Ikkayohiakutinik Havagiyait

10 Immaktirvia 2020

Toghiktoktot Oktotighanik: Ungahiktomit Ilihakpalikutighanik/Kagitaoyakut-Ilihaotighait Inuit Nunavumiut

Makigiaqta Inuit Ilihakpaliknikut Timingat (“Makigiaqta”) toghiktoktot oktotighanik hatkiktitjutighanik uvalunin ehoaghaotighanik ungahiktomit/kagitaoyakut ilihakpalikutighanik havagiyaoyoghanik. Hamna pitjutaoyok havagiyaovloni hatkitpaliayomavlogit hapkua Inuit Nunavumi ilihaotighaitnik, ilihakpalikutighaitnik tatvalo ayogoigiangita havaghaghiokutighaitnik, tatvalo pivaliotighaitnik maniliokutighanik oktotighaitniklo. Makigiaqta tonihiniaktot oktogungnaktunot timioyonot kitlikaklugo $250,000 ilikut manighagiyaghaitnik. Kititlugo tammat manighagiyaghait atoghaghak ataohikmi okiomi atoklugo una Ikkayohiakutinik Havagiyaoyonik tatva $1 million talanik.

Makigiaqta

Makigiaqta aolagotaohimayok malikavlugo una $175 million talanik hilatani appighoiviop angekutaohimangmat ukunanga Nunavut Tunngavik Timingat (“NTI-kut”) tatvalo ukkua Kavamaita Nunavut tatvalo Kanatami. Makigiaqta toniyaohimayot havagitkuvlugo hamna angekutaohimayok ikkayohiakutighak pivalikuvlugit Inuit upalungaiyaotighait havaghaghiokutighaitnik tatvalo ahiagot maniliokutighaitnik. Makigiaqta hivunighami paknaiyaotighait pivaliotighaitnik Inuit elikoakutighaitnik, oktotighaitniklo nakoatot innutjutighaitnik hapkua ublumioyok Inuinait, tatvalo atokpaliayaghaitnik inulikinikut pivaliatjutighaniklo hamani Nunavumi tatva ikkayotighaitnik kingovaghapta.

Makigiaqta Ehoaghaktaohimayot Paknaiyaotighak (una “Paknaiyaot”), una hatkiktaohimayok uvani, titighaghimayot hitamat Ehoaghaktaohimayot Hivoliotiyagiakaktot:

Hivoliotiyoghak 1: Ilihalihaktunoit ilihaotait. Hatkikpalianinga hapkua ilihalihaktunoit ilihaotighaitnik, ihomaligaoghogit hapkua notakat ilihaotighaitnik ukkaohikut, iliitkohikut pitkuhikutlo, tatva ilaliotihimangmata pivaliotighaitnik hapkua K-12-kut ilihaotaitnik, havaghaghiokutaitnun, tatvalo nakuatot ihomakut anniaktailitjutighaitnik.
Hivoliotiyoghak 2: Ikkayotighat ilihaotighaitnik hapkua koligektonik ilihaotaitnik K-12 ilihaktot tatvalo ilihakpaligomanikata. Hamna ikkayotighak pitjutaoyok ilaliotihimayok ikkayotaotkovlugo ukkua Nunavut Kavamatkut havagiyaitnik pivaliotighaitnik Nunavumi ilihaktot ilihaotaoyonik tatvalo ukkua K-12-mi ilihaktot pivaliotighaitnik.
Hivoliotiyoghak 3: Tungavighaitnik ilihaotighaitnik oktotighat enekniit. Ukkua Nunavut Kavamatkut tatvalo NTI-kut naonaighihimaliktot ihagiagiyaoyonik havagiyaoyoghanik ilihaktitiyughanik taigoaknikut tatvalo hapkua enekniit ilihaknikut oktotighaitnik Inuinait iliitpaligiangita havaghaghiokutighamingnik.
Hivoliotiyoghak 4: Ilihakpalikutihat tatvalo ilihagiakpaligomayot ilihaotighaitnik havaaghanik atanguyaoyot havagiyaitnik. Pivaliotighaitnik ilihagiakpaligomayot tatvalo naliaknik havagiyaoyomayonik ilihakpalikutighaitnik havakaligiangita hivonighamut, taimatot hivonighami amegaikpaligiangita Inuinait havaktot ayungitkiyaoyonik havagiyaoyonik kakkugo.

Makigiaqta kinnikhiavallaktot havagiyaoniaktonik tatva atoktaoniaknikata ukkua Hivoliotiyoghanik 2 tatvalo 4 uvani kinnighiayonik toghiktotighanik.

Hapkua Timioyot oktokuyaoyok ehivgiokuyaovlotik haffuminga Paknaiyaotimik hanaiyakpaliatitlugit kiotjutighaminik haffuminga kinnighiatitlugit toghiktotaoyonik oktotighanik.

Kanogitonik Havakaktot

Tatva kikliginiaktait naliak hapkua havagiyaoyot ataohik okiok natagiakaktok. Makigiaqta ihomaginiaktait hapkua toghiktotaoyot havaghanik:

Havagiyaoniaktot enektaoyungakata ataohikmi okiomi; uvalunin
Ilihaotait enektaoyungnakata ataohikmi okiomi elaliotihimanikata kaffinot okionot havagiyaotitlugit (uktutigilugo ukkua ilihaktamingnik enektaogangata titikanik naonaipkutitaakniaktot).

Makigiaqta aivakatikagungnaktot timioyunik tikoaktaohimayot atoklugo una toghiktotaoyok oktotighanik ehoaghaiyungnakata tatvalo hatkiktitiyungnakat kaffinik okionik ilihakniaknikata uvalunin hapkuninga ilihaotait titikanik naonaipkutitaakniaknikata.

Makigiaqta aivakataoyungnaktot hapkuninga havagiyaoniatonik aolakutighaitnik tatvalo kanok hivitoniakat pikatigilogit hapkua atkunaktot timioyot.

Makigiaqta ihomaginiaktait hapkua ungahiktomit kagiyaoyakut ilihaotighat amehuyonik ilihaotighanik, ilaliotilugit hapkua:

Inuit okaohiitnik tatvalo iliitkuhiitnik
Ilihaktot ilihaotaitnik uvalunin enektikutaitigot ikkayoktaonik [K-12]
Allanik okaohioyonik ekayotaoniaknikata hapkua ilihaktot ilihaotigiyaitnik uvalunin enektigotighaitnik
Mikhuknikut, annugalioknikut tatvalo hannanikut havagiyaoyot [nuvighainikut/titigaoyaknikut]
Hannaoyaknikut tatvalo pinnikutinik hannaoyaknikut
Maniliokutinik nikkilioknik, ilaliotilugit Ekalukpiit, Tuktuit Umingmaitlo
Timioyot uvalunin maniliokutikangitot kavamalikiyioyot,atanekakvioyot,manilikinikut havakaktot
Nanminikaktot tatvalo nanminiktakutighanik
Kagitaoyalikinikut tatvalo nahaotinik kagitaoyalikinik
Okaotjiyionikut havakaktot
Maligalikinikut [ilaliotilugit palihimat, etiktaoviit,maligalikinikut ilihaknik, ihoinaakutaokataktonik, tatvalo kavamalikinikut]
Havaotilikinikut tatvalo naonaiyaiyioyot havagiyaitnik
Angutikhanik tatvalo naonaiyainikut
Okaktionikut tatvalo nomiktitinikut
Ihomamikut anniakutikaktonik tatvalo okaotjiyiokataknik
Anniakvikmi havaakaktot tatvalo enekninek ayoliktonik monaghinik
Manilikinikut tatvalo manighagiyaita makpigangitnik
Omayonik tatvalo ahianik avatilikinikut naonaiyainik
Ingilgayolikinikut
Hannalikinikut
Nunaoyalikinikut
Innulikinikut
Pivalialikinikut, attoktuyaknikut tatvalo kungialioknikut
Kungialioknikut
Innuhanik ilihaktitinik
Ilihaknikut tatvalo ilihaiyionikut ilihakpaliknik
Atangunionikut tatvalo havaktolikiyionikut
Hannaioyonik atanguyaonikut tatvalo nanminikaktonik havagiyaitugot
Nanminikaohikut iglunik, nanminigiyaitigot, nunanik uvalunin iglulioknikut atanguyaonik
Hannayionikut tatvalo hannayionikut ilihaktot havagihimaakhutjuk
Uyagaghioknikut tatvalo pualigaktot nunnap iloagot
Nikkinik ilihakpalikutaoyot tatvalo kukkiunikut
Ingilgaaknitanik naonaiyaioyot tatvalo eliitkohitokaknikut
Palagiakataknikut tatvalo pivalialikinikut
Niovavionikut tatvalo tungahoktitinikut atanguyaonik
Uplapkilikinikut tatvalo ulapkitjutaoyonik
Tohaktitilikinikut
Kavamalikinikut atanioyot havagiyaitnik maligalikinikutlo ehoaghainikut,

Kittot Timioyot Oktogungnaktot

Makigiaqta angekungnaktait hapkua timioyot toghiktotait:

Timioyot attilioghimayot immatot maliokutikangitovlotik timioyot Nunavut eloani tatvalo namagiyaotiaktot tatvanga Nunavumi Maligaliriyiut Attiliokutinik.
Maniliokutikangitot timioyot laisighaktaghimayot tatvalo attilioghimavlotik nanminikaktot Nunavumi.
Maniliokutikangitotik timioyot uvalunin maniliokutikagomik timioyot attilioktaohimakpata naliakni pivigiyagiakaktaminit aviktoghimayoni attilioktioyonit TATVALO attilioghimakpata huli aviktoghimyoni timiovlotik eloani Nunavumi.

Ukkua timiokpata ayoghaknikata havagiyaminik uvalunin ayoknigomitku havagiyaktik tatva aulatiakutighanik haffuma havagiyaoyop tatva kingiyaoyungnaktot tatvalo titigaghimaniaktot imatot ‘Havagiyungnangitait’ tatva pitjutigivlugo kihiani una Toghiktotot oktotighaitnik. Taima kingolikpakmik, Makigiaqta ihomagiyungnaktait hapkua kittot ‘Havagiyungnangitait’ hapkua pitjutigilugit ukkua timioyot pihimayakaknikata:

Kinguani 12 tatkikhiotit havagiyamingnik eneghihimangitot akkiliktoihimangitotlunin havaghanik tatvanga Makigiaqta-kunin, NTI-kunin uvalunin nanminikakatigiyaitnitlunin
Una havagihimayaat enekhimanginikatjuk, atogakaknikata tatvani Makigiaqta-kuni, NTI-kuni uvalunin nanminikakatigiyaitnitlunin.
Hatkitihimangitpata tatvunga Makigiaqta-kunun, NTI-kunun uvalunin nanminikakatigiyaitnunlunin manilikitjutaita naonaipkutaitnik uvalunin ahianik titikanik piyagiakaktitlugit attilioghimayatik malikalugo.
Kanogitogaloakat, kingoani kingiyaohimanikata toghiktotaoyonik oktoghimatitlogit uvalunin attiliokutaoyonik pikatigivlugit ukkua Makigiaqta-kut, NTI-kut uvalunin nanminikakatigiyatlo.

Kaoyimayaolikata naliaknik naonyaktaovlotik appighoiyioyonit uvalunin ahianik ataniktoiyonit, uvalunin immakak, timiovlotik uvalunin havaktigiyait naonayaktaovalianikata uvalunin kingoani ihoinaghimanikata kukkikhimavlotik uvalunin ahiagot manilikinikut ihoinaghimanikata.

Ilihaotighait Hatkitpaliatjutighaitnik Toghiktotaoyot Oktotaoyonik

Tamaita hapkua toghiktotaoyot nalaomatiyagiakaktot hapkuninga malikayagiakaktotnik ukkua Makigiaqta-kut Ikkayohiakutaovaktot Havagiyaoyonik Titigaghimayoni. Ukkua toghiktotit titigat hatkiomayot tatvani kagitaoyakut titigakviani www.tunngavik.com, tatvalo timioyt ehivgiogiakaktait hapkua toghiktotit titigait naonaitiagahoaklogit hapkua tohaktitjutait tatvalo titikat piyagiakaktot tamaita toghiktotit pitjutigivlugit.

Timyiot huli hatkitiyagiakaktot malikalugit naonaipkutaoyot malikatiaghimavlotik, pitjutigivlugo una attiliokutat una Attiliokutaoyonik Maligak, una Nanminikaktot Timioyot Maliigak, ukkua Inuit Nanminikaktot attiliokutat uvalunin una NNI-kut Maligak attiliokutaoyonik, uvalunin nakuatot naonaipkutikakata uvalunin pihimayakakata huli aviktoghimayoni timionikmik naonaipkutimik.

Timioyot naonaitiaghimayagiakaktot naliakni toghiktotimingik tatva oktotikaktot kiotjutigivlugit naliak toghiktotaoyot, tatvalo toghihinagiakaktot toghiktotimingnik opaotilotit, tittigakakvikut, kayumiktokut uvalunin kagitaoyakut tuyoklogit tatvunga:

Makigiaqta Inuit Training Corporation

Titigavia Box 638

Iglu 626 [1^st floor, Tumiit Plaza]

Iqaluit, NU X0A 0H0

Hivayaota: (867)-979-7923

Kayumiktokut: (867)-979-7925.

Kagitaoyakut titigakvia: makigiaqta@tunngavik.com.

Kigligha haffuma Toghiktotinik Tonighitjutighaitnik

Timyioyot tonighiyagiakaktot toghiktotiminik kangiktinago ublukhiot 5pm Qikiktani tatvani June 8, 2020.

Una toghiktotaoyok malikatiangitpat ukkua Makigiaqta maligaitnik ukkua timioyot okaotjaoniaktot notangoktikuvlugit tatvalo tonihiffiakakniaktait hapkua toghiktotitik tatvunga hamna oktotaoyok aolahimaaktitlugo tatvalo kangiktinago una kigligha.

Makigiaqta ihomagilaitait toghoktotaoyot toniyaohimayot notangoktiktaohimayotlonin kangiktitlugo una kigligha, tatva;p oktokuyairt tamaita hapkua timioyot tonihinakikovlogit toghiotighaminik kilaminoak uvalunin tohaktitlogit ukkua Makigiaqta-kut taimatot ihivgioktaoyangita hapkua tamaita toghiotaoyot malikatiagiaghaita oktotaoyonik toghiktotinik.

Ukkua inmikut ihomagiyagiakaktait timioyot inmingnik tatva Makigiaqta-kunot tonihiyagekiakaktot toghiktotit oktotaitnik kangiktinago una omikvigha.

Appikutaoyot haffuma Toghiktotaoyot Oktotighanik mighagot

Timyioyot titigagungnaktot appikutimingnik haffuma Toghiktotaoyot Oktoighanik mighagot tatvunga titigaklotik: Randy Qamaniq, Atanguyaoyok, Havakviatni Inuit Ilihakpalikutaitnik Havagiyait Programs & Makigiaqta Inuit Ilihakpaliknikut Timioyot, tatvunga RQamaniq@tunngavik.com.

Makigiaqta-kut Ehivigokutait Toghiktotaoyonik Oktotinik

Toghiktotaoyonik Oktotinik kimilgoginiaktait ukkua Makigiaqta-kut Havagiyaoyonik Katimayigalaatyonik Katimayigalaanit naonaiyaklogit maligayaghaita haffuminga toghiktotaoyot oktotighat pitjutigivlugo. Toghiotinik Oktotaoyot kimilgoktaolotik naonaiyaktaoniaktot ukunanga Okaotjiyiovlotik Katimayigalaatnit. Ukkua Okaotjiyiovlotik Katimayigalaat toyotiginiaktait hapkua tikoaktaohimayot toghiktotaita oktotaitnik tahapkununga Makigiaqta-kut Katimayiitnin, tatvalo ukkua Katimayiit ihomaghoklotik angekniaktait naliat hapkua toghiktotaoyot oktotaoyot.

Toghiktotaoyot oktotait naonaiyaktaoniaktot atoklogit hapkua kimilgokutit:

Ukkua timioyot toghiktotait oktotit ikkayotaoniakata ukkua Makigiaqta havagiyaitnik atoklogik ukkua Hivoliotiyagiakaktot 2 unalo 4, tatvalo hatkiomaniaknikat una havagiyaoyot humilikak Nunavumi, uvalunin tamaitni pinaguni aviktoghimayoni: 50%. Tatva naonaiyaktaotitlugit hapkua toghiktotaoyot oktotit, ukkua Katimayigalaat ihomaginiaktait kanok ukkua timioyot toghiktotait oktotit pihimayakakata hapkuninga:

Ilihaotait Inuktut havagiyaoniakata.
Ilaliotihimakpata Inuit havaktoghat hatkikpaliatitlogit hapkua ilihaotait kagitaoyakut/ungahiktomit ilihaiyiokakniakata.
Hatkiotaoniakat titikanik naonaipkutinik kagitaoyakut ilihaotaitnik/unghiktomit ilihaitjutinik (naonaipkutanik/tiktikanik inniktikutinik/ilihalihaktonik tatvunga inniktikutaitnik ilihaotinik).
Oktotait nalaohimakpata ilihaotighat amegaitonot Nunavumiot Inuinaknun [Makigiaqta ihomaginiaktait hapkua kaffiotilangit Nunavumiot Inuinait tatva ukkua timioyot ihomagiyait ilihaktitiyomaniakata tatva kimilgoktaotitlogit].
Toghiktotait oktotikaknikata tamatkiomalogit Nunavut hatkiomaniakata ilihaotighait uvalunin kaffioniaknikata Nunavumi nunaliit.
Ililiotihimakpata hapkua ayoghaotaokataktot ilihaknikut.
Ilaliotihimakpata ihoaktonik ilihaitjutighaita paknaiyaotaitnik, ungahiktomit ilihaitjutighait ilihaktot, ilihaknikut havagiyaoyonik.
Ilaliotihimakpata akkitovalangitonik akkiliktotighaitnik.

Onipkatiaghimakpata ukkua timioyot tatva ilihimayaotiakata nakoatot havatiaktot tatvalo ayungitot ilihaotaoyonik havakaghimayot ilihaktitivaghotik Nunavumi Inuinaknik.

Malikatiaktot hapkuning maligoakutaitnik haffuma toghiktotaoyot oktotighanik.

Ukkua timioyot kagitaoyakut ayungitotait hatkitikutighanik kagitaoyakut ilihaotighanik/unghiktomik ilihaiyioyoghaniklo: 50%. Kimilgogititlugit hapkuninga toghiktotaitnik oktotinik, ukkua Katimayigalaat ihomaginiaktait immakak ukkua timioyot toghiktotait oktotit pihimakpata hapkuninga:

Naonaitiaghimakpatjuk hamna alanganinganik ayoghaotaokataktonik hatkitinahoagiakmi hapkuninga kagitaoyakut ilihaitjutinik/ungahiktomit ilihaktitinikut eloani Nunavut.
Naonaitiaghimayagiakaktot ukkua timioyot ayughangitot kagitaoyakut amegangitot havagiyaghait kagitaoyakut ilihaktitinikut/ungahiktomit ilihaitjutighaniklo hatkitiyungnaktot Nunavut nunaliitnun.

Timioyot taimatot oktokuyaoyot ilaliotihimalogit tohaktitjutighat ehoakutaoyot hapkununga pitjutaoyonik, tatvalo ahiagot pitjutaoyonik ihomagiyaitnik namagiyaokpata, toghiktotigiyaitnik.

Makigiaqta titigaghimaniaktait nahaotiloktoklugit naliak toghiktotaoyot nakunighaoniakninganik kiklikaklugit 100-nik nahaotinik, ihomagilogit malikalugik ukkua malgok elikoatok naonaipkutik titigaghimayok atani. Makigiaqta tonihiniaktot huli nahaotinik ehivgioghivaliatitlotik hapkuninga toghiktotaoyonik immatot:

Una toghiktotigiyaoyok havaghak attilioktaohimanikat naliaknit attilioktitilikiyioyot timianit tatvalo hatkitaohimakpat:
- Maniliokutikangitot timioyot aolayot eloani Nunavumi: 15
- Kitotoinak allat oktoghungnaktot timioyot: 10 nayaotit
Una toghiktotaoyok havaghak attilioghimanitot kihiani hatkitaoniaktok maniliokutikangitonit timioyonit eloani Nunavami: 7 nayaotit
Una timioyok hatititiniaktok havagiyaoniaktonik attilioghimakpat.
- Inuinait nanminigiyait attilioghimakpata tatvani Inuit Nanminikaktot Attiliokutaitni titigaghimakpata NTI-kunin: 5 nayaotit
- Titigaghimakpata tatvani NNI-kut Malighaitni havagiyatni ukkua Nunavut Kavamatkut: 5 nayaotit
Una havagiyaoniaktok pitjutaoniaknikat
- Atoghimaloaklogit amegaitiyaologit hapkua Inuit havaktigiyatik hamna hatkitaoniaktitlugo kagitaoyakut ilihakpaliktotat/ungahiktomit ilihaiyioyonik havaktikaklotik: 5 nayaotit
- Hatkititiniakata kagitaoyakut ilihaitjutinik/ungahiktomit ilihaiyioyonik havaktikaktotik Nunavumi Inuinaknik tamaitni aviktoghimayoni: 10 nayaotit

Makigiaqta nigioktot tohaktitjutighamingnik tiktoghihimayamingnik toghiktotaoyonik akungani June 8, 2020-mi, kihiani una ublua alanguktaoyungnaktok.

Tamaita toghiktotinik oktoktot tohaktitaoniaktot titikiviolotik kanok hapkua oktotait angektaongmangata kingiyaongmangatalunin eloni 10-nik ublunik ukkua Makigiaqta-kut ehivgioktaghimalikatjuk tatvalo tigoaghihimalikata naliaknik toghiktotinik oktotaoyonik.