒍᑦ, ᐱᖅᑯᓯᖏᑎᒍᑦ, ᐃᓕᖅᑯᓯᖏᑎᒍᓪᓗ, ᐱᔪᓐᓇᑦᓯᐊᖅᑐᑦ ᓯᕗᒻᒧᐊᑦᓯᐊᕈᓐᓇᕐᓂᖏᓐᓂᒃ ᑕᒪᒃᑯᓇᓂ ᐃᓕᓐᓂᐊᓕᓵᖅᑐᓂᒃ ᖁᑦᓯᖕᓂᓕᖕᓄᑦ 12, ᐃᖅᑲᓇᐃᔭᕈᓐᓇᕐᓂᕐᒧᑦ, ᐊᒻᒪ ᐃᓱᒪᒃᑯᑦ ᖃᓄᐃᓐᖏᑦᓯᐊᕐᓗᓂ ᓯᕗᒻᒧᐊᒍᑎᒃᓴᑦ.
3. ᓯᕗᓪᓕᐅᔾᔭᐅᔪᖅ 2: ᑲᑎᖅᓱᖅᓯᒪᔪᑦ ᐃᑲᔪᖅᓱᐃᔾᔪᑏᑦ ᓯᕗᒻᒧᐊᑦᓯᐊᖁᓪᓗᒋᒃᑦ ᑖᒃᑯᓇᓂ ᐃᓕᓐᓂᐊᓕᓵᖅᑐᓂᒃ ᖁᑦᓯᖕᓂᓕᖕᓄᑦ 12 ᐊᒻᒪ ᐅᖓᑖᓄᑦ. ᑕᒃᑯᐊ ᑲᑎᖅᓱᖅᓯᒪᔪᑦ ᐃᑲᔪᖅᓱᐃᔾᔪᑕᐅᔪᑦ ᐱᔾᔪᑎᖃᕋᓱᐊᖅᓯᒪᔪᑦ ᐃᓚᓕᐅᑎᓗᑎᒃ ᐊᒻᒪ ᐃᑲᔪᖅᓱᐃᓗᑎᒃ ᓄᓇᕗᑦ ᒐᕙᒪᖏᑦᑕ ᐱᓕᕆᐊᖏᓐᓂᒃ ᓴᓐᖏᒃᑎᑉᐹᓪᓕᕈᑎᒃᓴᑦ ᓄᓇᕗᒥ ᐃᓕᓐᓂᐊᕐᓂᕐᒧᑦ ᐊᐅᓚᔾᔪᑕᐅᔪᓂ ᐊᒻᒪ ᑖᒃᑯᐊ ᐃᓕᓐᓂᐊᓕᓵᖅᑐᓂᒃ ᖁᑦᓯᖕᓂᓕᖕᓄᑦ 12 ᐃᓕᓐᓂᐊᖅᑕᖏᓐᓄᑦ ᓴᖅᑭᖅᑐᑦ.
5. ᓯᕗᓪᓕᐅᔾᔭᐅᔪᖅ 3: ᑐᓐᖓᕕᖃᕈᓐᓇᕐᓂᕐᒧᑦ ᐱᓕᒻᒪᒃᓴᖅᑕᐅᓂᕐᒧᑦ ᐱᕕᒃᓴᕆᑎᑕᐅᔪᑦ ᐃᓐᓇᕐᓄᑦ. ᓄᓇᕗᑦ ᒐᕙᒪᖏᑦ ᐊᒻᒪ ᓄᓇᕗᑦ ᑐᓐᖓᕕᒃ ᑎᒥᖓᑦ ᓇᓗᓇᐃᖅᓯᓯᒪᖕᒪᑕ ᐱᑕᖃᕆᐊᖃᕐᓂᖓᓂᒃ ᑐᕌᒻᒪᕆᒃᑐᒥᒃ ᐊᒻᒪ ᒫᓐᓇᑲᐅᑎᒋ ᐱᓕᕆᐊᖑᓗᓂ ᐅᖃᓕᒫᕆᐅᖅᓴᓂᖅ, ᑎᑎᕋᕆᐅᖅᓴᓂᖅ ᐊᒻᒪ ᐃᓐᓇᕐᓄᑦ ᐃᓕᓐᓂᐊᕈᑕᐅᔪᓐᓇᖅᑐᑦ ᐃᓄᖕᓄᑦ, ᐊᔪᓐᖏᓐᓂᓴᐅᑎᓕᕈᑕᐅᔪᓐᓇᖅᑐᑦ ᐃᖅᑲᓇᐃᔭᓕᕈᓐᓇᕐᓂᕐᒧᑦ.
7. ᓯᕗᓪᓕᐅᔾᔭᐅᔪᖅ 4: ᖁᒡᕙᕆᐊᖅᓯᒪᔪᖅ ᐃᓕᓐᓂᐊᑲᐃᓐᓇᕈᑏᑦ ᐊᒻᒪ ᖁᑦᓯᖕᓂᖅᑕᓂ ᐃᓕᓐᓂᐊᕈᓐᓇᕐᓂᖅ ᐃᖅᑲᓇᐃᔭᕈᓐᓇᖁᓪᓗᒋᑦ ᐱᒻᒪᕆᐅᔪᓂ. ᖁᒡᕙᕆᐊᖅᑕᐅᒃᐸᑕ ᖁᑦᓯᖕᓂᖅᓴᓂ ᐃᓕᓐᓂᐊᕈᓐᓇᕐᓂᖅ ᐊᒻᒪ ᓇᓪᓕᐊᓐᓄᑦ ᑐᕌᖓᔪᓂᒃ ᐃᓕᓐᓂᐊᑲᐃᓐᓇᕈᓐᓇᕐᓂᖅ ᐊᑕᓂᖃᖅᑐᑦ ᐃᖅᑲᓇᐃᔭᖅᑎᒋᔭᐅᔪᒪᔪᓄᑦ ᐃᑲᔫᑎᓂᐊᖅᑐᑦ ᐃᓄᐃᑦ ᓯᕗᒻᒧᐊᒃᐸᓪᓕᐊᒍᑎᖃᕐᓂᖏᓐᓄᑦ ᐃᖅᑲᓇᐃᔮᕆᔪᒪᔭᖏᓐᓄᑦ, ᐅᓄᖅᓯᒋᐊᕈᑕᐅᒐᔭᖅᑐᑦ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᖁᑦᓯᖕᓂᖅᓴᓂ ᐊᔪᓐᖏᓐᓂᖃᕆᐅᖃᖅᑐᑦ ᒫᓐᓇᒫᖑᒋᐊᖅᑐᖅ.

ᒪᑭᒋᐊᖅᑕ ᕿᓂᕐᒪᑦ ᐱᓕᕆᐊᓂᒃ ᖁᒡᕙᕆᐊᕈᑎᒃᓴᓂᒃ ᓯᕗᓪᓕᐅᔾᔭᐃᓯᒪᔪᒧᑦ 2 ᐊᒻᒪ 4 ᑕᒡᕙᓂ ᑐᒃᓯᕋᐅᑎᓂᒃ ᑐᓂᓯᖁᔨᔾᔪᑎᓄᑦ.

 

ᑲᑐᔾᔨᖃᑎᒌᑦ ᑲᔪᖏᓴᖅᑕᐅᕗᑦ ᕿᒥᕐᕈᖁᔭᐅᓪᓗᑎᒃ ᑖᒃᑯᓂᖓ ᐸᕐᓇᐅᑎᓂᒃ ᐸᕐᓇᐅᑎᖃᖅᐸᓪᓕᐊᓗᑎᒃ ᑐᒃᓯᕋᐅᑎᒋᓂᐊᖅᑕᒥᓂᒃ.

 

 

ᐊᖏᓂᖓ ᐱᓕᕆᐊᑉ

 

ᐊᑯᓂᐅᑎᒋᓂᖅᐹᕆᓂᐊᖅᑕᖏᑦ ᓴᖅᑭᐅᒪᑎᑕᐅᓂᖏᑦᑕ ᓇᓪᓕᐊᑐᐃᓐᓇᖅ ᐱᓕᕆᐊᖅ ᐃᑲᔫᑕᐅᔪᑦ ᐊᕐᕌᓪᓗᐊᒥᒃ ᐊᑕᐅᓯᕐᒥᑦ. ᒪᑭᒋᐊᖅᑕ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᑐᒃᓯᕋᐅᑎᓂᒃ ᒪᑯᓄᖓ:

 

1. ᐱᓕᕆᐊᑦ ᐱᐊᓂᒃᑕᐅᔪᓐᓇᖅᑐᑦ ᐊᕐᕌᒍᓪᓗᐊᒥ; ᐅᕝᕙᓘᓐᓃᑦ
2. ᐃᓕᓐᓂᐊᑲᐃᓐᓇᕈᑏᑦ ᐱᐊᓂᒃᑕᐅᔪᓐᓇᖅᑐᑦ ᐊᕐᕌᒍᓪᓗᐊᒥ ᐃᓚᒋᔭᐅᓗᑎᒃ ᐅᓄᖅᑐᓄᑦ ᐊᕐᕌᒍᓄᑦ ᐱᓕᕆᐊᓄᑦ (ᓲᕐᓗ ᐃᓕᑕᕆᔭᐅᔾᔪᑎᑖᕋᓱᐊᕈᑏᑦ ᐱᓕᕆᐊᑦ).

 

ᒪᑭᒋᐊᖅᑕ ᐅᖃᓕᒪᖃᑎᖃᕈᓐᓇᖅᑐᑦ ᐱᖃᑎᒋᓗᒋᑦ ᑲᑐᔾᔨᖃᑎᒌᑦ ᓂᕈᐊᖅᑕᐅᔪᑦ ᐊᑖᒍᑦ ᑖᑦᓱᒪ ᑐᒃᓯᕋᐅᑎᓂᒃ ᑐᓂᓯᖁᔨᓂᒃᑯᑦ ᐋᖅᑭᒃᓱᐃᓂᐊᕐᓗᑎᒃ ᐊᒻᒪ ᑮᓇᐅᔭᖃᕈᑕᐅᓂᐊᖅᑐᓂᒃ ᐅᓄᖅᑐᓄᑦ−ᐊᕐᕌᒍᓄᑦ ᐃᓕᑕᕆᔭᐅᔾᔪᑎᑖᕋᓱᐊᕐᓂᕐᒧᑦ, ᐅᕝᕙᓘᓐᓃᑦ ᐃᓕᓐᓂᐊᕈᑏᑦ ᐃᓕᑕᕆᔭᐅᔾᔪᑎᑖᕈᑕᐅᔪᓐᓇᖅᑐᑦ.

 

ᒪᑭᒋᐊᖅᑕ ᐊᖏᖃᑎᒌᒐᓱᐊᕈᑎᖃᕈᓐᓇᖅᑐᑦ ᐱᓕᕆᐊᒃᓴᑦ ᐱᒋᐊᕐᕕᒃᓴᖏᓐᓂᒃ ᐊᒻᒪ ᐊᑯᓂᐅᑎᒋᓂᐊᕐᓂᖏᓐᓂᒃ ᐱᖃᑎᒋᓗᒋᒃ ᓂᕈᐊᖅᑕᐅᔪᑦ ᑲᑐᔾᔨᖃᑎᒌᑦ.

 

ᒪᑭᒋᐊᖅᑕ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᐅᖓᓯᒃᑐᒥᑦ/ᐃᑭᐊᖅᑭᕕᒃᑯᑦ ᐃᓕᓐᓂᐊᕈᑏᑦ ᐊᔾᔨᒌᓐᖏᑦᑑᑎᐅᔪᑦ ᐃᓚᐅᓪᓗᑎᒃ:

 

• ᐃᓄᐃᑦ ᐅᖃᐅᓯᓕᕆᔭᐅᓂᖏᑦ, ᐃᓕᖅᑯᓯᓕᕆᔭᐅᓂᖏᓪᓗ
• ᐃᓕᓐᓂᐊᖅᑏᑦ ᐃᓕᓐᓂᐊᕐᓂᖏᑦ ᐅᕝᕙᓘᓐᓃᑦ ᑎᑭᐅᑎᒐᓱᐊᕐᓂᖏᓐᓄᑦ ᐃᑲᔪᖅᓱᐃᓂᖅ [K-12]
• ᐊᓯᖏᑦ ᐅᖃᐅᓰᑦ ᐱᐅᓯᕚᓪᓕᕈᑕᐅᓂᐊᖅᑐᑦ ᐃᓕᓐᓂᐊᖅᑎᐅᑉ ᐃᓕᓐᓂᐊᖅᑕᖏᓐᓄᑦ ᓴᖅᑭᑎᑕᐅᔪᑦ ᐅᕝᕙᓘᓐᓃᑦ ᐃᓕᓐᓂᐊᕌᓂᒃᑐᑦ ᐅᓄᕐᓂᖏᓐᓄᑦ
• ᒥᖅᓱᖅᑏᑦ, ᐊᓐᓄᕌᒃᓴᑦ ᓴᓇᒪᓂᒃᓴᖏᓐᓂᒃ ᑎᑎᕋᐅᔭᖅᑏᑦ ᐊᒻᒪ ᓂᐅᕕᐊᒃᓴᓕᐅᕐᓂᕐᒧᑦ ᓴᖅᑭᑎᑦᓯᓂᖅ [ᓄᕕᖅᓴᖅ/ᑎᑎᕋᐅᔭᕐᓂᖅ]
• ᓴᓇᓐᖑᐊᕐᓂᖅ ᐊᒻᒪ ᓴᓇᓂᖅ ᐊᒡᒐᒻᒥᕈᔪᖕᓂᑦ ᐊᓯᖏᓐᓂᓪᓗ
• ᑮᓇᐅᔭᓕᐅᕈᑎᖃᕐᓂᖅ ᓂᕿᓂᒃ ᐃᓚᐅᓗᑎᒃ ᐃᖃᓗᒃᐲᑦ, ᑐᒃᑐ ᐊᒻᒪ ᐅᒥᖕᒪᒃ
• ᑲᑐᔾᔨᖃᑎᒌᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᓐᖏᑦᑐᓄᑦ ᐊᐅᓚᒍᑕᐅᔪᑦ, ᐊᓪᓚᒡᕕᓕᕆᓂᖅ ᐊᒻᒪ ᑮᓇᐅᔭᖅᑑᑎᒃᓴᓕᐅᕐᓂᖅ
• ᓇᖕᒥᓂᖃᕐᓂᖅ, ᓇᖕᒥᓂᖅᑖᕋᓱᐊᕐᓂᖅ
• ᑐᓴᖃᑦᑕᐅᑎᓕᕆᔾᔪᑎᓕᕆᓂᖅ ᐊᒻᒪ ᓇᕿᑦᑕᕆᐊᓕᖕᓂᑦ ᐱᓕᕆᔾᔪᑎᓂᒃ
• ᖃᐅᔨᒪᔨᑕᐅᓂᕐᒧᑦ ᐱᔨᑦᓯᕋᕐᓂᖅ
• ᒪᓕᒐᑦ [ᐃᓚᐅᓗᑎᒃ, ᒪᓕᒃᑎᑦᑎᔩᑦ, ᐃᑲᔪᖅᑕᐅᕕᓕᕆᓂᖅ, ᐃᑲᔪᖅᑎᐅᓂᕐᒧᑦ ᐃᓕᓐᓂᐊᕐᓂᖅ, ᐱᕋᔭᒃᑐᓕᕆᔨᐅᓂᖅ ᐊᒻᒪ ᑕᖅᑲᒃᑯᓄᖓ ᐊᐅᓚᑦᓯᓂᖅ]
• ᐃᓗᐊᖅᓴᐅᑎᓕᕆᓂᖅ ᐊᒻᒪ ᖃᐅᔨᓴᐃᓂᕐᒧᑦ ᖃᐅᔨᒐᓱᐊᕐᓂᖅ
• ᐆᒪᔪᓕᕆᓂᖅ ᐊᒻᒪ ᖃᐅᔨᓴᕐᓂᖅ
• ᑐᓵᔨᐅᓂᖅ ᐊᒻᒪ ᐃᓄᒃᑎᑑᓕᕆᓂᖅ/ᖃᓪᓗᓈᑎᑑᓕᕆᓂᖅ
• ᐃᓱᒪᓕᕆᓂᖅ ᐊᒻᒪ ᐃᓅᓯᓕᕆᓂᖅ
• ᑐᖁᓕᖅᑐᓄᑦ, ᐋᓐᓂᐊᖏᓐᓇᓕᖅᑐᓄᑦ ᐱᔨᑦᓯᕋᐅᑦ ᐊᒻᒪ ᐸᖅᑭᒍᑕᐅᖏᓐᓇᕐᓂᐊᖅᑐᑦ
• ᑮᓇᐅᔭᓕᕆᓂᖅ
• ᐆᒪᔪᓕᕆᓂᖅ ᐊᒻᒪ ᐊᓯᖏᑦ ᓄᓇᐃᑦ ᐱᖅᑯᓯᖏᓐᓂᒃ ᖃᐅᔨᓴᕈᑎᖃᕐᓂᖅ
• ᐃᖏᕐᕋᔪᓕᕆᓂᖅ
• ᓴᓇᓯᒪᑦᓯᐊᕆᐊᓕᖕᓂᑦ ᖃᐅᔨᒪᔨᑕᐃᑦ
• ᐅᔭᕋᐃᑦ ᖃᓄᐃᑦᑑᓂᖏᓐᓂᒃ ᖃᐅᔨᒪᔪᑦ
• ᐃᓄᓕᕆᓂᖅ
• ᑎᑎᕋᖅᑎᐅᓂᖅ ᑐᓴᒐᓴᓂ, ᓴᓇᓐᖑᐊᕈᓘᔭᖅᓯᒪᔪᑦ ᐊᒻᒪ ᑐᓴᖃᑦᑕᐅᑎᓕᕆᓂᖅ
• ᑕᕐᕆᔭᐃᑦ, ᐊᒻᒪ ᐊᐅᓚᔫᓕᐅᕐᓂᖅ
• ᐃᓕᓐᓂᐊᕐᓂᐊᓕᓵᖅᑐᓂᒃ ᐃᓕᓐᓂᐊᖅᑎᑦᓯᓂᖅ
• ᐃᓕᓐᓂᐊᖅᑐᓕᕆᓂᖅ ᐊᒻᒪ ᐃᓕᓴᐃᔩᑦ ᐃᓕᓐᓂᐊᕐᓂᖏᑦ
• ᐊᐅᓚᑦᓯᔨᐅᓂᖅ ᐊᒻᒪ ᐃᖅᑲᓇᐃᔭᖅᑐᓕᕆᓂᖅ
• ᐱᓕᕆᐊᓂᒃ ᐊᐅᓚᑦᓯᓂᖅ, ᑳᓐᑐᕌᖕᓂᕐᓗ
• ᐃᒡᓗᓂᒃ ᓂᐅᕕᖅᑎᑦᓯᖃᑦᑕᕐᓂᖅ, ᐱᖁᑎᓂᒃ, ᓄᓇᓂᒃ ᐅᕝᕙᓘᓐᓃᑦ ᐃᒡᓗᓕᐅᖅᑕᐅᔪᓂᒃ ᐊᐅᓚᑦᓯᓂᖅ
• ᐃᖅᑲᓇᐃᔮᒥᓂᒃ ᖃᐅᔨᒪᔪᑦ ᐊᒻᒪ ᐃᖅᑲᓇᐃᔮᕆᒍᒪᔭᒥᓂᒃ ᐃᓕᓐᓂᐊᕐᓂᖅ
• ᐅᔭᕋᖕᓂᐊᕐᓂᖅ, ᖃᓗᕋᕐᓂᖅ
• ᓂᕿᓕᐅᖅᑎᐅᓂᖅ ᐊᒻᒪ ᓴᓇᓯᒪᔪᓂᒃ ᓂᕿᖃᖅᑎᑦᓯᓂᖅ
• ᐃᑦᑕᕐᓂᑕᓕᕆᓂᖅ ᐊᒻᒪ ᓇᑭᓐᖔᕐᓂᐅᔪᓂᒃ ᖃᐅᔨᒐᓱᐊᕐᓂᖅ
• ᐳᓚᕋᑦᑐᓕᕆᓂᖅ ᐊᒻᒪ ᑮᓇᐅᔭᓕᐅᕈᑎᒃᓴᓂᒃ ᐱᕙᓪᓕᐊᑎᑦᓯᓂᖅ
• ᓂᐅᕕᕐᕕᖃᕐᓂᖅ ᐊᒻᒪ ᑐᓐᖓᓱᒃᑎᑦᓯᔨᐅᓂᕐᒥᑦ ᐊᐅᓚᑦᓯᔨᐅᓂᖅ
• ᐱᓐᖑᐊᖅᑐᓕᕆᓂᖅ
• ᑐᓴᖃᑦᑕᐅᑎᓕᕆᓂᖅ
• ᒐᕙᒪᓕᕆᓂᕐᒥᑦ ᐃᓕᓐᓂᐊᕐᓂᖅ, ᑕᖅᑲᒃᑯᓄᖓ ᐊᐅᓚᑕᐅᔪᑦ ᐊᒻᒪ ᐊᑐᐊᒐᒃᓴᓂᒃ ᐱᕙᓪᓕᐊᑎᑦᓯᓂᖅ

 

ᐱᔪᓐᓇᖅᑎᑕᐅᔪᑦ ᑲᑐᔾᔨᖃᑎᒌᑦ

 

ᒪᑭᒋᐊᖅᑕᒃᑯᑦ ᑐᓂᓯᒍᓐᓇᕐᓂᐊᖅᑐᑦ ᑐᒃᓯᕋᐅᑎᓂᒃ ᒪᑯᓂᖓᑦ:

 

• ᑲᑐᔾᔨᖃᑎᒌᑦ ᑎᑎᖅᑕᐅᓯᒪᔪᑦ ᑮᓇᐅᔭᓕᐅᕋᓱᐊᕋᑎᒃ ᑲᑐᔾᔨᖃᑎᒌᑦ ᓄᓇᕗᒥ ᐊᒻᒪ ᒪᓕᒃᓯᒪᑦᓯᐊᖅᑐᑦ ᐊᑐᕆᐊᓕᖕᓂᑦ ᓄᓇᕗᒥ ᑎᑎᖅᑕᐅᓯᒪᒋᐊᖃᕐᓂᕐᒧᑦ.
• ᑮᓇᐅᔭᓕᐅᕈᑎᖃᕈᓐᓇᖅᑐᑦ ᑲᑐᔾᔨᖃᑎᒌᑦ ᓚᐃᓴᓐᓯᖃᖅᑐᑦ ᐊᒻᒪ ᑎᑎᖅᑕᐅᓯᒪᔪᑦ ᓇᖕᒥᓂᖃᖅᑐᓄᑦ ᓄᓇᕗᒥ.
• ᑮᓇᐅᔭᓕᐅᕋᓱᐊᕋᑎᒃ ᐅᕝᕙᓘᓐᓃᑦ ᑮᓇᐅᔭᓕᐅᕈᑎᖃᕈᓐᓇᖅᑐᑦ ᑲᑐᔾᔨᖃᑎᒌᑦ ᑎᑎᖅᑕᐅᓯᒪᔪᑦ ᐊᕕᒃᑐᖅᓯᒪᓂᖃᕐᕕᖕᒥᓂ ᐅᕝᕙᓘᓐᓃᑦ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᓐᓂ ᐊᒻᒪ ᑎᑎᖅᑕᐅᓯᒪᔪᑦ ᐊᕕᒃᑐᖅᓯᒪᓂᐅᔪᒥ ᑯᐊᐳᕇᓴᕆᔭᐅᓪᓗᓂ ᓄᓇᕗᒥ.

ᑲᑐᔾᔨᖃᑎᒌᖑᔪᑦ ᖃᐅᔨᔭᐅᔪᑦ ᑲᒪᑦᓯᐊᖏᓐᓂᖏᑦ ᐅᕝᕙᓘᓐᓃᑦ ᐱᓕᕆᔾᔪᑎᖃᑦᓯᐊᖏᑦᑐᑦ ᐊᐅᓚᒍᑎᒃᓴᖏᓐᓂᒃ ᐱᓕᕆᐊᑦ ᐃᓱᒪᒋᔭᐅᕗᖅ ‘ᓵᑕᒃᓴᐅᖏᓐᓂᖓᓂᒃ’ ᑖᓐᓇ ᑐᓂᓯᖁᔨᓂᖅ ᑐᒃᓯᕋᐅᑎᓂᒃ ᐱᓪᓗᒍ. ᑕᒪᑐᒪ ᐃᓱᐊᓄᑦ, ᒪᑭᒋᐊᖅᑕ ᐃᓱᒪᒋᔭᐅᔪᓐᓇᖅᑐᖅ ‘ᓵᑕᒃᓴᐅᖏᓐᓂᖓᓂᒃ’ ᓇᓪᓕᐊᓐᓄᑐᐃᓐᓇᖅ ᒪᑯᓂᖓ ᐱᔾᔪᑎᖃᕐᓗᑎᒃ ᑖᓐᓇ ᑲᑐᔾᔨᖃᑎᒌᑦ ᐃᒪᐃᑦᑐᖅ:

 

• ᑕᖅᑭᐅᖅᑲᐅᔪᓂ 12−ᓂ ᒪᓕᓐᖏᓯᒪᒃᐸᑕ ᑳᓐᑐᕌᒥᒃ, ᑳᓐᑐᕌᓂᓪᓘᓐᓃᑦ ᑖᒃᑯᓇᓐᖓᑦ ᒪᑭᒋᐊᖅᑕᒃᑯᓐᓂᒃ, ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ ᐅᕝᕙᓘᓐᓃᑦ ᐱᓕᕆᖃᑎᖏᓐᓂᒃ.
• ᐱᔾᔪᑎᖃᕐᓗᓂ ᑳᓐᑐᕌᒥᒃ ᒪᓕᓐᖏᓐᓂᕐᒧᑦ, ᐊᒥᐊᒃᑯᖏᓐᓂᒃ ᐊᑭᓕᒃᓴᖃᕐᓗᓂ ᒪᑭᒋᐊᖅᑕᒃᑯᓐᓄᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ ᐅᕝᕙᓘᓐᓃᑦ ᐱᓕᕆᖃᑎᖏᓐᓂᒃ ᐅᕝᕙᓘᓐᓃᑦ ᑮᓇᐅᔭᐃᑦ ᐅᑎᖅᑎᑕᐅᒃᐸᑕ ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ ᐅᕝᕙᓘᓐᓃᑦ ᐱᓕᕆᖃᑎᖏᓐᓄᑦ.
• ᑐᓂᓯᓯᒪᓐᖏᑉᐸᑦ ᒪᑭᒋᐊᖅᑕᒃᑯᓐᓄᑦ, ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐅᕝᕙᓘᓐᓃᑦ ᐱᓕᕆᖃᑎᖏᓐᓄᑦ ᑮᓇᐅᔭᓕᕆᔾᔪᑎᕕᓂᕐᓂᑦ, ᐊᓯᖏᓐᓕᓪᓘᓐᓃᑦ ᓇᓗᓇᐃᖅᓯᔾᔪᑎᓂᒃ ᑎᑎᕋᖅᓯᒪᔪᓂᒃ ᐱᑕᖃᕆᐊᖃᖅᑎᑕᐅᔪᓂᒃ ᑳᓐᑐᕌᒃᑯᑦ.
• ᑭᓱᑐᐃᓐᓇᕐᒥᑦ ᐱᔾᔪᑎᖃᕐᓗᓂ, ᑭᖑᓂᕆᓯᒪᔭᑦᑎᓐᓂ ᐊᔪᖅᑎᑕᐅᓯᒪᒃᐸᑦ ᑐᓂᓯᒍᓐᓇᕐᓂᖓ ᑐᒃᓯᕋᐅᑎᓂᒃ ᐅᕝᕙᓘᓐᓃᑦ ᑳᓐᑐᕌᖃᑎᖃᕆᐊᒃᓴᖅ ᑖᒃᑯᓂᖓ ᒪᑭᒋᐊᖅᑕ, ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ ᐅᕝᕙᓘᓐᓃᑦ ᐱᓕᕆᖃᑎᖏᓐᓂᒃ.
• ᖃᐅᔨᓴᖅᑕᐅᓂᖃᖅᐸᑦ ᐃᖅᑲᖅᑐᐃᕕᒃᑯᑦ ᐅᕝᕙᓘᓐᓃᑦ ᐊᓯᖏᓐᓄᑦ ᐱᔪᓐᓇᐅᑎᖃᖅᑐᓄᑦ ᐅᕝᕙᓘᓐᓃᑦ

ᑭᓇ, ᑎᒥᐅᓪᓗᓂ ᐅᕝᕙᓘᓐᓃᑦ ᑎᒃᑯᐊᖅᓯᒪᔭᖏᑦ ᖃᐅᔨᓴᖅᑕᐅᓂᖃᖅᐸᑕ ᐱᕋᔭᒃᑐᕕᓂᐅᓂᕐᒧᑦ ᑎᒡᓕᒡᓗᓂ ᐅᕝᕙᓘᓐᓃᑦ ᐊᓯᖏᑎᒍᑦ ᑮᓇᐅᔭᓕᕆᓂᒃᑯᑦ ᐱᑦᓯᐊᖏᓐᓂᕐᒧᑦ.

ᐊᑐᕆᐊᓖᑦ ᑐᓂᓯᓂᐊᕐᓗᓂ ᑐᒃᓯᕋᐅᑎᓂᒃ

 

ᐃᓘᓐᓇᑎᒃ ᑐᒃᓯᕋᐅᑏᑦ ᒪᓕᒋᐊᖃᖅᑐᑦ ᒪᓕᖁᔭᐅᔪᓂᒃ ᒪᑭᒋᐊᖅᑕ ᐃᑲᔫᑎᖃᕐᓂᖏᓐᓄᑦ ᐱᓕᕆᐊᓄᑦ ᑐᒃᓯᕋᐅᑎᑎᒍᑦ ᑕᑕᑎᕆᐊᓖᑦ. ᑖᒃᑯᐊ ᑐᒃᓯᕋᐅᑏᑦ ᐱᔭᐅᔪᓐᓇᖅᑐᑦ ᐅᕙᓂ www.tunngavik.com, ᐊᒻᒪ ᑲᑐᔾᔨᖃᑎᒌᑦ ᕿᒥᕐᕈᔪᒃᓴᐅᕗᑦ ᑐᒃᓯᕋᐅᑎᓂᒃ ᐅᔾᔨᖅᑐᑦᓯᐊᕐᓗᒋᑦ ᖃᓄᐃᓕᖓᓂᖏᑦ ᐱᔾᔪᑎᒋᓪᓗᒋᑦ ᑐᑭᓯᒋᐊᕈᑎᒃᓴᑦ ᐊᒻᒪ ᑎᑎᕋᖅᓯᒪᔪᑦ ᐱᑕᖃᕆᐊᖃᖅᑎᑕᐅᔪᑦ ᐃᓘᓐᓇᖏᓐᓂ ᑐᒃᓯᕋᐅᑎᓂ.

 

ᑲᑐᔾᔨᖃᑎᒌᑦ ᐱᑕᖃᖅᑎᑦᓯᒋᐊᖃᕐᒥᔪᑦ ᓇᓗᓇᐃᖅᓯᔾᔪᑎᓂᒃ ᒪᓕᑦᓯᐊᕐᓂᖏᓐᓂᒃ, ᓲᕐᓗ ᑎᑎᖅᑕᐅᓯᒪᔾᔪᑏᑦ ᐊᑖᒍᑦ ᑲᑐᔾᔨᖃᑎᒌᑦ ᐱᖁᔭᖏᑦ, ᑖᒃᑯᐊ ᓇᖕᒥᓂᖃᕐᓂᕐᒧᑦ ᑯᐊᐳᕇᓴᓐ ᐱᖁᔭᖏᑦ, ᑖᒃᑯᐊ ᐃᓄᐃᑦ ᓇᖕᒥᓂᖃᖅᑐᑦ ᑎᑎᖅᑕᐅᓯᒪᕕᖏᑦ ᐅᕝᕙᓘᓐᓃᑦ ᑖᒃᑯᐊ ᓄᓇᕗᒥ ᓇᖕᒥᓂᖃᖅᑐᓄᑦ ᑎᑎᖅᑕᐅᓯᒪᕖᑦ ᐊᑐᐊᒐᑦ, ᐅᕝᕙᓘᓐᓃᑦ ᓇᓗᓇᐃᖅᓯᔾᔪᑏᑦ ᒪᓕᑦᓯᐊᕈᑎᓂᒃ ᐱᖁᔭᐅᔪᓂᒃ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᐅᔪᓂ ᒪᓕᒋᐊᖃᖅᑎᑕᐅᔪᑦ ᐃᓚᓕᐅᑎᓯᒪᔪᑦ.

 

ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᑦᓯᐊᕆᐊᓖᑦ ᐱᓪᓗᒋᑦ ᓇᓪᓕᐊᑐᐃᓐᓇᖅ ᑐᒃᓯᕋᐅᑕᐅᔪᖅ ᑐᓂᔭᐅᓂᐊᖅᑐᑦ ᑭᐅᔾᔪᑎᒋᓪᓗᒋᑦ ᑖᑦᓱᒧᖓ ᑐᓂᓯᖁᔨᔾᔪᑎᓂᒃ ᑐᒃᓯᕋᐅᑎᓂᒃ ᐊᒻᒪ ᑐᓂᓯᓗᑎᒃ ᓇᖕᒥᓂᖅ, ᑎᑎᖅᑲᑎᒍᑦ, ᓱᑲᔪᒃᑯᑦ ᐅᕝᕙᓘᓐᓃᑦ: ᖃᕆᓴᐅᔭᒃᑯᑦ ᑐᓂᓯᔾᔪᑎᑎᒍᑦ ᐅᕗᖓ:

 

Makigiaqta Inuit Training Corporation

P.O. Box 638

Building 626 [1^st floor, Tumiit Plaza]

Iqaluit, NU X0A 0H0

ᐅᖃᓘᑖ:      (867)-979-7923

ᓱᑲᔪᒃᑯᑦ: (867)-979-7925.

ᖃᕆᑕᐅᔭᒃᑯᑦ ᑐᕌᕈᑦ: makigiaqta@tunngavik.com.

 

ᐃᓱᓕᕝᕕᐊ ᑐᓂᓯᒍᓐᓇᕐᓂᐅᑉ ᑐᒃᓯᕋᐅᑎᓂᒃ

 

ᑲᑐᔾᔨᖃᑎᒌᑦ ᑐᓂᓯᓯᒪᒋᐊᖃᕐᓂᐊᖅᑐᑦ ᑐᒃᓯᕋᐅᑎᒥᓂᒃ ᐅᖓᑖᓂᐅᓐᖏᑦᑐᖅ 5ᐅᓐᓄᒃᓴᒃᑯᑦ ᐅᓪᓗᐊᓂ ᔫᓂ 8, 2020.

 

ᑐᒃᓯᕋᐅᒻᒥᒃ ᒪᓕᓐᖏᑦᑐᖃᖅᐸᑦ ᒪᑭᒋᐊᖅᑕᒃᑯᑦ ᒪᓕᒋᐊᖃᖅᑎᑕᖏᓐᓂᒃ, ᑕᒃᑯᐊ ᑲᑐᔾᔨᖃᑎᒌᑦ ᑐᒃᓯᕋᕐᕕᐅᓂᐊᖅᑐᑦ ᐋᖅᑭᒋᐊᕆᖁᔭᐅᓗᑎᒃ ᐊᒻᒪ ᑐᓂᓯᒃᑲᓐᓂᖁᔭᐅᓗᑎ ᑐᒃᓯᕋᐅᑎᓂᒃ ᑐᖔᒍᑦ ᐃᓱᓕᕝᕕᒃᓴᐅᔫᑉ ᐅᓪᓗᖓᑕ.

 

ᒪᑭᒋᐊᖅᑕᒃᑯᑦ ᐃᓱᒪᒃᓴᖅᓯᐅᕈᑎᖃᔾᔮᖏᑦᑐᑦ ᑐᒃᓯᕋᐅᑎᓂᒃ ᐱᔭᐅᔪᓂᒃ ᐅᕝᕙᓘᓐᓃᑦ ᐋᖅᑭᒋᐊᖅᑕᐅᓯᒪᔪᓂᒃ ᐊᒻᒪ ᐊᑐᖁᔨᕗᑦ ᑖᒃᑯᐊ ᑲᑐᔾᔨᖃᑎᒌᑦ ᑐᓂᑲᐅᑎᒋᖁᓪᓗᒋᑦ ᑐᒃᓯᕋᐅᑎᒥᓂᒃ ᐊᔪᕐᓇᕈᓐᓃᑐᐊᖅᐸᑦ ᐅᕝᕙᓘᓐᓃᑦ ᐅᖃᕐᕕᒋᓗᒋᑦ ᒪᑭᒋᐊᖅᑕᒃᑯᑦ ᒪᓕᑦᓯᐊᖁᓪᓗᒋᑦ ᓇᓪᓕᐊᓐᓂᑐᐃᓐᓇᖅ ᑐᒃᓯᕋᐅᑎᓂ ᑐᓂᔭᖏᓐᓂᒃ ᒪᓕᒋᐊᖃᖅᑎᑕᐅᔪᓂᒃ.

 

ᑲᒪᒋᔭᖃᖅᑐᑑᕗᑦ ᑲᑐᔾᔨᖃᑎᒌᑦ ᑖᒃᑯᐊ ᒪᑭᒋᐊᖅᑕᒃᑯᑦ ᑎᒍᓯᓯᒪᒋᐊᖃᕐᓂᖏᓐᓂᒃ ᑐᒃᓯᕋᐅᑎᓂᒃ ᑐᖔᒍᑦ ᐃᓱᓕᕝᕕᒃᓴᐅᑉ ᑐᓂᓯᓂᕐᒧᑦ.

 

ᐊᐱᖅᑯᑏᑦ ᐱᓪᓗᒍ ᑖᓐᓇ ᑐᓂᓯᖁᔨᓂᖅ ᑐᒃᓯᕋᐅᑎᓂᒃ

 

ᑲᑐᔾᔨᖃᑎᒌᑦ ᑐᓂᓯᔪᓐᓇᖅᑐᑦ ᓇᓪᓕᐊᓐᓂᑐᐃᓐᓇᖅ ᐊᐱᖅᓲᑎᓂᒃ ᐱᔾᔪᑎᒋᓗᒋᑦ ᑖᒃᑯᐊ ᑐᓂᓯᖁᔨᔾᔪᑏᑦ ᑐᒃᓯᕋᐅᑎᓂᒃ ᐅᕗᖓ: ᕌᓐᑎ ᖃᒪᓂᖅ, ᑐᑭᒧᐊᒃᑎᑦᑎᔨ ᐱᓕᕆᕕᐊᓂ ᐃᓄᐃᑦ ᐃᓕᓐᓂᐊᖅᑎᑕᐅᔾᔪᑎᖏᓐᓄᑦ ᐱᓕᕆᐊᓄᑦ ᐊᒻᒪ ᒪᑭᒋᐊᖅᑕ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᑯᐊᐳᕇᓵᓐ ᐅᕙᓂ RQamaniq@tunngavik.com.

 

ᒪᑭᒋᐊᖅᑕᒃᑯᑦ ᕿᒥᕐᕈᓂᖏᑦ ᑐᒃᓯᕋᐅᑎᓂᒃ

 

ᑕᒪᒃᑯᐊ ᑐᒃᓯᕋᐅᑏᑦ ᖃᐅᔨᓴᖅᑕᐅᓂᖅᑐᑦ ᑖᒃᑯᓄᖓ ᒪᑭᒋᖅᑕ ᐱᓕᕆᐊᓂᒃ ᑲᑎᒪᔨᕋᓛᖏᓐᓄᑦ ᓇᓗᓇᐃᕆᐊᕐᓗᒋᑦ ᒪᓕᑦᓯᐊᕐᒪᖔᑕ ᑖᑦᓱᒥᖓ ᑐᓂᓯᖁᔾᔪᑎᓂᒃ ᑐᒃᓯᕋᐅᑎᓂᒃ. ᑐᒃᓯᕋᐅᑏᑦ ᕿᒥᕐᕈᔭᐅᓂᐊᖅᑐᑦ ᑖᒃᑯᓄᖓ ᐅᖃᐅᔾᔨᒋᐊᕆᓂᕐᒧᑦ ᑲᑎᒪᔨᕋᓛᓄᑦ. ᑖᒃᑯᐊ ᐅᖃᐅᔾᔨᒋᐊᕆᓂᕐᒧᑦ ᑲᑎᒪᔨᕋᓛᑦ ᓇᒃᓯᐅᔾᔨᓂᐊᖅᑐᑦ ᓂᕈᐊᖅᑕᐅᔪᓂᒃ ᑐᒃᓯᕋᐅᑎᓂᒃ ᒪᑭᒋᐊᖅᑕ ᑲᑎᒪᔨᖏᓐᓄᑦ ᐊᒻᒪ ᑖᒃᑯᐊ ᑲᑎᒪᔩᑦ ᑭᖑᓪᓕᖅᐹᒥ ᐃᓱᒪᓕᐅᕈᑎᖃᕐᓂᐊᖅᑐᑦ ᓂᕈᐊᖅᑕᐅᓂᖏᓐᓂᒃ ᑐᒃᓯᕋᐅᑏᑦ.

 

ᑐᒃᓯᕋᐅᑏᑦ ᖃᐅᔨᓴᖅᑕᐅᓂᐊᖅᑐᑦ ᐊᑐᕐᓗᒋᑦ ᒪᑯᐊ ᑐᓐᖓᕕᐅᓂᐊᖅᑐᑦ:

 

1. ᑖᒃᑯᐊ ᑲᑐᔾᔨᖃᑎᒌᑦ ᑐᒃᓯᕋᐅᑎᖏᑦ ᖁᒡᕙᕆᐊᕆᔪᑦ ᒪᑭᒋᐊᖅᑕ ᑐᕌᒐᖏᓐᓂᒃ ᐊᑖᒍᑦ ᓯᕗᓪᓕᐅᔾᔭᐅᓯᒪᔪᑦ 2 ᐊᒻᒪ 4, ᐊᒻᒪ ᑖᓐᓇ ᐱᓕᕆᐊᖑᓂᐊᖅᑐᖅ ᐊᑐᖅᑕᐅᔪᓐᓇᕐᒪᖔᑦ ᓄᓇᕗᓕᒫᒥ, ᐅᕝᕙᓘᓐᓃᑦ ᐃᓘᓐᓇᖏᓐᓂ ᐱᖓᓱᓂ ᐊᕕᒃᑐᖅᓯᒪᓂᐅᔪᓂ: 50%. ᕿᒥᕐᕈᓗᓂ ᑐᒃᓯᕋᐅᑎᓂᒃ, ᑖᒃᑯᐊ ᑲᑎᒪᔨᕋᓛᑦ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᑲᑐᔾᔨᖃᑎᒌᑦ ᑐᒃᓯᕋᐅᑎᖏᑦ ᐃᓗᓕᖃᖅᑐᒃ:

• ᐱᑕᖃᖅᑎᑦᓯᔪᑦ ᐃᓕᓴᐃᓂᕐᒥᑦ ᐃᓄᒃᑐᑦ.
• ᐃᓚᐅᓗᑎᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᓴᖅᑭᐅᒪᑎᑕᐅᓂᖏᓐᓄᑦ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓴᐃᓂᕐᒧᑦ ᐱᔨᑦᓯᕋᕐᓂᖅ
• ᐱᑕᖃᖅᑎᑦᓯᓗᓂ ᓈᓴᐅᑎᑖᕈᑕᐅᔪᓐᓇᖅᑐᓂᒃ ᐃᓕᓐᓂᐊᕐᓂᕐᒧᑦ ᐊᑐᕐᓗᒋᑦ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓴᐃᓂᕐᒧᑦ ᐱᓕᕆᐊᓂᒃ
• ᐃᓕᓐᓂᐊᕈᓐᓇᕐᓂᖅ/ᐃᓕᑕᕆᔭᐅᔾᔪᑎᑖᕈᑏᑦ/ᐸᐃᑉᐹᖅᑖᕈᑏᑦ/ᓴᖅᑭᕝᕕᐅᓂᖅ ᐃᓕᑕᕆᔭᐅᔾᔪᑎᑖᕈᑕᐅᔪᓐᓇᖅᑐᓄᑦ).
• ᐱᔾᔪᑎᖏᑦ ᑐᕌᖅᑕᐅᔪᑦ ᐱᓕᕆᐊᓂ ᑎᑭᓪᓗᒍ ᖃᓄᑎᒋ ᐅᓄᖅᑎᒋᔪᓄᑦ ᓄᓇᕗᒥ ᐃᓄᖕᓂᑦ ᑎᑭᐅᑎᓂᖓᕐᓂᖓ [ᒪᑭᒋᐊᖅᑕ ᑐᕌᖅᑕᖏᑦ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᖃᑦᓯᐅᓂᖏᓐᓂᒃ ᓄᓇᕗᒥ ᐃᓄᖕᓂᑦ ᑖᒃᑯᐊ ᑲᑐᔾᔨᖃᑎᒌᑦ ᓴᖅᑭᕝᕕᒋᓂᐊᖅᑕᖏᑦ ᐱᓕᕆᐊᒥᑎᒍᑦ, ᕿᒥᕐᕈᓕᕈᑎᒃ].
• ᓴᖅᑭᑎᑦᓯᒍᒪᔪᑦ ᓄᓇᕗᓕᒫᒥ ᐊᑐᖅᑕᐅᔪᓐᓇᖅᑐᓂᒃ ᐅᕝᕙᓘᓐᓃᑦ ᓴᖅᑭᐅᒪᑎᑕᐅᓂᐊᖅᑐᓂᒃ ᐅᓄᖅᑐᓂ ᓄᓇᕗᒥ ᓄᓇᓕᖕᓂ.
• ᐱᑕᖃᖅᑎᑦᓯᔪᑦ ᐊᕕᐊᕈᑎᓂᒃ ᐃᓕᒍᓐᓇᕐᓂᕐᒧᑦ.
• ᐃᓚᐅᓗᑎᒃ ᓈᒻᒪᒃᑐᑦ ᐃᓕᓐᓂᐊᖅᑎᑦᓯᒍᑎᒃᓴᓄᑦ ᐸᕐᓇᐅᑏᑦ, ᐅᖓᓯᒃᑐᒥ ᐃᓕᓐᓂᐊᕐᓗᓂ ᑎᑎᖅᑲᖁᑕᐅᒋᐊᓖᑦ, ᐊᒻᒪ ᐃᓕᓐᓂᐊᕈᑎᒃᓴᑦ ᐱᖁᑏᑦ.
• ᐃᓚᐅᓗᑎᒃ ᐊᔪᓐᖏᑎᑕᐅᔪᑦ ᒻᒪ ᐊᑭᑐᓗᐊᓐᖏᑦᑐᑦ ᐊᑭᓕᕆᓖᑦ.
• ᐅᓂᒃᑳᕐᓗᑎᒃ ᑖᓐᓇ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖓ ᐱᒋᐊᕐᕕᖕᒥᓂᒃ ᐊᒻᒪ ᐊᑐᖅᓯᒪᓂᕐᒥᓂᒃ ᐱᓕᕆᐊᓂᒃ ᓴᖅᑭᐅᒪᑎᑦᓯᓂᕐᒧᑦ ᓄᓇᕗᒥ ᐃᓄᖕᓄᑦ.
• ᒪᓕᒃᑐᑦ ᒪᓕᒋᐊᓕᖕᓂᑦ ᐊᒻᒪ ᖃᓄᐃᓕᐅᖁᔭᖏᓐᓂᒃ ᑕᒡᕙᓂ ᑐᓂᓯᖁᔨᓂᕐᒥᑦ ᑐᒃᓯᕋᐅᑎᓂᒃ.

 

1. ᑖᒃᑯᐊ ᑲᑐᔾᔨᖃᑎᒌᑦ ᖃᕆᓴᐅᓴᔭᓕᕆᔾᔪᑎᓂᒃ ᐱᔭᕆᐊᑐᔪᓂᒃ ᐱᓕᕆᐊᖃᕈᓐᓇᕐᓂᖏᑦ ᓴᖅᑭᐅᒪᑎᑦᓯᓗᑎᒃ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓴᐃᓂᕐᒧᑦ ᐱᔨᑦᓯᕋᐅᑎᓂᒃ: 50%. ᕿᒥᕐᕈᓕᕈᑎᒃ ᑐᒃᓯᕋᐅᑎᓂᒃ, ᑖᒃᑯᐊ ᑲᑎᒪᔨ?ᓛᑦ ᐃᓱᒪᒃᓴᖅᓯᐅᕈᑎᖃᕐᓂᐊᖅᑐᑦ ᑖᒃᑯᐊ ᑲᑐᔾᔨᖃᑎᒌᑦ ᑐᒃᑎᕋᐅᑎᖏᑦ ᐃᒪᐃᒻᒪᖔᑕ:

• ᐅᖃᐅᓯᖃᖅᑐᑦ ᑕᒪᒃᑯᓂᖓ ᐊᔾᔨᐅᖏᓐᓂᖏᓐᓂᒃ ᐊᒃᓱᕉᑕᐅᒋᐊᓖᑦ ᓴᖅᑭᐅᒪᑎᑦᓯᓂᐊᕐᓗᓂ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓴᐃᓂᖅ ᓄᓇᕗᒥ.
• ᑕᑯᒃᓴᐅᑎᑦᓯᔪᑦ ᑖᒃᑯᐊ ᑲᑐᔾᔨᖃᑎᒌᑦ ᐱᔭᕆᐊᑐᔪᓂᒃ ᐱᓕᕆᐊᖃᕈᓐᓇᕐᓂᖏᑦ ᓴᖅᑭᐅᒪᑎᑦᓯᓗᑎᒃ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓴᐃᓂᕐᒧᑦ ᐱᓕᕆᐊᓂᒃ ᓄᓇᕗᑦ ᓄᓇᓕᖏᓐᓄᑦ.

 

ᑲᑐᔾᔨᖃᑎᒌᑦ ᑎᓕᐅᖅᑕᐅᕗᑦ ᐃᓚᐅᑎᑦᓯᖁᔭᐅᓪᓗᑎᒃ ᑐᑭᓯᒋᐊᕈᑕᐅᒋᐊᖃᖅᑐᓕᒫᓂᒃ ᐊᑐᖅᑐᓂᒃ ᑕᒪᒃᑯᓄᖓ, ᐊᒻᒪ ᓇᓪᓕᐊᑐᐃᓐᓇᕐᓂᒃ ᓱᓕᔪᓂᒃ ᐃᓱᒪᒃᓴᖅᓯᐅᕈᑕᐅᔪᓐᓇᖅᑐᓂᒃ, ᑕᒡᕙᓂ ᑐᒃᓯᕋᐅᑎᓂ.

 

ᒪᑭᒋᐊᖅᑕ ᓈᓴᐅᑎᑖᖅᑎᑦᓯᓂᐊᖅᑐᑦ ᑐᒃᓯᕋᐅᑎᓂᒃ ᑖᒃᑯᐊᖑᒍᓐᓇᖅᑐᓂᒃ 100 ᓈᓴᐅᑏᑦ, ᐅᖁᒪᐃᓐᓂᖃᖅᑎᑕᐅᔪᑦ ᒪᓕᒃᑐᒋᑦ ᒪᕐᕈᐃᓕᖓᔪᑦ ᓇᓗᓇᐃᖅᑕᐅᓯᒪᔪᑦ ᖁᓛᓂ. ᒪᑭᒋᐊᖅᑕ ᑐᓂᓯᒃᑲᓐᓂᕐᓂᐊᖅᑐᑦ ᓈᓴᐅᑎᓂᒃ ᑐᓂᔭᐅᒍᑎᒃ ᑐᒃᓯᕋᐅᑎᓂᒃ ᒪᐃᑦᑐᓂᒃ:

 

• ᑖᒃᑯᐊ ᑐᒃᓯᕋᐅᑏᑦ ᐱᓕᕆᐊᑦ ᓈᓴᐅᑎᑖᕈᑕᐅᔪᓐᓇᖅᑐᑦ ᑎᒥᐅᔪᒧᑦ ᐊᒻᒪ ᓴᖅᑭᐅᒪᑎᑕᐅᓗᑎᒃ ᒪᑯᓄᖓ:
  • ᑮᓇᐅᔭᓕᐅᕈᑎᖃᕋᓱᐊᓐᖏᑦᑐᓄᑦ ᑲᑐᔾᔨᖃᑎᒌᓄᑦ ᐃᓂᖃᖅᑐᑦ ᓄᓇᕗᒥ: 15 ᓈᓴᐅᑏᑦ
  • ᓇᓪᓕᐊᑐᐃᓐᓇᑦ ᐊᓯᖏᑦ ᐊᔪᓐᖏᑎᑕᐅᔪᑦ ᑲᑐᔾᔨᖃᑎᒌᑦ: 10 ᓈᓴᐅᑏᑦ
• ᑖᒃᑯᐊ ᑐᒃᓯᕋᐅᑏᑦ ᓈᓴᐅᑎᑖᕈᑕᐅᓐᖏᒃᑲᓗᐊᖅᑎᓪᓗᒋᑦ ᑭᓯᐊᓂ ᓴᖅᑭᐅᒪᑎᑕᐅᔪᑦ ᑮᓇᐅᔭᓕᐅᕈᑎᖃᕋᓱᐊᓐᖏᑦᑐᓄᑦ ᑲᑐᔾᔨᖃᑎᒌᓄᑦ ᐃᓂᖃᖅᑐᑦ ᓄᓇᕗᒥ: 7 ᓈᓴᐅᑏᑦ
• ᑖᓐᓇ ᑲᑐᔾᔨᖃᑎᒌᒃ ᓴᖅᑭᐅᒪᑎᑦᓯᓂᐊᖅᑐᖅ ᐱᓕᕆᐊᓂᒃ ᑎᑎᖅᑕᐅᓯᒪᓂᖏᑦ
  • ᐃᓄᖕᓄᑦ ᓇᖕᒥᓂᕆᔭᐅᓗᓂ, ᑎᑎᖅᑕᐅᓯᒪᓂᖓ ᐋᖅᑭᐅᒪᑎᑕᐅᔪᖅ ᑕᒡᕙᓂ ᓄᓇᕗᑦ ᑐᓐᖓᕕᒃ ᑎᒥᖓᓐᓂ: 5 ᓈᓴᐅᑏᑦ
  • ᑕᒡᕙᓃᑦᑐᑦ ᓄᓇᕗᒥ ᓇᖕᒥᓂᖃᖅᑐᓄᑦ ᑎᑎᖅᓯᒪᕖᑦ ᐊᑐᐊᒐᖏᑦ ᐋᖅᑭᐅᒪᑎᑕᖏᑦ ᓄᓇᕗᑦ ᒐᕙᒪᖏᑦᑕ: 5 ᓈᓴᐅᑏᑦ
• ᑖᒃᑯᐊ ᐱᓕᕆᐊᑦ ᐃᒪᐃᓐᓂᐊᖅᑐᑦ

• ᐊᑐᖅᑐᑦ ᐃᓄᖕᓂᑦ ᐃᖅᑲᓇᐃᔭᖅᑎᑦᓯᓪᓗᑎᒃ ᓴᖅᑭᐅᒪᑎᑕᐅᓂᖏᓐᓄᑦ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓐᓂᐊᕐᓂᕐᒧᑦ ᐱᓕᕆᐊᑦ. : 5 ᓈᓴᐅᑏᑦ
• ᓴᖅᑭᐅᒪᑎᑦᓯᔪᑦ ᐃᑭᐊᖅᑭᕕᒃᑯᑦ/ᐅᖓᓯᒃᑐᒥᒃ ᐃᓕᓴᐃᓂᖅ ᓄᓇᕗᒥ ᐃᓄᖕᓄᑦ ᐊᕕᒃᑐᖅᓯᒪᓂᐅᔪᓕᒫᓂ: 10 ᓈᓴᐅᑏᑦ

ᒪᑭᒋᐊᖅᑕᒃᑯᑦ ᑐᓴᖅᑎᑦᓯᓂᐊᖅᑐᕆᔪᑦ ᓂᕈᐊᖅᑕᐅᔪᓂᒃ ᑐᒃᓯᕋᐅᑎᓂᒃ ᐊᑯᓐᖓᓐᓂ ᔫᓂ 8, 2020, ᑭᓯᐊᓂ ᑖᓐᓇ ᐅᓪᓗ ᐊᓯᔾᔨᕈᓐᓇᕐᒥᔪᖅ.

 

ᐃᓘᓐᓇᑎᒃ ᑐᒃᓯᕋᖅᑐᑦ ᑐᓴᖅᑎᑕᐅᓂᐊᖅᑐᑦ ᑎᑎᕋᖅᓯᒪᔪᑎᒍ ᑖᒃᑯᐊ ᑐᒃᓯᕋᐅᑎᖏᑦ ᓂᕈᐊᖅᑕᐅᖕᒪᖔᑕ, ᐋᒃᑲᓘᓐᓃᑦ ᐅᓪᓗᐃᑦ ᖁᓖᑦ ᒪᑭᒋᐊᖅᑕᒃᑯᑦ ᕿᒥᕐᕈᓚᐅᖅᑎᓪᓗᒋᑦ ᐊᒻᒪ ᓂᕈᐊᖅᓯᓚᐅᖅᑎᓪᓗᒋᑦ ᑐᒃᓯᕋᐅᑎᓂᒃ.