ᑎᑎᖅᑐᒐᖅᑎ ᓇᓗᓇᐃᒃᑯᑕᕐᐳᑦ ᓂᕈᐊᖅᑕᐅᔪᖅ

ᓴᒥᐅᕋ ᓚᐃᐅᓪᖑᔪᖓ, 14-ᓂᒃ ᐊᕐᕌᒍᖃᖅᑐᖓ ᐃᓅᔪᖓ ᑕᓗᕐᔪᐊᕐᒥᐅᑕᐅᓪᓗᖓ, ᓄᓇᕗᖕᒥ. ᒫᓐᓇᐅᔪᒥ ᒍᕋᐃᑦ 9-ᒥᑦ ᐃᓕᓐᓂᐊᕐᑐᖓ. ᖁᕕᐊᒋᔭᖃᖅᑐᖓ ᑎᑎᕐᑐᒐᐅᔭᕐᕆᐊᒃᓴᖅ, ᒥᕐᓱᕆᐊᒃᓴᖅ ᐊᒻᒪ ᓴᓇᖃᑦᑕᕆᐊᒃᓴᖅ. ᓱᕈᓯᓛᖑᓪᓗᖓ, ᐊᑖᑕᑦᑎᐊᕐᒪ ᐅᖃᐅᑎᓚᐅᕐᓯᒪᒻᒪᖓ ᑎᑎᕋᐅᔭᒃᑲᐅᓂᕋᖅᑐᓂᖓ ᑭᓇᖑᐊᓂᒃ ᐅᖃᐅᑎᓚᐅᕐᓯᒪᓪᓗᓂᖓᓗᑦ, “ᐃᔨᖑᐊᖏᑦ ᕿᑎᐊᓅᖃᑦᑕᕐᓗᒋᑦ”, ᒫᓐᓇᒧᑦ ᑎᑭᑦᑐᒍ ᒪᓕᒃᐸᑦᑕᒃᑲ ᐅᖃᐅᔾᔪᐃᔪᓯᕆᕙᔪᔭᖏᑦ. ᖁᕕᐊᒋᔭᖃᕐᒥᔪᖓ ᑎᑎᕐᑐᒐᕆᐊᒃᓴᖅ ᓄᓇᖑᐊᓂᒃ, ᐊᐅᔭᐅᓂᕐᑕᒫᑦ ᐊᐅᓪᓚᓲᖑᒐᑦᑕ ᐃᖃᓪᓕᐊᕐᕕᑎᓐᓄᑦ ᐊᒻᒪ ᐅᑭᐅᕐᑕᖅᑑᑉ ᓄᓇᖓᓂᒃ ᐊᔾᔨᓕᐅᕋᓱᐊᕐᑐᒍ ᑎᑎᕋᐅᔭᓲᖑᕗᖓ ᐅᕙᖓ ᖃᕆᑕᐅᔭᕋᓛᖓᓂ. ᐅᑭᐅᑦ ᐱᖓᓱᑦ ᐊᓂᒍᖅᓯᒪᓕᕐᑐᑦ, ᐃᖕᒥᓂᒃ ᐃᓕᓚᐅᕐᓯᒪᒐᒪ ᖃᕆᑕᐅᔭᕋᓛᒃᑯᑦ ᑎᑎᕋᐅᔭᕆᐅᒃᓴᑎᑦᑐᖓ. ᐃᓐᓇᐅᓕᕈᒪ, ᑎᖕᒥᓲᕐᒧᑦ ᐊᖁᑎᕈᕈᒪᔪᖓ ᐅᕝᕙᓗ ᖃᕆᑕᐅᔭᓕᕆᓂᕐᒥᒃ.

 

ᓇᓗᓇᐃᒃᑯᑕᖅ ᓴᓇᓚᐅᕐᑕᕋ ᑎᑎᕋᐅᔭᓚᐅᕐᓯᒪᔭᕋ ᒪᒃᑯᒃᑐᖅ ᕿᓂᕐᑐᖅ ᓯᕗᓂᕐᒥ ᐃᖅᑲᓇᐃᔮᕆᓛᕐᑕᒥᓂᒃ. ᐅᓈᕐᒥᓂᒃ ᐊᑐᖅᑐᓂ ᖃᐅᔨᒪᔾᔪᑎᓕᒃ ᓇᒧᙵᐅᒻᒪᖔᕐᒥ ᓄᓇᒥ. ᑕᑯᓐᓇᖑᐊᕐᑕᕋ ᖁᕕᐊᒃᑐᑦ ᐊᐅᓪᓚᐸᓪᓕᐊᓕᕐᑐᑎᒃ. ᐊᖅᓴᕐᓃᑦ ᑐᑭᖃᖅᑎᑕᒃᑲ ᓯᕗᓕᕐᐳᑦ, ᐊᒻᒪ ᒪᓕᒃᑐᑎᒃ ᑖᒃᑯᓂᖓ ᓇᖕᒥᓂᖅ ᑕᐃᒫᑦᑎᐊᖅ ᐊᑐᕐᓂᐊᕐᑕᒥᓐᓂᒃ ᐃᓱᒪᓕᐅᕈᑎᖃᖅᑐᓂᒃ.